solveig54

Stefán Ómar 12 ára

2012-02-06T04:54:00.001-08:00

Sunnudaginn 6. febrúar varð Stefán Ómar 12 ára. Við Siggi Birkir kíktum í fjölskyldukaffi og nutum góðra veitinga að vanda, sátum og spjölluðum og eitt aðalumræðuefnið var unga fólkið í fjölskyldunum sem enn er laust og liðugt og farið að nálgast þrítugsaldurinn :)
Ég hef nú engar áhyggjur af þeim, enda þekkt í fjölskyldunni að sumir geyma giftingar og barneignir framundir fertugsaldurinn.
Til gamans má geta þess, að eitt af verkefnunum mínum í Bókasafnsnáminu var að vinna með photoshop og þá gerði ég þessa mynd af Stefáni, þar sem hann lítur út fyrir að eiga eineggja tvíbura sem situr þarna hjá honum :)

Þorrablót Seyðfirðinga 2012

2012-02-06T04:34:00.000-08:00

Hið árlega Þorrablót Seyðfirðinga hófst í byrjun Þorra, 21. janúar s.l.
Það var myndarlegt og hressilegt eins og venjulega. Sigga Fridda var formaður og hafði margt hæfileikaríkt fólk með sér eins og alltaf er á hverju ári.
Magni Ásgeirs, Tommi Tomm og félagar skemmtu gestum fram eftir nóttu.
Það sem var e.t.v. óvenjulegt við þetta blót var, að engin svið voru í boði eins og alltaf hefur verið, heldur var nóg af sviðasultu sem mér fannst miklu snyrtilegra að borða, þó segja megi að það tilheyri að borða sviðakjamma við svona tækifæri. En málið er, að flestir þorragestir vilja neðri hluta kjammans og fáir borða þann eftri, svo að mikill afgangur hefur orðið s.l. ár, sem er auðvitað ekki nógu gott.
Við sátum við borð með Binnu, Magga, Stefaníu, Örnu og fleirum og dönsuðum okkur sveitt og þreytt og ákváðum þegar klukkan var langt gengin í 3 að koma okkur heim í háttinn.
Siggi Birkir var þá farinn heim, en hann lenti í smá "ævintýri", því hann læstist inni á WC og sækja varð viðgerðarmann með græjur til að opna.

Þorrahelgi á Húsavík

2012-01-31T13:51:00.000-08:00

Við Rúnar skelltum okkur norður til mömmu s.l. föstudag, þó hálka væri frekar mikil, en spáin var góð fyrir helgina og við vorum heppin með veður eins og oft áður á ferðum okkar norður. Það var algjör blíða og við fórum rólega yfir fjöllin í hálkunni. Allt var hvítt af snjó og fallegt yfir að líta, en magnið var ekki mikið og það hvarf ótrúlega hratt í hlákunni sem varð um helgina. Á laugardags- morgninum kl. 9 var birtan bleik úti, en síðan tók við asahláka svo að tröppurnar og lóðin sem voru þakin snjó við komuna, voru alveg orðin hrein og þurr á sunnudagsmorgni. Blessuð mamma lagast ekki og heyrnin hennar er alveg að hverfa, því miður, en hún var hress og þekkti ennþá nokkuð marga á gömlu myndunum sem við skoðum alltaf þegar ég kem norður.
Mínar gömlu og góðu vinkonur Sigrún og Villa ásamt Fúsa litu inn í kvöldkaffi og voru í stuði til að spjalla og hlæja og gera grín að skemmtilegum mismælum og öðru slíku sem hent hefur þær á undanförnum árum. Ég fór með hláturtárin í rúmið eftir að þær kvöddu.
Á leiðinni austur aftur á sunnudaginn var vegurinn orðinn alauður alla leið eins og komið væri sumar, þvílíkur munur eða á norðurleiðinni, en veðrið var hinsvegar ekki eins fallegt, það rigndi á köflum og því lítið um myndatökur í þetta sinn. En það fylgja hér með nokkrar myndir frá Húsavík að vanda :)

Mús á háaloftinu !!!

2012-01-20T05:25:00.001-08:00

Undanfarnar 2 vikur hef ég heyrt þrusk uppi á háalofti þegar ég var háttuð og þögn í húsinu. Mér fannst ótrúlegt að mús gæti komist þarna upp, en gat ekki afneitað trítlinu sem ég þóttist heyra og bað því Rúnar minn þegar hann kom heim af sjónum, að setja gildru upp á loft til að kanna málið. Honum fannst nú ekki trúlegt að neitt kvikt væri þarna uppi og sá engan músaskít eða ummerki um mús, en setti samt upp gildru til að þóknast mér.
Um kvöldið þegar hann var kominn inn í rúm og ég rétt ókomin inn, þá heyrði hann smá hávaða á loftinu (en hann heyrir ekki eins vel og ég, því miður) og fannst það grunsamlegt. Morguninn eftir (í gærmorgun) dreif hann sig aftur upp á loft og kíkti á gildruna sem náð hafði að fanga þetta fallega músagrey, sem hlýtur að hafa komist inn um litlu loftgötin undir þakskegginu, eftir að hafa skriðið undir stálklæðninguna að utanverðu og grafið sig í gegnum einangrunina sem nær alveg upp að loftgötunum... Önnur leið er varla til þangað upp. Ekkert hljóð hefur heyrst af loftinu síðan þetta gerðist, sem betur fer :)

Úskrift Sigga og nýtt starf á Egilsstöðum

2012-01-03T12:07:00.000-08:00

Þann 20. desember s.l. útskrifaðist Siggi Birkir eldri sonur okkar sem rafeindavirki og stóð sig svo vel að hann fékk verðlaun.
Rúnar var í frítúr og gat því skroppið suður og samglaðst syninum á þessum degi. Þeir fóru og borðuðu á jólahlaðborði Lækjarbrekku ásamt Bergþóri og Hildi í tilefni dagsins.
Siggi pakkaði síðan saman dótinu sínu, fyllti bílinn og ók austur áður en allt varð ófært fyrir fólksbíla. Hann var semsagt búinn að fá nýja vinnu hjá Rafteymi á Egilsstöðum og verður því til húsa hjá okkur og ekur á milli, a.m.k. þar til hann ákveður annað.

Fjörugt spilakvöld !

2012-01-02T05:30:00.000-08:00

Í gærkvöld hóuðu Binna og Maggi í okkur, því þau ætluðu að fara að spila og við höfum oft spilað saman um hátíðar, svo við drifum okkur út í hálkuna.
Til að byrja með tókum við þátt í því að pússla hluta úr stóru pússluspili, en síðan tók við spilamennskan og varð fjörugri eftir því sem leið á kvöldið. Við nefnilega skiptum um spil, fyrst spiluðum við sem einstaklingar, en fórum svo að spila Pictionary og skiptum okkur þá í tvö lið. Leikurinn æstist, því við vorum orðin nokkuð hávær til að það heyrðist vel hver væri fyrstur með rétta svarið og höfðum við öll bara gaman af :)

Nýársdagur 2012

2012-01-01T09:22:00.001-08:00

Nýársdagur rann upp stilltur, bjartur og fallegur með vægu frosti. Sólin skein á fjallatinda og togaði mann út, þrátt fyrir hættulega hálku á götunum. Við ókum því inn í land og gengum á snjó upp í skógrækt og sáum þar allt fullt af rjúpnabælum fullum af skít og sporum en engar rjúpur. Sáum hinsvegar einmana urtönd á klakanum á Fjarðaránni á leiðinni heim, innan um klakaskreytta steina sem litu út eins íshattar. En í millitíðinni röltum við líka inn í Fjarðarsel, þar sem allt var í klakaböndum nema vatnið í ánni neðan við nýju rafstöðina. En vatnið sem kemur frá henni hefur hitnað nóg á leiðinni í rörunum niður af heiðinni til að bræða klaka og ís og því er Fjarðaráin auð þarna á kafla....

Gamlaárskvöld 2011

2012-01-01T08:53:00.001-08:00

Síðasti dagur ársins 2011 rann upp hlýr og stilltur, bæði logn og frostleysa, en um hádegi var komin hellirigning og skelfileg hálka á götum bæjarins og stekkingur út með firðinum.
Rúnar og félagar hans í fuglatalningar- genginu hófu fuglatalningu kl 10 um morguninn og voru ekki búnir að klára öll svæðin þegar rigna tók og hálkan hamlaði þeim að komast á alla staði sem þeir eru vanir við þessar árlegu talningar.
En það stytti aftur upp og kvöldið varð jafn blítt og stillt og morguninn. Við Rúnar og Siggi snæddum afskaplega góða gæs og meðlæti, horfðum svo á áramótaskaupið sem okkur fannst nú hvorri verra né betra en vanalega og drifum okkur síðan með 2 tertur í miðnætur- fjölskyldukaffi til Kristrúnar og Birgis eins og við erum vön undanfarin ár. Þar skaut unga fólkið ásamt Rúnari og Magga upp slatta af rakettum o.fl. áður en sest var við veisluborð enn einu sinni og nýja árið boðið velkomið um leið og það gamla var kvatt :)

Árlegt fjölskyldukaffi

2011-12-26T09:43:00.001-08:00

Það hefur orðið að venju að við mætum með eitthvað meðlæti til Binnu og Magga um hver jól og hittum þar alla stórfjölskylduna. Að þessu sinni bjó ég til tvær heitar brauðrúllur sem kláruðust (mér til ánægju) en nóg var af tertum og öðru góðgæti til að velja úr. Verst að allir eru orðnir saddir eftir tveggja daga ofát. En það er alltaf gaman að hittast um stund og spjalla saman. Engan vantaði nema Boga Þór og fjölskyldu og fjarstadda afkomendur okkar Rúnars...

Aðfangadagur 2011

2011-12-26T09:34:00.001-08:00

Aðfangadagur var óvenju rólegur hjá okkur að þessu sinni, enda engin börn hér eins og undanfarin ár, sem við höfum eytt með öllum okkar börnum og barnabörnum. Siggi Birkir fékk að ráða því hver aðalrétturinn var, að þessu sinni og hafði góða lyst :) Eftirrétturinn er hinsvegar alltaf hefðbundinn og smakkast alltaf jafn vel.
En rétt fyrir miðnættið skall á hvassviðri sem reif upp aðra hurðina á garðskúrnum okkar og þeytti henni í heilu lagi yfir í næsta garð. Að vísu mölbrotnaði glerið í henni en að öðru leyti slapp hún nokkuð heil og mér tókst að ná henni og koma henni inn í kofann áður en Rúnar kom heim úr togara-eftirlitsferð sem hann fór að vanda, en tafðist vegna 3ja tómra fiskikara sem komin voru að því að fjúka í sjóinn og hann náði að bjarga og binda niður. Þetta fór því allt vel að lokum, því Rúnar kom hurðinni á sinn stað með plasti í stað glers í bili :)

Gallerí Garðars !

2011-12-23T03:24:00.000-08:00

Garðar Eymundsson listmálari (og fyrrum trésmiður) hefur lengi verið að dunda sér á efri árum við að mála fallegar landslagsmyndir. Hann er ansi lipur við það og við eigum tvær fallegar myndir eftir hann og gáfum dóttur okkar í afmælisgjöf eitt málverk frá honum.
En hann hefur nokkuð oft þurft að flytja sig um set með vinnustofuna sína, en er nú vonandi kominn á stað sem hann fær að hafa það sem eftir er. Það skemmtilega er að Karólína kona hans átti þetta húsnæði fyrir nokkrum áratugum og rak þar tískuverslun. Hann bauð því Seyðfirðingum og öðrum til opnunarteitis og við mættum ásamt fleirum til að óska honum til hamingju, enda höfum við oft verið honum innan handar með ýmislegt, þegar hann hefur vantað aðstoð og Siggi okkar kom líka með, enda vann hann við smíðar hjá Garðari fyrir nokkuð mörgum árum og þeim hefur verið vel til vina síðan.

Þrennir tónleikar !

2011-12-19T02:51:00.001-08:00

Undanfarna viku lenti ég á þrenna tónleika og satt að segja er það mjög óvenjulegt. Fyrstir voru jólatónleikar Tónlistarskólans, en þar komu fram nemendur á ýmsum aldri sem stóðu sig allir vel miðað við aldur.
Svo mætti Regína Ósk með fjölskyldu sína og undirleikara og hélt Jólatónleika í bláu kirkjunni okkar. Gulla í Firði var búin að æfa barnakór með yfir 20 börnum og unglingum til að syngja undir með Regínu og það tóks mjög vel og á Gulla og krakkarnir heiður skilinn fyrir frammistöðuna, ekki síður en Regína og félagar.
Síðustu tónleikarnir voru í Herðubreið í gærkvöld og það stóð ekki til að fara á þá, en úr varð að ég skrapp aðeins (mætti of seint) og hlustaði á restina af lögum Mugisons, en fannst hávaðinn heldur mikill í lokin og gekk því fram í andyrið þar sem fleiri voru í sömu erindum, þ.e. að forðast mesta hávaðann. En rúsínan varð sú að Mugison skokkaði fram til okkar að loknu síðasta laginu og um leið og ég þakkaði honum fyrir okkur, þá gekk hann á röðina og tók í hendina á okkur sem var óvænt, því handtakið var bæði fast og vinaleg og mun betra en hávaðinn sem við vorum að forðast. Ég eins og fleiri er orðin afar viðkvæm fyrir miklum hávaða og geri eins og litlu börnin, þ.e. að grípa fyrir eyrun þegar þess gerist þörf :) Að síðustu vil ég taka fram að ég fékk lánaða myndina af Mugison hjá Ómari Boga, því ég var ekki með mína myndavél í þetta sinn, aldrei þessu vant :)

Þriðji jóladinnerinn á Öldunni í ár !

2011-12-14T04:41:00.001-08:00

Í gærkvöld fór ég með Rúnari mínum á jólahlaðborð sem áhöfn Gullvers og makar mættu á. Eins og venjulega var maturinn afskaplega góður og eins og stundum vill henda mann, þá borðar maður aðeins of mikið, sem getur gerst þegar of margt gott er í boði. Ég var því óvenju södd þegar heim var komið um miðnætti, en það sjatnaði furðu fljótt. En Rúnar át hinsvegar yfir sig og var enn saddur í morgun, það er örugglega ekki notalegt ....(?)

Upplestur á Bókasafninu

2011-12-12T14:34:00.000-08:00

Klukkan 17:15 í dag hófst upplestur 7. bekkinga Seyðisfjarðarskóla á Bókasafninu. Foreldrar og syskini mættu til að hlýða á sín börn/systkini og flest sæti því skipuð. Ég var búin að raða upp borðum og stólum, hita kaffi og kaupa piparkökur sem runnu út. Auk þess sem ég var búin að setja upp kertaljós og fleira jólaskraut til að lífga uppá umhverfið.
Þetta hefur verið árlegur viðburður í mörg ár og yfirleitt standa krakkarnir sig ágætlega og eru greinilega vel læs flestöll. Það er því eiginlega alveg synd hve flest þeirra virðast lítið fyrir að lesa allar þær góðu unglingabækur sem í boði eru. Ég hef talsvert velt fyrir mér hvaða ráð gæti dugað til að hvetja þau til meiri lesturs, en ekki ennþá dottið niður á neina einfalda lausn - því miður !

Aðventumessan 2011

2011-12-12T14:19:00.000-08:00

Sunnudaginn 11. desember söng ég með kirkjukórnum Aðventumessu í bláu kirkjunni okkar. En áður en til þess kom, þá mættum við öll upp á sjúkrahús og sungum allt prógrammið fyrir vistfólk og starfsfólk HSA, það var góð upphitun.
Messan gekk ljómandi vel og mér finnst alltaf mjög jólalegt og hátíðlegt þegar við syngjum svona skemmtileg jólalög sem við erum búin að æfa mánuðum saman. Í lok messunnar kveikja allir á kertum sem viðstaddir fá við inngöngu í kirkjuna og það er hátíðleg friðarstund.
Eftir messuna röltum við yfir á veitingahúsið Ölduna, þar sem hátíða- kvöldverður beið okkar og sátum þar í rólegheitum og spjöllum og hlógum heil ósköp m.a. yfir smá mistökum sem urðu þegar einn kórmeðlimur greip vitlausa gosflösku og sá mistökin of seint.
Þetta er í annað sinn á þessari aðventu sem ég borða jóladinner á Öldunni, en allt er þegar þrennt er og ég mæti því með áhöfn Gullvers á jólahlaðborð Öldunnar annað kvöld.

Jólakvöld Sáló !

2011-12-09T15:08:00.001-08:00

Í kvöld, föstudagskvöldið 9. des. var jólakvöld sáló haldið hátíðlegt í fundarsal Herðubreiðar og fjöldi manns mætti, meira að segja nokkrir Héraðsbúar sem drifu sig yfir heiðina, enda góð ókeypis skemmtun í boði með Þórhalli Guðmundssyni miðli. Hann sagði okkur nokkrar skemmtilegar sögur úr starfi sínu og var síðan með hlutskyggni og fleiri gamansamar lýsingar og leiðbeiningar til handa viðstöddum.
Síðan var boðið upp á veitingar, kaffi, gos, konfekt og piparkökur og ég persónulega borðaði nokkra góða Nóa konfektmola sem eru í sérstöku uppáhaldi hjá mér :)

Jólaferð norður til mömmu !

2011-12-05T05:09:00.000-08:00

Snemma að morgni 1. des.(afmælisdegi Rúnars) lagði ég af stað norður til mömmu í jólaheimsóknina, því ég sé ekki að ég komist aftur norður fyrir jól af ýmsum ástæðum. Veðrið var óvenju fallegt og sólroði m.a. á Jökuldals- heiðinni, þar sem ég sá sprettharðan mink á hlaupum við Gestreiðar- staðaána, rétt við veginn. Ég hef reyndar séð svona minka á hlaupum nokkuð oft, þó aldrei uppi á fjöllum fyrr en í þetta sinn.
Það var nýbúið að flytja blessaða mömmu úr Hvammi, heimili aldraðra yfir á öldrunardeild HÞ, þar sem hún deilir nú herbergi með Svövu frá Smjörhóli. Þeim kemur vel saman, en báðar voru þær ruglaðar yfir breytingunni og sögðust bara ekkert rata því allt væri orðið breytt.
En þær fá góða umönnun og eftirlit og vonandi venjast þær nýjum aðstæðum sem fyrst.
Það var ansi kuldalegt um að litast fyrir norðan og ég stoppaði þar ekki nema rúman sólarhring, en gat þó litið við hjá mínum góðu æskuvinkonum Sigrúnu og Villu og fleiri góðum vinum og ættingjum. Að lokum bar ég svo út öll jólakortin sem ég tók með mér til vina og vandamanna á Húsavík.
Vonandi verður þessi vetur bara góður þegar þessum kuldakafla lýkur, svo við getum skroppið sem oftast norður, sérstaklega mömmu vegna, á meðan hún þekkir okkur ennþá ! Heimferðin gekk líka vel þó veðrið væri að versna og þegar á Fjarðarheiðina kom var stórhríð og orðið illfært, svo að ég slapp með skrekkinn í þetta sinn síðasta spölinn...

Sjaldséðir flækingar !

2011-11-24T04:18:00.000-08:00

Það er misjafnt eftir árstíma og veðri hversu mikið af flækingsfuglum kemur hingað og hvort við sjáum þá eður ei. Fyrir ca. 3 vikum komu um borð í Gullver í sama túrnum bæði Hettusöngvari og Keldusvín og Rúnar náði myndum af þeim.
Tveim túrum síðar kom svo þessi fallega Brandugla um borð sem væntanlega er nú komin upp á Hérað með Gulla vélstjóra sem tók myndina af henni. Óvíst er um hvort hún lifir, því hún vildi ekkert éta þessa daga sem hún dvaldi um borð. Loks hafa svo verið hér 3 rússneskar (austrænar) Blesgæsir sem eru frekar sjaldséðar hér á landi. Þær hafa haldið til út við Dvergastein s.l. 2 vikur í félagsskap við Grágæsina sem er heimagangur þar á bæ. Ég fékk lánaða þessa mynd frá Gulla sem er betri en mínar myndir af gæsunum, enda vantar mig betri aðdráttarlinsu til að ná góðum myndum af fuglum. Góðum myndum af fuglum nær maður varla nema með góðum græjum :)

Myrkragangan 2011

2011-11-13T09:26:00.001-08:00

Við höfum haft það fyrir sið að mæta árlega í myrkragönguna sem ávallt er gengin í lok Daga myrkurs. Þá safnast fólk saman í gömlu vélsmiðjunni, þar sem fyrsta rafstöðin var sett og notuð hér í bænum fyrir rúmri öld síðan og er þar enn þó ekki sé hún lengur í notkun. Síðan voru öll götuljós slökkt í bænum og flestir slökktu einnig ljósin í húsunum, á meðan við gengum með luktir, kyndla og vasaljós í gegnum bæinn, með einu smá stoppi við gömlu bókabúðina, þar sem listrænn gjörningur var skoðaður. Síðan var haldið til bláu kirkjunnar þar sem allir sátu um stund og hlýddu á boðskap um birtu og frið. Eftir það fórum við heim, en veðrið var milt, stillt og gott, þó smá súld hafi sáldrast yfir okkur á leiðinni...

Dagar myrkurs !

2011-11-13T09:16:00.001-08:00

Dagar myrkurs sem er árlegur viðburður á þessum tíma á Austurlandi hefur nú staðið yfir í rúma viku, eða frá 3.-13. nóvember. Ýmislegt er í boði þessa daga, t.d. er Myrkragetraun í gangi hjá mér á Bókasafninu og þessir dagar eru sektarlausir, þannig að þeir sem komnir eru í vanskil geta skilað inn bókum án þess að fá sekt.
Ýmsir aðilar höfðu opnar vinnustofur um s.l. helgi, m.a. Garðar Eymundsson, en ég kíkti til hans að skoða nýjustu verkin hans. Einnig skrapp ég í Nóatún til að skoða handverk hjá danska hönnuðinum þar og til Helga og Þórunnar í gamla sjoppuskúrinn, þar sem þau hafa bækistöð fyrir þeirra handverk. Síðast fór ég svo í Skaftfell og sat þar og hlustaði á minningafrásagnir Seyðfirðinga sem verið er að safna saman. Þar kennir margra "grasa" :) Ég sat þarna í 1-2 tíma og prjónaði heila hespu á meðan, því engin nauðsyn er að horfa á upptökurnar, þar sem viðmælendur sitja allir á meðan þeir segja frá...
Ég mæli með því að fólk leggi þangað leið sína þegar tími gefst og velji sér frásagnaraðila ef þeir ekki vilja hlusta á allt saman :)

Breiðablik

2011-11-13T09:10:00.000-08:00

Gamla húsið "Breiðablik" sem var endurbyggt fyrir nokkuð mörgum árum, stóð á mjög lélegum kjallargrunni sem var smám saman að hrynja saman og á endanum tóku þeir Sunnuholtsbræður sig til og lyftu húsinu af kjallaranum, grófu upp allan grunninn og steyptu nýjan kjallara. Núna loksins eru þeir búnir að láta húsið síga aftur ofan á nýja kjallarann. Vonandi heppnast þessi aðgerð til frambúðar, svo að hægt verði að klára húsið og nota það eitthvað í framtíðinni, því alltaf er frekar vöntun á húsnæði heldur en hitt....

Fyrsti vetrardagur fyrir norðan !

2011-10-23T11:41:00.000-07:00

Við Rúnar skruppum norður til Húsavíkur á föstudagskvöldið eftir vinnu hjá mér. Það var auður vegur alla leiðina og gott færi, þó jörð væri víða orðin hvít á fjöllunum.
Fyrsti vetrardagur, laugardagurinn 22. okt. heilsaði með frosti, svo ég þurfti að skafa bílrúðurnar áður en ég skrapp í heimsókn til mömmu upp í Hvamm, en veðrið var annars stillt og bjart og snjólaust, þó sjór væri reyndar nokkuð úfinn. Vonandi verður veturinn eitthvað líkur þessum fyrsta degi, þ.e. frekar stillt veður og snjólaust. Í síðustu viku dreymdi mig nokkrar rjúpur og voru þær allar í sumarlitunum, sem fær mig til að trúa því að veturinn framundan verði líklega snjóléttur. Ég brá mér með myndavélina niður að höfn eins og við gerum svo oft og tók nokkrar myndir, m.a. af brosmilda turninum sem aldrei setur upp fýlusvip sama hvernig viðrar :)Ég er hinsvegar enn að velta vöngum yfir nafninu GARÐARSHÓLMUR sem ég hélt að ætti að vera GarðarsHÓLMI, en kannski getur einhver útskýrt þessa skrítnu beygingu fyrir mér ? Við buðum Gulla frænda í kvöldmat og áttum síðan yndæla kvöldstund hjá Önnu Mæju og Sigga. Í morgun (sunnudag) var komin slyddurigning og Húsavíkurfjall orðið gráhvítt. Við drifum okkur því af stað austur eftir hádegið og ókum í krapasnjó og slabbi alla leið frá Hólasandi og austur á Jökuldal. Stundum var svo alhvítt að ekki sá á dökkan díl og eina sem hafði annan lit, voru gulu vegstikurnar sem eru ómetanlegar á vegum landsins.

Heimferðin !

2011-10-15T16:13:00.001-07:00

Á heimleiðinni þurftum við aftur að millilenda í Frankfurt og gista eina nótt, áður en við komumst í flugvél Icelandair, Surtsey, til að komast aftur heim til Íslands. Við borðuðum öll kvöldin í Frankfurt á sama veitingahúsinu og gistum aftur á sama hóteli, við hliðina á háværu lestunum. Við snæddum morgunverð á hótelinu þennan síðasta morgunn, en síðan tók við bið eftir rútunni og lengri bið á flugvellinum, því seinkunn varð á komu vélarinnar. Vigdís Finnbogad. fv. forseti var samferða okkur á heimleiðinni, því hún var að koma af bókamessunni sem var ný hafin í borginni einmitt þessa daga, þar sem Ísland var í heiðurssæti.
Þessi seinkunn varð til þess að við lentum í Keflavík á síðustu stundu til að geta komist með rútunni á flugvöllinn í Reykjavík til að ná fluginu austur sem við áttum pantað. Það tókst og þeir áhafnarmeðlimir sem fara áttu út á sjó um miðnættið, komust leiðar sinnar og ég sömuleiðis heim um leið, en Rúnar varð eftir fyrir sunnan og keyrði austur á bíl dóttur okkar sem verður hér til sölu á næstunni....

Kveðjuveislan

2011-10-15T15:39:00.000-07:00

Gríska stafrófið er eiginlega svolítið svipað og það rússneska. Nokkrir stafir eru þeir sömu í báðum tilvikum eins og V sem er á hvolfi en táknar L og D sem er eins og þríhyrningur eða pýramídi. Þó ég hafi reynt að skilja þetta stafróf, þá vafðist það mikið fyrir mér, en Rúnar hinsvegar kann öll sér-grísku táknin, því þau eru líka notuð í stærðfræði, allt frá Alfa, beta, delta, gamma og til síðasta stafsins Omega. Hann vissi t.d. að Sigma er táknið fyrir S sem vantar í þeirra stafróf.
En svo ég víki að öðru, þá var síðasta kvöldið í Grikklandi helgað kveðjustund, þar sem einn skipverja er hættur störfum fyrir aldurs sakir, þ.e. Jón Grétar Vigfússon, sem áratugum saman hefur verið á sjó. Við snæddum fínan kvöldverð saman og sögur voru sagðar af ýmsum atvikum frá fyrri árum. Að lokum söng hún Sigga einsöng með geysilega sterkri röddu og við nokkrar eiginkonur skipverja sungum undir með henni. Þetta var vel lukkað kvöld og allir skemmtu sér hóflega og starfsfólkið virtist líka hafa gaman af að taka þátt í fjörinu með okkur :)

Uppskerutími ávaxta....!

2011-10-15T14:49:00.000-07:00

Í svona suðlægu landi er auðvelt að rækta alls konar ávexti og grænmeti. Næstum því í hverjum garði mátti sjá einhver ávaxtatré eða berjarunna og var ekki laust við að mann langaði að fara að tína mandarínur, sítrónur, lime, vínber, granatepli, tómata, hindber og fleiri berjategundir sem ég þekki ekki fyrir víst. Falleg blómstrandi garðablóm voru enn í blóma, en sum þeirra lifa varla af hér á landi, þó þau séu höfð innan dyra við gott atlæti.
Hér heima erum við að berjast við að rækta hindber og jarðarber með sæmilegum árangri ef vel viðrar, en lítið þýðir að rækta suðrænni plöntur nema í gróðurhúsum, það er mín reynsla að minnsta kosti, því miður....!

Ævintýri á gönguför...!!!

2011-10-15T14:38:00.001-07:00

Úr sól og blíðu í rok og rigningu.
Næst síðustu nóttina okkar í Pefkohori fór að hellirigna og því fylgdi rok, þrumur og eldingar sem héldust fram á morgunn. Við tókum deginum rólega, fórum í góðan göngutúr og kíktum í búðir og þegar við gengum út úr einni þeirra, þá biðu 2 stórir hundar fyrir utan og hófu að fylgja okkur þétt eftir, hvert sem við fórum. Þegar við gengum næst inn í verslun, þá ætluðu þeir inn með okkur en voru reknir út af afgreiðslufólkinu. En þegar við snerum út aftur, lágu þeir bara rólegir og biðu okkar og héldu eftirförinni áfram. Nokkrir fleiri hundar slógust í hópinn um stund og þeir tóku upp á því að pissa á vínberjakassa sem staðsettir voru utan dyra við verslun eina í of lítilli hæð til að fá frið fyrir þeim, eins og sjá má á meðfylgjandi mynd. Að lokum þegar við gengum heim á hótelið, fylgdi einn hundurinn okkur heim að dyrum. Við fréttum síðan að talsvert væri um útigangshunda og ketti þarna, enda sáust þeir víða en virtust ekki illa haldnir og geltu ekki eða ógnuðu á nokkurn hátt. Þeir nusuðu bara af okkur og nudduðu sér utan í buxurnar okkar eins og kettir gera svo gjarnan.

Fjölbreytt dýralíf...

2011-10-15T14:13:00.001-07:00

Eitt af því fyrsta sem maður tók eftir þegar við komum til Grikklands, var fjölbreytt smádýralíf, enda fengu flestir að kenna á flugnabitum, mismikið að vísu. En fleira mátti sjá en flugur, m.a. varð allt morandi í froskum þegar fór að rigna og þá urðu þúsundfætlur líka mjög áberandi. Hinsvegar sáum við bara engisprettur, bænabeiður og bjöllur á meðan sólin skein. Stór fiðrildi voru líka á sveimi, en það er mjög erfitt að ná myndum af þeim, svo ég læt nægja þessar fáu myndir sem hér fylgja með. Það eina sem við kærðum okkur EKKI um að sjá eða mæta var eiturslanga. Sú ósk rættist, enda eru sennilega engar slöngur á ferðinni þegar svo langt er liðið á haustið. En mikið var líka af fuglum, stórum og smáum og t.d. sáum við svöluhreiður á gangveggnum við herbergið okkar. Það er eins og hálf leirskál sem límd er við vegginn.... eins og sjá má á meðfylgjandi mynd...

Thessaloniki höfuðborg Makedóníu

2011-10-15T13:45:00.000-07:00

Einn daginn skruppum við í síðdegisferð til gömlu höfuðborgarinnar Þessaloniki. Þar skoðuðum við m.a. það sem ennþá stendur uppi af gömlu borgarmúrunum en þar fór fram myndataka af uppáklæddum brúðhjónum. Við skoðuðum líka eina fallega kirkju, auk fleiri sérstakra staða í miðborginni. Þarna í miðbænum mátti líka sjá glerpýramída sem glóði í bláu ljósi og á honum var lítil hurð sem hægt var að skríða inn um. Örugglega eitthvað sérstakt ???
Enginn tími var fyrir verslun og viðskipti, enda ferðin ekki farin í þeim tilgangi. Önnur ferð var farin síðar til innkaupa, en við kusum að sleppa henni og vera í rólegheitum í Pefkohori, þar sem við reyndar versluðum heilmikið af jólagjöfum og fleiru.
Hópurinn fór líka í stutta kvöldsiglingu um höfnina áður en við snæddum margréttaðan kvöldverð þar sem matsalurinn var fullur af heimamönnum sem voru að skemmta sér, líklega í afmælisveislu eða annað álíka og hljómsveitin spilaði þjóðlega tónlist,sem var svo hávær að á endanum flúðum við öll út og ákváðum að flýta för okkar heim í stað þess að taka þátt í gleðskapnum...

Pefkohori í Grikklandi

2011-10-15T13:10:00.001-07:00

Þegar við komum til sjávarbæjarins Pefkohori á suðurhluta Kassandra- skagans sem tilheyrir Makedóníu, nyrsta hluta Grikklands, þá var heiðskýr himin og glaða sól, svo að flestir lögðust í sólbað og nutu blíðunnar næstu 2 daga til viðbótar. Reyndar höfðu þá flestir fengið sér göngutúra um bæinn og sumir höfðu leigt sér reiðhjól eða mótorhjól til að geta skoðað sem mest af nágrenninu. Sjálf leigðum við okkur fjórhjól og fórum ásamt nokkrum öðrum í skoðunarferðir, tvær hringferðir um skagann. Þá sáum við fjölmörg býflugnabú meðfram veginum og komum síðan í sjávarþorp þar sem við hittum fleiri samferðafélaga okkar og fengum okkur smá næringu saman. Við heimkomuna á hótelið síðdegis var orðið býsna svalt, enda farið að hvessa og sá ekki lengur til sólar... En hótelið var mjög glæsilegt og starfsfólk sérstaklega almennilegt og hjálpsamt og margt hægt að segja um það, eins og t.d. að hótelstýran Jóhanna bjó lengi á Íslandi og skilur íslensku, þó hún kysi að ræða við okkur á ensku. En eldri sonur hennar er einmitt við nám á Íslandi um þessar mundir :)

Frankfurt

2011-10-14T17:27:00.001-07:00

Þriðjudaginn 4. okt. lögðum við af stað til Frankfurt, 42 manna hópur, þ.e. áhöfn Gullvers og eigendur og makar. Allt gekk samkvæmt áætlun til að byrja með, við gistum þar eina nótt og áttum síðan að halda áfram til Grikklands, en þá var komið verkfall þar, svo við vorum strandaglópar einn dag, áður en við gátum haldið af stað. En þessa 2 daga í borginni notuðum við vel. Veðrið var líka gott og við gátum skoðað okkur um, auk þess sem haustútsölur voru í flestum verslunum og því óvenju hagstætt að kaupa ýmislegt eins og fatnað og skó í H&M og C&A.
Ég ætlaði ekki að versla neitt, en gat svo ekki sleppt því þegar ég rakst á ýmislegt sem ég gat notað sem jólagjafir, auk fatnaðar sem kom sér vel. Hótelið sem við gistum á var staðsett nokkra metra frá járnbrautinni, þar sem gríðarlangar flutningalestir voru á ferð allan sólarhringinn með skröltandi vagna, svo flestir urðu fyrir ónæði á næturnar. Að öðru leyti var allt gott að segja um veru okkar í borginni og það munaði litlu að við gætum kíkt á bókastefnuna, þar sem Íslendingar voru heiðursgestir.

Frænkuhittingur !

2011-10-02T12:44:00.000-07:00

Fyrir nokkrum árum þegar ég var í fjarnámi og þurfti að mæta til Rvk. mánaðarlega, þá fórum við frænkurnar í föðurætt að hittast þegar færi gafst. En þar sem tvær okkar búa úti á landi, þá þurfum við að láta hinar vita þegar við komum í bæinn til að kanna hvort hinar hafi tíma til að hittast t.d. í brunch á einhverju veitingahúsi. Ég hef reynt að koma því svo fyrir að geta eytt tíma með þeim a.m.k. einu sinni á ári. Í þetta sinn vorum við 8 sem gátum mætt og hittumst á Nauthól og nutum þar góðra veitinga og höfðum svo margt að spjalla, að við hefðum þurft a.m.k. að sitja helmingi lengur en við gerðum. Það er því spurning hvenær næsti hittingur verður ?

Haustroði 2011

2011-10-02T11:56:00.000-07:00

Laugardaginn 1. okt. var hin árlega skemmtun Haustroði á Seyðisfirði. Þá komu saman allir þeir sem höfðu eitthvað að selja og settu upp markað, með matvæli jafnt sem notuð föt, bækur, DVD myndir og annað sem fólk hefur ekki þörf fyrir. Þarna var fjöldi manns, bæði að selja og skoða og kaupa og nokkuð mikið var um aðkomufólk frá nágranna-sveitarfélögunum sem greinilega kunnu að meta þessa uppákomu. Einnig var samkeppni í gangi um bestu heimatilbúnu sultu haustsins og var það Anna Kristín Jóhannsdóttir sem fékk aðalverðlaunin fyrir blandaða sultu, en einnig fengu verðlaun þær Guðlaug Vigfúsdóttir og Sigríður Þ. Sigurðard. fyrir rabbarbara og krækiberjasultur eða hlaup. Sjálf setti ég inn blandaða sultu en vann ekki verðlaun að þessu sinni, enda búin að fá minn skerf, því ég vann í hittifyrra fyrstu verðlaun fyrir sólberjasultuna mína. Hinsvegar sendi ég inn 2 myndir í ljósmyndakeppnina fyrir okkur Rúnar bæði og myndin sem ég sendi fyrir Rúnar fékk 2 verðlaun (hvíta rós) en Einar Bragi fékk fyrstu verðlaun fyrir sína mynd (flugferð til Rvk). Bæjarbúar kusu bestu myndina og voru það nokkuð margar myndir sem hægt var að velja um.
Að lokum skal þess getið að þennan sama dag fór lítill hópur fólks gangandi upp á Fjarðarheiði til að minna á nauðsyn þess að fá jarðgöng og hafi þau þökk fyrir dugnaðinn og viljann í þessari erfiðu baráttu....

Humarveisla !

2011-09-25T04:04:00.001-07:00

Humar er með því betra sem ég fæ og ég varð því harla glöð þegar Binna frænka Rúnars og Maggi buðu til humarveislu (m.a. í tilefni af afmæli Binnu þann 17. sept. s.l.)
Maggi sá um að grilla humarinn en Binna sá um restina og við Rúnar ásamt tveim öðrum gestum nutum góðs af veislumatnum. Svo var þetta toppað með dýrindis eftirrétti sem setti punktinn yfir Iið :)

Skrítnar gulrætur !

2011-09-25T03:45:00.000-07:00

Síðastliðin fjögur sumur hef ég ræktað gulrætur með ágætis árangri. Ég þakka það fyrst og fremst góðum fræjum sem ég hef fengið frá góðri skólasystur sem er garðyrkjubóndi.
Í fyrsta sinn í vor sáði ég fyrir annarri tegund samhliða, með því að forrækta þær innan dyra vegna slæms veðurfars. Það tókst raunar vonum framar, en einhverra hluta vegna hef ég fengið nokkrar öðruvísi gulrætur að þessu sinni og velti fyrir mér hvort að bogna gulrótin hafi lent á steini og orðið að sveigja af leið ? Sama gildir um þær sem eru svona svakalega digrar og stuttar, hvað ætli hafi valdið því, enda virðast gulræturnar allt um kring vera af venjulegri stærð, bæði í lengd og breidd eins og sjá má.... :)
Ég ætla nú samt ekki að gefast upp við þessa ræktun, því alltaf má gera betur og það er þess virði, því mér finnst frábært að geta farið út í garð og náð mér í ferskar gulrætur beint úr moldinni og naga þær á morgnana. Það er líka hollara en flest annað held ég :))
Er ekki vísan góða eitthvað á þessa leið ;

En gott er að borða gulrótina,
grófa brauðið, steinseljuna,
krækiber og kartöflur
og kálblöð og tómata.

Þá fá allir mettan maga,
menn þá verða alla daga
eins og lömbin ung í haga,
laus við slen og leti.
????????????????

Uppskeran 2011

2011-09-25T03:36:00.001-07:00

Á síðasta sunnudag var óvenju gott veður, svo við notuðum tækifærið og tókum upp kartöflurnar hér heima í garðinum. Ég setti ekki mikið niður, enda plássið ekki mikið, en ég setti niður í byrjun maí og breyddi plast yfir, sem kom sér vel þegar vorhretin skullu á. En uppskeran er bara prýðileg miðað við veðrið sem verið hefur í sumar. Það hefur líka skipt máli að fjarlægðar voru 4 skuggsælar aspir sem skyggðu á garðinn meiripart dagsins.
Ég er hrifnust af íslenskum rauðum kartöflum, þó ég borði reyndar lítið af þeim, þar sem kartöflur valda mér slæmri líðan í öllum liðamótum. En einnig hef ég ræktað svolítið af fjólubláum kartöflum sem ég fékk hjá pabba og svo gullauga sem alltaf stendur fyrir sínu.

Haustgleði í Skálanesi

2011-09-19T02:19:00.000-07:00

Starfsmannafélag Seyðisfjarðar kaupstaðar stóð fyrir haustgleði í Skálanesi s.l. laugardag. Því miður komumst við ekki strax með hópnum, þar sem Rúnar var staddur í Rvk og misstum fyrir vikið af ýmsu, m.a. heimsókn í býflugnabúið. En náðum því að sjá Sigga Ormar gefa svínunum bjór o.fl. o.fl... :)
En við mættum á svæðið um kaffileitið og fengum heimabakaðar kökur og kex + salöt.
Svo skemmtum við okkur vel í hressum hópi þeirra sem mættu, en það voru reyndar ekki nema 32 sem sáu sér fært að vera með. Við fórum m.a. í skemmtilegan látbragðsleik þar sem kennarar notuðu táknmál með tali, sem við hin kunnum ekki, en ég hef hugsað mér að ráða bót á því :)
Loks snæddum við grillað lambakjöt m.m. og nutum sólarlagsins sem var einstaklega fallegt að þessu sinni- eins og sjá má :))

Dagstund í Helsinki

2011-09-16T17:14:00.001-07:00

Við komuna til Helsinki var orðið bjart en á leiðinni höfðum við ekið að mestu í myrkri, roki og rigningu, en nú stytti upp og sá til sólar okkur til ánægju.
Við ókum framhjá mörgum helstu byggingum borgarinnar, sendiráðum, óperu, þjóðminjasafni, tónlistarhöll, kirkjum og fleira má til nefna. En hér sýni ég aðeins Stóru kirkjuna eins og hún er nefnd. Hún stendur við borgartorgið og svo Klettakirkjuna frægu sem hefur einstakan hljómburð og er mjög vinsæl hjá kórum sem sækja hana gjarnan heim og syngja þar innan dyra.
Það var óvænt gaman að fá tækifæri til að skoða sig aðeins um þarna, þó stutt væri.

Brottfarardagur og það sem gleymdist !

2011-09-16T17:01:00.000-07:00

Ég gleymdi að geta þess að við fórum í enn eina gullfallega kirkju sem nefnd er Ísakskirkja, þar sáum við ættartré allrar Romanof ættarinnar og myndir af flestum meðlimum hennar. Katrín mikla og Pétur mikli eru einna frægust þeirra. Þar fengum við að hlýða á lítinn hóp karlmanna syngja nokkur rússnesk lög og gerðu þeir það vel.
Allan tímann sem við dvöldum á hótel Moskvu stóðu límosínur utan dyra og settu svip á umhverfið.
Á siglingunni sáum við "ljótasta" húsið í borginni, en P.Ó. sagði okkur að þetta hús hefði áður verið í eigu Björgúlfsfeðga, á meðan þeir voru með starfsemi þarna í borginni.
Þennan morgun lögðum við af stað um kl. 5 að morgni að staðartíma en það er 4 tíma mismunur á milli Íslands og Pétursborgar og það reyndist hafa ýmsar aukaverkanir, eins og svefnleysi og fleira. Við ókum síðan sem leið lá aftur að landamærum Finnlands og Rússlands og vorum komin þangað á undan öðrum rútum, en það var markmið P.Ó. að lenda ekki í langri biðröð bíla á landamærunum, það hefði getað þýtt að við yrðum of sein í flugið í Helsinki. En fyrir vikið vorum við svo langt á undan áætlun að við gátum staldrað við í höfuðborg Finnlands og skoðað miðborgina þar ásamt fleiru og segir frá því í lokaþætti þessarar ferðar....

Síðasti dagurinn í Pétursborg

2011-09-16T16:46:00.001-07:00

Engar skipulagðar ferðir voru þennan síðasta dag okkur í borginni og notuðum við hann til að rölta um miðborgina og fara í siglingu um sýkin sem eru um alla borgina, enda er hún sögð byggð á 42 eyjum í óshólmum árinnar og var því mjög erfitt byggingarsvæði.
Þetta var svalasti dagurinn í borginni og um kvöldið vorum við orðin nokkuð þreytt eftir margra kílómetra rölt allan daginn.
En það var margt og mikið sem vakti athygli okkar og aðeins hægt að stikla á stóru í frásögum af því. En íbúar borgarinnar virðast almennt vel klæddir, snyrtilegir og vel haldnir, auk þess sem alls staðar var mikið af fólki í verslunum og nóg af vörum af öllu tagi. Það virðist því vera upp runninn gósentími á þessum slóðum og aðeins fáir betlarar voru sýnilegir á almannafæri.
Allar götur voru líka mjög hreinar og fólk á ferðinni við að sópa upp smá rusli og ekki sáum við tyggigúmmí- klessur á gangstéttum og götum eins og hér heima, en í staðinn voru næstum allir með sígarettur í höndum og það er sannarlega ekki til fyrirmyndar....
Eitt var líka mjög áberandi, það var allt kvenfólkið sem gekk um á skelfilega háum hælum, ekki líkt því sem við erum vön hér heima. Ég fann eiginlega til með þeim að rembast við að ganga á þessum "stultum" og gat ekki stillt mig um að laumast til að taka myndir af fáeinum slíkum skóm á förnum vegi :)

900 daga umsátrið um Leningrad

2011-09-16T16:32:00.000-07:00

Ég gleymdi að geta þess að áður en við yfirgáfum Pétursborg áleiðis til Petershof, þá fórum við og skoðuðum glæsilegt minnismerki um 900 daga umsátur Nasista um Leningrad (eins og borgin hét á þeim tíma) í síðari heimsstyrjöldinni. Þá gerði maður sé lauslega grein fyrir hve erfitt hefur verið fyrir borgarbúa að þrauka svo langan tíma við ómannúðlegar aðstæður. Jafnvel Íslendingar sem höfðu það skítt, voru þó betur settir. Það er áhrifamikið að sjá öll 900 ljósin sem sett hafa verið upp í byggingunni til minningar um þessar hörmungar og rússneska stafrófið flæktist dálítið fyrir okkur, þó hægt væri að skilja það sem stendur á þessum myndum, þ.e. 900 dagar og 900 nætur.
Sagan af tilurð rússneska stafrófsins er nokkuð skemmtileg. Sendimaður fór víst til Rómar til að ná í sýnishorn af nýja stafrófinu á sínum tíma, en á leiðinni heim missti hann kassann með stöfunum, sem allir hrundu í sundur, svo hann varð að pússla þeim aftur saman eftir minni og útkoman varð sú sem við sjáum í dag, skrítin blanda af okkar stafrófi, sem búið er að hvolfa og spegla á ýmsa vegu :)

Sumarhöllin Petershof og Pushkin

2011-09-16T16:17:00.000-07:00

Á mánudagsmorgni er við vorum að leggja af stað frá hótelinu sáum við að búið var að skreyta umhverfið með borðum og blómum og fengum að vita að Margrét danadrottning væri væntanleg í heimsókn. Við misstum því miður af þeim viðburði, þar sem við eyddum deginum að mestu leyti í Petershof, einni af sumarhöllum keisaranna, skammt utan við Petersborg. Þar eru miklir og fallegir garðar í kringum höllina og gullfallegir gosbrunnar, auk þess sem höllin sjálf, kirkjan og aðrar viðbyggingar eru stórglæsilegar og vel upp gerðar. Þarna var markaður sem reyndist helmingi ódýrari en í borginni og því lét ég það eftir mér að kaupa nokkrar gjafir áður en haldið var aftur heim á leið. En á heimleiðinni fórum við til bæjarins Pushkin, þar sem við snæddum þjóðlegan kvöldverð og fengum ágætis rússneska skemmtun á meðan, söng og tónlist og áttum þarna yndæla stund saman við þetta fallega vatn sem ótal hallir liggja að. Á heimleiðinni ókum við eftir nýrri og glæsilegri hringbraut sem nýlega var byggð umhverfis Pétursborg og mun hafa kostað nokkra milljarða króna.

11. september 2011

2011-09-16T15:58:00.000-07:00

Í dag fórum við í Vetrarhöllina sem er örugglega stærsta höll og safn sem við höfum komið í. Það er leikur einn að villast þar og þrátt fyrir góðan vilja, þá vorum við flest búin að fá nóg eftir 2-3 tíma göngu um ganga og sali hallarinnar sem er full af alls konar listaverkum frá flestum löndum heims. Meira að segja er til einn hlutur þar frá Íslandi, en hann er víst reyndar orðinn svo illa farinn að hann er ekki lengur hafður til sýnis. Hinsvegar eru þarna nokkrar gullfallegar styttur eftir danska Skagfirðinginn Thorvaldsen sem kemst næst því að vera Íslendingur af þeim sem þarna eiga verk til sýnis.
Pétur Óli hafði allann tímann með sér innfæddan leiðsögumann (Kötu) sem talar ensku og þau skiptu hópnum oft í tvennt til að auðvelda aðgengi að því sem var í boði og til að við heyrðum betur til þeirra. Eftir þessa skoðunarferð í höllina var ekið að markaðnum sem stendur rétt við hina gullfallegu blóðkirkju og þar fórum við úr bílnum. Við kíktum bæði á markaðinn og kirkjuna en gengum síðan áleiðis að hótelinu okkar með viðkomu í stóra nýja verslunarhúsinu Galleri sem er eins og margar Kringlur að stærð. Þar keyptum við eitthvað smávegis af gjöfum og fengum okkur að borða á Fridays en röltum loks heim þessa 3 kílómetra sem eftir voru af verslunargötunni...

Kvöldsýning og kirkjugarðar

2011-09-16T15:42:00.000-07:00

Eftir að borgarferðinni lauk, þá röltum við yfir götuna við hótelið og skoðuðum þar 2 kirkjugarða, þar sem margir þekktir einstaklingar hvíla, m.a. heimsþekkt tónskáld. Til hægðarauka var víða hægt að rata á rétta legsteina, þar sem vegvísar á ensku vísuðu leið. En legsteinarnir voru margir mjög furðulegir og aðrir stórir og glæsilegir. Um kvöldið var farið á rússneska söng-dans og tónlistarsýningu í Nikulásarhöllinni. Þar komu fram hópar af fólki í litskrúðugum búningum og sýndu listir sínar. Að öllum ólöstuðum, þá var einn þeirra áhugaverðastur, en hann var klæddur í búning sem leit út eins og tveir litlir eskimóar í faðmlögum. Það var algjör snilld að sjá hve lipur hann var að standa til skiptis á höndum eða fótum. Í hléinu var boðið uppá kampavín og snittur og það verður að segjast eins og er, að aldrei hef ég séð mat hverfa jafn fljótt af borðum, það var engu líkara en að engisprettufaraldur hefði átt leið þarna um :)
Þegar myndir vilja ekki birtast eins og hér gerist, smellið þá bara á auða svæðið þar sem myndin á að vera og hún birtist - einnig er hægt að skoða allar myndirnar í stækkaðri útgátu með því að smella á hverja og eina :)

Borgin skoðuð !

2011-09-16T14:52:00.000-07:00

Fyrsta daginn var lagt af stað í borgarferð, ekið um helstu götur miðborgarinnar þar sem glæsilegar byggingar blasa við allsstaðar. Mikið af þeim hafa verið endurbyggðar eða lagfærðar á síðustu árum og engin háhýsi eru í miðborginni, því reglugerð segir til um að engin hús þar megi vera hærri en Vetrahöllin. Auk þess má ekki rífa nein gömul eða illa farin hús og byggja nýtísku hús í stað þeirra, heldur verða menn að byggja alveg eins hús og það sem fyrir var, ef þeir ekki geta gert upp það gamla. Það má segja að vegna þessa haldi borgin ætíð fyrri glæsileika.
Síðan var farið út í eyju sem umgirt er rammgerðu virki utanum kirkju Péturs og Páls þar sem allt keisaraliðið af Romanoff-ættinni hvílir. Þessi kirkja er óvenju glæsileg innandyra og margt að skoða. Við hlið kirkjunnar má sjá afar sérstaka styttu af Pétri mikla sem var víst rúmir 2 metrar á hæð, langur og grannur og með óvenju lítið höfuð. Þessi stytta var lengi í ónáð, en hefur nú fengið uppreisn æru og er mjög ólík annarri opinberri styttu af sama manni sem sjá má hér til samanburðar. Margar fleiri byggingar eru þarna innan virkisveggjanna en við héldum áfram för eftir smá rölt um svæðið, þó töf yrði nokkur vegna kvennahlaups sem átti leið framhjá brúnni út í eyjuna sem stöðvaði alla umferð a.m.k. í hálftíma.
Þess má geta að sá þjóðlegi matur sem ég borðaði í þessum ferðum var bragðgóður og ekki sterkur. Ég hef smakkað bæði bragðlausa þjóðlega rétti og alltof sterka á ferðalögum erlendis og gef því Rússum plús enn einn plúsinn fyrir þessa frammistöðu.
Eina regnið sem kom þessa daga að degi til, helltist yfir á meðan við snæddum málsverð innandyra, svo að regnhlífar sem fylgdu okkar alla dagana voru aldrei opnaðar, sem betur fer. En áður en demban kom, þá voru þarna í skjóli við virkisvegginn fólk í sólbaði eins og meðfylgjandi mynd sýnir :)

Fróðleiksför til St. Pétursborgar

2011-09-16T14:23:00.001-07:00

Síðastliðinn föstudag fórum við Rúnar ásamt 30 öðrum farþegum með Icelandair til Helsinki í Finnlandi og þaðan með rútu til St. Pétursborgar í Rússlandi. Það var Pétur Óli Pétursson fararstjóri sem tók á móti okkur og stjórnaði röggsamlega öllum okkar ferðum næstu dagana. Hann hefur greinilega mikla skipulagshæfileika sem koma sér vel gegn rússneska skrifræðinu. Hann er líka ótrúlega sögufróður og áhugasamur um menningu Rússlands og Finnlands og óspar á upplýsingar um land og þjóð. Við gistum á ágætu hóteli (Moscow)sem byggt var fyrir ólympíuleikana og er það vel staðsett, svo flestar helstu byggingar og verslanir borgarinnar eru í göngufæri þaðan. Flestir ferðalangarnir fóru í allar skoðunarferðir sem í boði voru svo að hópurinn hristist vel saman og allir skemmtu sér hið besta. Margt kom á óvart og erfitt að velja og hafna hvað sé mest í frásögur færandi, en líklega þó það, að Rússar eru örugglega núna betur settir fjárhagslega en þeir hafa verið áður og sést það best á fatnaði, bílaeign og öllum þeim miklu framkvæmdum sem eru í gangi hjá þeim, eins og viðgerðir gamalla bygginga, gríðarmiklar samgöngubætur og ótal margt fleira sem sjá má á förnum vegi. Ég er að hugsa um að setja hér inn nokkrar myndir úr ferðinni og skrifa viðeigandi texta með þeim. Þetta verða því trúlega nokkrar stakar færslur. Meðfylgjandi myndir eru í fyrsta lagi af okkur og 3 samferðakonum okkar sem við vorum mest með þessa dagana, svo er það Pétur Óli og spilaklúbburinn og síðast en ekki síst mestur hluti hópsins sem var meira og minna saman á ferðinni flesta dagana...

Uppskerustörfin...

2011-09-04T12:43:00.001-07:00

Haustið er sá árstími þar sem uppskerustörfin eru tímafrek. Mér finnst það tilheyra að tína ber, safta og sulta og rækta kartöflur og grænmeti og nýta gjafir náttúrunnar eins og kostur er. Þrátt fyrir sólarlítið og þokusamt sumar, þá er uppskeran orðin nokkuð góð. Ég er búin að safta í yfir 20 flöskur af krækiberjasaft, en nóg er af þeim hér, þó skortur sé hinsvegar á bláberjum í þetta sinn. Rifsberin hafa hinsvegar vaxið vel og eru orðin rauð og fín. Ég sultaði úr 2 kg. í gær og stefni á að fara með eina krús í sultukeppni Haustroða þegar þar að kemur. Ég er líka búin að þurrka og setja kryddjurtir í margar krúsir og safna sveppum auk þess sem ég rækta bæði kartöflur, gulrætur, graslauk, salöt/kál og jarðarber, auk kryddjurta o.fl. sem kemur sér vel að hafa við bæjardyrnar. Síðast en ekki síst þá er ég með tvær paprikuplöntur í eldhúsglugganum og vænti þess að fá nokkur stykki af þeim áður en vetur gengur í garð. :)

Jarðstraumamælingar

2011-09-04T12:26:00.001-07:00

23. ágúst s.l. kom til okkar Bryndís Pétursdóttir jarðstrauma- könnuður, til að mæla nokkur hús í bænum, þar sem íbúar þeirra hafa verið að stríða við langvarandi kvef og pestir. Þau voru nokkuð viss um að slæm áhrif frá nærstaddri spennistöð gæti verið ástæðan.
Við ákváðum að láta mæla okkar hús, þó ekki hafi neinn krankleiki hrjáð okkur lengi og tókum að okkur að hýsa Bryndísi, því nóg er plássið hjá okkur.
Það vildi svo skemmtilega til að við Bryndís þekkjum marga sameiginlega, enda er hún búsett norðan heiða á meðal góðra vina minna. Auk þess eigum við nokkur sömu áhugamál og höfðum því nóg að spjalla.
Niðurstaðan hjá okkur var góð og engar slæmar jarðlínur að trufla okkur en það voru ekki allir jafn heppnir með sitt húsnæði og sumir þurfa að gera einhverjar breytingar.
Þess má geta að gerð var kvikmyndin "MÓTVÆGI" um þetta starf Bryndísar og verður hún sýnd í Rvk. á næstunni. Hér má sjá smá sýnishorn (trailer) úr myndinni; http://vimeo.com/28351577 OG http://vimeo.com/28348647
fyrir þá sem áhuga hafa...

Húsavík enn og aftur !

2011-08-28T12:22:00.000-07:00

Ég dreif mig norður til mömmu s.l. föstudag og var ein á ferð. Ég sá fram á að ef ég færi ekki þessa helgi, þá yrði trúlega nokkuð langt á milli heimsókna minna til hennar, þar sem við erum fljótlega á förum til St. Pétursborgar.
Ég kom ýmsu í verk, tók upp svolítið af kartöflum og sló lóðina, auk þess að hitta marga ættingja og vini, en eyddi mestum tíma með minni góðu vinkonu Sigrúnu og snæddum við til skiptis hvor hjá annarri þessa daga og spjölluðum mikið. Ég fór hefðbundinn rúnt með mömmu og tók myndir af FJALLINU GRÆNA, sem við annars köllum Húsavíkurfjall, en lúpínan er að verða búin að þekja hana svo algjörlega að brátt verður fjallið alveg grænt. Ég fór meira að segja niður í Helguskúr með fullan poka af derhúfum í húfusafnið hans Helga og skrapp svo í berjamó, en þar sem lúpínan er að verða búin að eyðileggja allann berjamó á Húsavík, þá fann ég aðeins lítinn blett upp undir Botnsvatni, þar sem ennþá mátti finna svolítið af bláberjum og aðalbláberjum. Heimferðin gekk líka vel, enda veðrið ljómandi gott og ég tók upp puttaling við Grímsstaðabrúna, unga stúlku frá Cananda sem var á leið til Seyðisfjarðar, svo hún komst alla leið fyrr en hún þorði að vona :)

Grillhátíðin 2011

2011-08-24T07:08:00.000-07:00

Okkar árlegu bæjar-grillhátíð var frestað um viku vegna leiðinda veðurs um þar síðustu helgi, en svo birti til og föstudaginn 19. ágúst tóku bæjarbúar höndum saman um að gera daginn sem bestan, skreyttu hús sín að vanda og hvert hverfi sá um að skreyta sitt grillsvæði. Síðan var gengið í skrúðgöngu á skemmtisvæðið á grunni skólans sem enn hefur ekki verið byggður, þó áratugir séu síðan byrjað var á honum.
Þar kepptu liðin í dansi og söng og var það bleika hverfið sem sigraði að þessu sinni.
Gunna Sigga Kristjánsd. fékk viðurkenningu fyrir fallegan og vel hirtan garð.
Síðan var kveikt upp í varðeldinum sem var fljótur að brenna að þessu sinni, enda óvenju lítill efniviður til að brenna. Fólk söng og spjallaði og dansaði síðan eins og hver og einn lysti fram eftir kvöldi, enda var veðrið gott, stafalogn og þurrt, þó það hefði mátt vera hlýrra, en við reynum að kvarta ekki mikið, þó sumarið hafi bæði verið sólarlítið og rakt...

Kraftajötnar 2011

2011-08-24T07:04:00.001-07:00

Þann 12. ágúst s.l. fór fram árleg kraftakeppni sterkustu manna landsins hér á Seyðisfirði undir styrkri stjórn Magnúsar Vers Magnússonar fyrrum heimamanns hér.
Aldrei þessu vant þá var ég svo upptekin að ég komst ekki til að horfa á kappana keppa og þótti það miður, en ég hef hingað til alltaf getað mætt á svæðið einhverja stund.
Ég veit ekki betur en allt hafi farið vel fram að vanda og meðfylgjandi mynd er sú eina sem ég smellti af liðinu, út um gluggann á bókasafninu hjá mér :)

Óvenjulegir gestir !

2011-08-13T17:33:00.001-07:00

Síðastliðinn fimmtudag fékk ég óvænta upphringingu, var beðin að taka að mér 3 rússneskar konur frá Moskvu sem væru á leið til Seyðisfjarðar m.a. í þeim tilgangi að skoða Dvergasteininn í fjörunni neðan við samnefnt fyrrum prestssetur.
Þó ég sæi framm á að eyða talsverðum tíma með þeim og þyrfti að redda þeim gistingu, þá sagði ég auðvitað JÁ, enda erfitt að neita nema maður hafi löglega afsökun.
Þessar myndarlegu eldri konur eru í hópi þeirra sem halda því hiklaust fram að hér á landi hafi búið fólk meira og minna í margar aldir fyrir okkar svokallaða landnám.
Og að þessir dvalargestir sem komu hingað hafi flestir verið hér í ákveðnum tilgangi, því landið okkar sé sannkölluð orkuuppspretta og þeir hafi kunnað að búa til orkuhringi, eða svokallaða steinhringi eins og víða var gert í Englandi, Skandinavíu og víðar. Þetta er mjög líklegt að mínum dómi, þó ég viti að seint verði hægt að sanna það.
Þær voru svo heppnar að fá ágætis veður fyrri tvo dagana, en í dag á brottfarardeginum fannst þeim komið hálfgert vetrarveður á þeirra mælikvarða, enda var mjög heitt sumar í Moskvu að þeirra sögn. En þær höfðu skoðað það sem þeim þótti mest um vert og sneru ánægðar heim með fluginu síðdegis. Þær elduðu rússneskan rétt í gærkvöldi og buðu mér að borða með þeim og fræddu mig um ýmislegt sem þær eru að gera, m.a. ýmislegt í stjörnuspeki sem meikar sens :)
Að þeirra sögn er það enginn dans á rósum fyrir venjulegt fólk að lifa í Rússlandi og þær dásömuðu Ísland sem hreina og orkumikla paradís sem við ættum að meta meira en við gerum mörg hver. Það var vissulega fróðlegt og skemmtilegt að kynnast þessum áhugasömu og duglegu konum sem leggja mikið á sig til að ferðast um heiminn og skoða það sem þær telja merkilega staði og eru t.d. píramídarnir í Egyptalandi þar á meðal. Tungumálaerfiðleikar voru vissulega til smá travala, vegna takmarkaðrar kunnáttu okkar allra, en þó var mesta furða furða hve vel okkur gekk að spjalla um allt milli himins og jarðar. Og ég lærði meira að segja nokkur rússnesk orð sem vonandi koma sér vel í haust þegar ég ætla að bregða mér til St. Pétursborgar, en Moskva verður að bíða betri tíma :))

Kertafleyting á Lóninu...

2011-08-08T14:37:00.000-07:00

Í fyrrakvöld, laugard.kvöldið 6. ágúst stóð friðarhreyfingin hér á Seyðisfirði fyrir kertafleytingu á Lóninu í blíðskaparveðri. Ég mætti með myndavél, að beiðni Gullu í Firði og tók slatta af myndum af viðstöddum, sem voru nokkuð margir og hlýddu á Godd flytja "friðarræðu" og Kára flytja frumsamið ljóð af þessu tilefni eftir Sigga Ingólfs kennara við ME. Síðan sungu allir viðstaddir nokkur lög og fleyttu svo logandi kertum af stað úr á lónið. Þetta var afskaplega hugljúf friðarstund...

Kveðjuveisla...

2011-08-08T14:31:00.000-07:00

Í vikulokin var svo slegið upp smá afmælis-og kveðjuveislu hjá Ellu og Árna sem bjuggu til yndæla súpu sem var kláruð, enda mæting ættingjanna með besta móti.
Harpa bakaði konfekttertur og við lögðum til eina stóra afmælistertu, því bæði barnabörnin okkar eiga afmæli núna í ágúst, en verða farin til Noregs þegar þeir dagar renna. Þetta var því stórskemmtilegt fjölskyldu-samkvæmi og virtust allir saddir og sælir með daginn.
Ég varð síðan að kveðja mitt fólk og fljúga austur morguninn eftir án Rúnars sem ætlar að eyða restinni af fríinu sínu til að hjálpa Jóhönnu sem er bíllaus, þar sem gírkassinn gaf sig í hennar bíl.
Þetta var gott frí og skipti engu þó vikan syðra væri ansi vot, því það rigndi alla dagana meira eða minna...

Haldið til Keflavíkur...

2011-08-08T14:24:00.001-07:00

Eftir helgina héldum við öll af stað heim á leið, við systur og makar tókum stefnuna á Siglufjörð og fórum í fyrsta sinn í gegnum bæði nýju göngin og skoðuðum öll síldarminjasöfnin í bænum og fleira markvert. Sólin fylgdi okkur áfram og við ákváðum að fara alla leið til Hafnarfjarðar í íbúðina okkar þar, sem stendur auð í bili, því Bergþór var að flytja með Hildi sinni í leiguíbúð rétt hjá Háskólanum, svo þau geti sparað tíma, bíl-og bensínkostnað og hjólað í skólann.
Við eyddum síðan heilli viku með Jóhönnu og barnabörnum okkar í Keflavík, vorum að pakka saman restinni af búslóð þeirra, flytja hluta hennar til Bergþórs og Hildar sem hafa ýmsa hluti að láni og keyptu sumt. Það var því í nógu að snúast, því börnin þurftu manninn með sér og ég reyndi að passa þau um leið og ég naut samvistanna, eldaði mat og þreif eftir þörfum...

Mærudagar 2011

2011-08-08T14:07:00.001-07:00

Mærudaga á Húsavík er ekki hægt að láta framhjá sér fara. Við vorum mætt nógu snemma í þetta sinn til að taka þátt í árlegri skrúðgöngu okkar bæjarhluta sem er grænn. Við vorum líka býsna dugleg að mæta á þá viðburði sem voru í boði, fórum á allar sýningar og á ljóðakvöldið, varðeldinn, í vöfflukaffi til Adda og Stellu eins og undanfarin ár og horfðum á óvenjulega hrútasýningu, sem var óvænt gaman :)
Við áttum brúðkaupsafmæli þessa helgi og af því tilefni fórum við út og borðuðum ásamt Diddu systur, hennar manni og Binnu og Magga sem voru í tjaldvagni á lóðinni hjá okkur. Við röltum einn hring um skóginn fyrir ofan Hlíð og nutum góða veðursins þessa yndislegu daga, fórum á markaðinn og að sjálfsögðu í heimsóknir til mömmu í Hvamm, þar sem við hittum reyndar marga fleiri ættingja og vini, ekki síður en
á röltinu í bænum. Við kíktum líka yfir á heitu tjörnina utan við Kaldbak og sáum ótrúlegan fjölda fólks þar að vaða og busla við að veiða gullfiskana sem þar eru í þúsunda tali. Margir tóku veiðina með heim en aðrir skiluðu þeim aftur til síns heima...

Á leið norður...

2011-08-08T13:57:00.001-07:00

Miðvikudaginn 20. júlí lögðum við Rúnar af stað á húsbílnum í frí, áleiðis norður til Húsavíkur. Við ákváðum að fara krókaleið að þessu sinni, ókum ofan af fjöllunum niður til Vopnafjarðar þar sem við hittum Hemma skólabróðir og fleira gott fólk og þaðan áfram til Þórshafnar. Það var rjómablíða fyrir norðan svo við notuðum kvöldið til að aka út allt Langanesið og að Skálum, þar sem forðum var lífleg byggð en nú eru þar rústir einar og eitt lítið björgunarskýli við bryggjuna. Við fórum líka upp á Heiðarfjall til að sjá eftirstöðvar hersins þar á fjallinu og gistum loks á tjaldstæðinu við Þórshöfn. Við vöknuðum við glaða sól og drifum okkur til Raufarhafnar, en þar átti ég heima sem barn, sumarið 1959 og fannst mér mikið hafa breyst frá þeim tíma, til batnaðar. Það var gaman að sjá hve myndarlega verið er að reisa Heimskautagerði á hæðinni fyrir ofan byggðina, sem vafalaust mun draga að marga gesti í framtíðinni. Það var líka sérstaklega ánægjulegt hve vegurinn var orðinn góður á þessum slóðum, breiðari og betri en víða annars staðar hér á landi.
Þegar við komum til Húsavíkur, þá var þar einstaklega gæf rjúpa á vappi við húsið okkar og ekkert að flýja þó við tækjum myndir af henni í návígi....

L.ung.A 2011

2011-07-19T10:45:00.000-07:00

Hin árlega vika Listahátíðar ungs fólks á Austurlandi er nú nýafstaðin og tókst vel að vanda, með góðri aðstoð bæjarbúa við tiltekt og eftirlit. Veðrið lék við þátttakendur fyrri hluta vikunnar með sól og hlýju á hverjum degi, svo allir gátu spókað sig í blíðunni utandyra við vinnuna og listsköpunina sem var fjölbreytt að vanda. Það voru víst um 100 þátttakendur í listasmiðjunum sem voru nokkuð margar víða um bæinn.
Ég missti af tískusýningunni í þetta sinn vegna skorts á auglýsingu, en fór á flestar sýningar og aðrar uppákomur sem voru á laugardeginum og tók myndir. Nokkur sýnishorn fá að fljóta hér með, m.a. af minningarkrossum Jökuls sem voru í minningu íbúanna 24 sem fórust í snjóflóði á Seyðisfirði á Öskudag 1885.
Tónleikarnir og lokaballið fóru víst vel fram, ég bara rétt kíkti smá stund til að taka myndir en frétti að allt hefði gengið vel og bærinn var hreinn og snyrtilegur strax á sunnudeginum þegar ég ók um hann. Það er ekki hægt að neita því að þetta unga fólk og áhugamál þess setja mikinn svip á bæinn okkar þessa einu viku á ári og reyndar nokkuð lengi á eftir, því mörg verkanna eins og vegglistaverkin standa áfram og vekja vonandi athygli gesta og gangandi....
Á Facebook má sjá fleiri myndir af sýningum og atburðum LungA :)

Góðir gestir !

2011-07-19T10:40:00.001-07:00

Helgina 8.-10. júlí mættu öll systkini Rúnars til okkar og héldum við smá ættarmót og buðum öðrum ættmennum á Seyðisfirði í grillveislu sem tókst ljómandi vel. Farið var í leiki og allir í góðu stuði fram eftir laugardagskvöldinu. En Þröstur bróðir Rúnars kom með fjölskylduna frá Noregi og stoppaði aðeins lengur en aðrir og Eiríkur systursonur hans kom líka með sína fjölskyldu og 4ra manna danska vinafjölskyldu að auki og dvaldi í 2 daga í húsinu hans Reynis bónda, Garðarsvegi 24, en þau urðu svo að fara af stað heim á leið áður en að systkinahelginni kom. Það var gaman að hitta þau öll og veðrið hefði líka getað verið verra, þó ekki vildi sólin skína fyrr en á sunnudeginum þegar allir voru á heimleið.
Ég set myndir hér með við fyrsta tækifæri :)

Sólrík helgi fyrir norðan !

2011-07-04T05:48:00.001-07:00

Við Rúnar renndum norður á Húsavík eftir hádegið s.l. fimmtudag í sól og blíðu alla leið, því þennan morgun vöknuðum við í sólskini í fyrsta sinn í langan tíma. Við komum reyndar við í Mývatnssveit hjá einni skólasystur minni sem rekur þar gistiþjónustuna Lúdent á sumrin og fengum hlýjar móttökur hjá þeim hjónum að vanda. Við heilsuðum uppá mömmu og nokkra fleiri ættingja og vini þegar við komum til Húsavíkur en á föstudagsmorgni fórum við til Akureyrar því ég þurfti til augnlæknis. Fékk svör þó engin bót fáist af mannavöldum. Við notuðum tækifærið og sinntum ýmsum öðrum erindum í leiðinni, því svo margt fæst þar sem ekki er hægt að fá hér eystra. Á heimleiðinni kíktum við á 2 kirkjur sem við höfum aldrei skoðað, en það eru gamla Ljósavatnskirkjan og nýja vegakirkjan sem nefnd er Þorgeirskirkja til heiðurs Þorgeiri ljósvetningagoða sem þarna bjó forðum. Við heimkomuna klæddum við okkur uppá og fórum út að borða með Sigrúnu vinkonu sem þarf svo sannarlega á upplyftingu að halda eftir að missa Hauk alltof fljótt. Við hittum ýmsa ættingja og vini og áttum gott kvöld á veitingahúsinu Naustið sem þær Anna Ragnars og Ella Kristjáns reka, en þær voru reyndar ekki við þetta kvöld. Laugardeginum eyddum við bæði hjá mömmu og við tiltekt í kringum húsið, slógum lóðina og sáðum fræjum í moldarsárin við næsta hús.
Veðrið var einstaklega gott og yfir 20 stiga hiti, en mývargurinn var duglegur að bíta mig, en einhverra hluta vegna slapp Rúnar í þetta sinn. Húsavíkurfjall er orðið svo grænt að lítið vantar á að það sé alþakið lúpínu, sem byrjuð var að blána... Sunnudagsmorgninum eyddum við hjá Önnu Maju og Sigga í góðu yfirlæti og hún sendi mig af stað með forláta sjal eða hálstrefil sem hún var búin að prjóna. Við kvöddum svo alla og héldum austur í góðu veðri, en komum í þoku og súld hér eystra, enda veður helgarinnar ekki eins gott hér eins og fyrir norðan.

Í minningu Palla Jóns !

2011-07-04T05:36:00.000-07:00

Árlegt sumarblót var haldið út við bjarg hjá Skálanesi síðustu helgina í júní. Þangað mættu um 60 manns og hlýddu á Baldur goða og aðra viðstadda hylla móður jörð, Seyðisfjörð og Skálnes. Býsna margir erlendir gestir voru viðstaddir og virtust hafa gaman af, þó vafalítið hafi þeir ekki skilið það sem sagt var á íslensku.
Síðan var gengið til baka í Skálanes, þar sem flestir grilluðu sinn eigin mat eða snæddu heilgrillað lamb sem var í boði fyrir gestina. Að því loknu hóf Bjartmar Guðlaugsson að skemmta viðstöddum með söng og gríni i minningu Palla Jóns sem átti mörg spor og handtök á þessum slóðum. Að lokum slógu viðstaddir í púkk og fylltu krús af peningum sem Rúnar Reynisson gjaldkeri hollvinasamtaka HSA á Seyðisfirði tók við fyrir hönd sjóðsins, sem styður við sjúkrahúsið eins og það best má. Skemmtilegur og eftirminnilegur dagur sem við hefðum ekki viljað missa af...

Jónsmessugangan 2011

2011-07-04T05:27:00.000-07:00

Ég hef farið í nokkrar Jónsmessugöngur undanfarin ár og þar sem Rúnar var heima að þessu sinni og Siggi Birkir líka, þá dreif ég þá feðga með mér. Við ókum út að Selstöðum ásamt 30 öðrum göngugörpum sem við urðum samferða út að Brimnesvita. Veðrið var ósköp gott, logn og þurrt og nógu hlýtt, til að engum var kalt.
Nesti var svo snætt við vitann og Daði Kristjáns fræddi nærstadda um ýmislegt sem gerst hafði á þessum slóðum. Við gengum síðan að gömlum húsgrunni, en þar stóð forðum eitt fyrsta frystihús hér á landi.
Að lokum skoðuðu flestir gamla bæinn á Selstöðum, en þangað höfðum við aldrei komið... Þetta var hressandi ganga með góðum hópi :)

Vetrarsokkar á barnabörnin !

2011-06-19T15:47:00.001-07:00

Þó ég hafi prjónað nokkrar hosur (inniskó) á Adam og Jóhönnu Björgu á síðustu árum, þá hef ég ekki prjónað sokka í mörg ár. Fyrst og fremst vegna þess að þær mamma og tengdamamma sáu um það fyrir mig. En nú kemur barnabörnin mín til með að vanta sokka fyrir næsta vetur og ég taldi vissara að fara að rifja upp hvernig ég hefði prjónað hælana, því ég var alveg búin að gleyma því. Með því að skoða sokka sem mamma prjónaði og styðjast við uppskriftir fyrir börn til að hafa einhvern lykkjufjölda til að miða við, þá tókst mér að klára tvenna sokka á 4 kvöldum og var bara ánægð með það. Hefði samt viljað prjóna aðra úr lopa, því það er víst ansi kalt í Noregi á veturna, mikið kaldara en hér heima á klakanum og því vissara að hafa börnin hlýlega klædd og nóg til skiptanna. Ég ætla því að útvega mér lopa og taka aðra prjónaskorpu fyrr en síðar :)

17. júní 2011

2011-06-19T15:13:00.000-07:00

Eins og oft áður var veðrið ekki gott á þjóðhátíðardaginn, þó vissulega hefði það getað verið verra. Hann hékk þó þurr lengst af, en þykkur þoku og skýjabakki lá yfir og ísköld hafgola bætti um betur. En ótrúlega margir drifu sig samt út til að sjá og heyra það sem um var að vera í bænum. Ég sleppti fallbyssuskotinu að þessu sinni, þar sem ég var upptekin í símanum á sama tíma. En fór svo niður að kirkju og fylgdist með dagskránni þar, m.a. sungu nokkrir krakkar undir stjórn Gullu í Firði og Kristin prestsfrú flutti ágætis ávarp og Guðlaug dóttir hennar var fjallkonan. Lömb, kanínur og hænsni voru til sýnis eins og undanfarin ár. Að þessu loknu fór ég í Skaftfell, þar sem opnuð var myndasýning af viðtölum við Seyðfirðinga á öllum aldri, en verið er að safna slíkum viðtölum til að fá frásagnir og minningar frá ýmsum timum á Seyðisfirði...

Fugla-og-dýralíf í Noregi !

2011-06-16T07:23:00.000-07:00

Það er tímafrekt að taka myndir af fuglum og til þess að árangur verði góður, þarf góðar vélar með aðdráttarlinsum. Þar sem ég hafði hvorki tíma né linsuvél á þessari ferð okkar, til að taka fuglamyndir, þá læt ég nægja mynd af Skjó sem var með hreiður í tré rétt við hús Jóhönnu og co. Hann er fallegur fugl, en frekur eins og hrafnar. Krákur voru líka mjög áberandi þarna og óhljóðin í þessum tveim fuglategundum vöktu mig oft þessar nætur í Hamnar.
Svölungar og bæjarsvölur voru líka mikið sveimandi þar sem við fórum og ég náði mynd af þeim, en aðrir fuglar voru í feluleik, eins og finkurnar og gráþrestirnir, en maríuerlur voru reyndar nokkuð algengar, en ég komst aldrei í myndafæri við þær.
Loks eru hér 2 myndir til gamans, önnur af tréuglu í listamannahverfi Oslóborgar, en hin af Elg í Lillehammer, en greinilegt er að þó sumir stingi hausnum í sandinn, þá stinga aðrir þeim í vegginn eins og hér má sjá.
Að lokum vil ég geta þess að ég setti slatta af ferðamyndum inn á Facebook síðuna mína, þar sem allir sem vilja eiga að geta skoðað þær, því þær eru ekki læstar.

Vikudvöl í Hamar !

2011-06-16T06:54:00.001-07:00

Við dvöldum eina viku hjá Jóhönnu, Mo og börnunum í góðu yfirlæti og vorum bara dugleg að skoða okkur um og njóta þess sem var í boði. Fórum í langan göngutúr meðfram smábátahöfninni sem er stór, enda bærinn fjölmennur og sáum líflegt mannlíf, m.a. var kvennahlaup í gangi þarna. Ég skrapp með Jóhönnu á bókasafn bæjarins á meðan Rúnar fór í sund með Adam. Þetta bókasafn er mjög vel búið og allt frítt, líka tónlist, myndbönd/DVD, hljóðbækur sem annað efni.
Við heimsóttum Mo á veitingahúsið sem hann vinnur á og fengum okkur að borða þar steiktan fjallasilung og ís á eftir. Einn daginn skruppum við til Lillehammer að skoða olympíu-skíðasvæðið sem er í notkun jafnt sumar sem vetur, þó enginn eldur hafi brunnið í kyndlinum sem blasir við neðan við stökkpallana. Við fórum í marga labbitúra meðfram vatninu og í bæinn og heimsóttum geysistórt lestarsafn sem er þarna í bænum. Það rigndi part úr degi flesta dagana en okkur fannst það lítið mál, því hitinn var í kringum 20 gráður. Þessar rigningar komu af stað miklum flóðum í Noregi og göngustígar sem við fórum eftir í skógargöngu við vatnið voru meira og minna á floti eða í kafi. Adam var berlæraður og fékk brunablöðrur af því að vaða í gegnum gróðurinn þar sem brenninetlur voru utan stíga þar sem flóðið var.
Það var líka gaman að rölta um nágrenni hússins sem þau búa í, þar er mikið af fallegum görðum og heilmikið fuglalíf, sem er frábrugðið því sem við þekkjum hér heima. Ég enda þetta Noregsspjall kannski á að sýna nokkra af þeim fuglum sem við sáum en flestir þeirra koma aldrei til Íslands, vegna fjarlægðarinnar...
Síðasta deginum okkar eyddum við saman á Miðaldahátíð sem haldin var við rústir gömlu dómkirkjunnar sem verið er að grafa upp, en þar er búið að setja upp safn gamalla muna í hlöðum og öðrum gömlum byggingum. Allir virtust skemmta sér vel og Adam var alsæll með daginn enda var hann sleginn til riddara og við gáfum honum hjálm til að hann væri nú í alvöru riddaralegur!

Noregsheimsókn 2011

2011-06-16T06:39:00.001-07:00

Í byrjun júní brugðum við undir okkur betri fætinum og skruppum í 10 daga ferð til Noregs, bæði til að heimsækja Þröst mág og fjölskyldu og Jóhönnu okkar og fjölskyldu.
Við byrjuðum á því að dvelja hjá Þresti og Birnu yfir helgi og fengum yndislega daga, sól og blíðu og notuðum þá vel. Fórum fyrst í hjólreiðatúr niður allar brekkurnar í Oslo og enduðum niður við höfn, þar sem við fengum okkur smá næringu áður en við skruppum í siglingu út í nærstadda eyju þar sem borgarbúar vorum í hópum að sóla sig.
Um kvöldið grillaði Þröstur og við nutum frábærra veitinga hjá þeim Birnu utan dyra við kvöldroðann sem lá yfir borginni. Daginn eftir skruppum við niður á Bygdö til að skoða stafkirkjuna og gamla safnið sem hafði farið framhjá okkur um árið þegar við vorum á Bygdö að skoða öll söfnin þar(Kon Tiki, Víkingasafnið o.fl). Síðan héldum við ásamt Birnu, Þresti og Eiríki Hrafni áleiðis til Hamar að hitta Jóhönnu og börnin í Amadeus dýragarðinum sem gaman var að heimsækja. Þar áttum við saman notalegan dag og kvöddum svo Þröst og co og héldum til Hamar með dóttur okkar og barnabörnum....

Mörg Maí-börn í fjölskyldunni :)

2011-05-25T05:35:00.001-07:00

Það eru óvenju margir í fjölskyldu minni sem eiga afmæli í maí. Þau sem næst mér standa eru synir mínir Siggi Birkir sem á afmæli 4. maí og Bergþór sem á afmæli 22. maí. Svo er það Mo tengdasonur sem fæddist 1. maí og tengdadóttirin Hildur kærasta Bergþórs sem á afmæli 21. maí og loks pabbi sem átti afmæli 24. maí. Af því tilefni set ég hér myndir af þeim, önnur tekin af Sigga, Bergþóri og Hildi í heimsókn hjá okkur um áramótin s.l.(það vantaði bara Mo) og hinsvegar er mynd af pabba að sinna uppáhalds áhugamáli sínu, fuglaskoðun, en hér er hann við álftamælingara og merkingar við Skjálftavatn í Kelduhverfi ásamt fuglafræðing sem mætti árlega til að sinna þessu. Ég gæti talið upp nokkuð marga aðra ættingja okkar Rúnars sem eru maíbörn, en læt þetta nægja að sinni ...

Vortónleikar kirkjukórsins

2011-05-21T13:34:00.001-07:00

Fimmtudagskvöldið 19. maí hélt Kirkjukór Seyðisfjarðar vortónleika sína, en við sem erum í kórnum höfum verið að æfa 18 lög síðan í vetur. Dagskráin gekk bara ljómandi vel, þó ég segi sjálf frá. Lögin runnu létt í gegn, betur en yirleitt á æfingum og ég vona að allir hafi verið sáttir og fékk ekki að heyra neitt annað :)

Kvöldganga meðfram Fjarðará !

2011-05-17T12:44:00.000-07:00

Kvö

Í gærkvöld fórum við Rúnar í 2ja tíma göngutúr í blíðunni meðfram Fjarðará. Við gengum inn með ánni og yfir brúna í Fjarðarseli og til baka eftir veginum að miklu leyti.
En þegar við gengum upp með ánni á móts við golfvöllinn, þá gengum við sífellt fram á fleiri golfkúlur sem við hirtum, ásamt rusli sem varð á vegi okkar og skildum allt eftir hjá Golfskálanum á heimleiðinni. Við gengum líka fram á silung í læk og nokkur gæsahreiður, þar af eitt með golfkúlu á milli gæsareggjanna eins og myndin sýnir. Það er ekki gott að giska á hvort einhver gamansamur hefur átt þarna leið um á undan okkur og sett kúluna í hreiðrið, eða hvort gæsin hefur litið á nærstadda kúlu sem egg og bætt henni í hreiðrið ??? Allavega var þetta óvæntur fundur og skemmtilegur :)

Svona var veðrið á fjöllunum....

2011-05-17T12:39:00.000-07:00

Hér má sjá hvernig veðrið var á heimleiðinni uppi á fjöllunum á sunnudagskvöld, skammt frá Möðrudal, Víðidal og Langadal. Fyrst fengum við á okkur haglél í Mývatnssveit en síðan skýjað og regn langleiðina að vegskarðinu við Möðrudal, en þaðan var meira og minna slydda og hríð og grátt í rót og hvít jörð niður undir Jökuldal. Og síðast en ekki síst var svo dimm þoka á Fjarðarheiði, en annars meinlaust veður. Vonandi fer ekki veturinn að birtast á ný, nú þegar vorið er komið og allur gróður útsprunginn og margir fuglar búnir að verpa...

Góð Eurovisionhelgi á Húsavík !

2011-05-17T12:28:00.000-07:00

Við Rúnar brugðum okkur norður s.l. föstudagskvöld og ætlunin var að setja niður kartöflur ef búið væri að herfa gamla garðinn hans pabba. En hann var ennþá svo blautur að við urðum að geyma kartöfluvinnuna. Við heimsóttum mömmu og fórum með hana hefðbundinn rúnt um bæinn og nágrennið og heim í kaffi eins og venjulega. En um kvöldið vorum við boðin í grillveislu til Villu vinkonu og Fúsa og áttum þar yndislegar samverustundir eins og alltaf þegar við hittumst. Villa er líka alltaf jafn rausnarleg og sendi mömmu blómvönd úr Blómabrekkunni og eftir matinn horfðum við saman á lokakeppni Eurovision-söngvakeppninnar, þar sem Vinir Sjonna stóðu sig vel og lentu í 20. sæti. Á sunnudaginn skruppum við í klukkutíma fjöruferð með hópi fuglaskoðara og sáum ýmsar tegundir fugla, m.a. rauðbrystinga, sanderlur og tildrur. Veðrið var ósköp gott, ekki síst á sunnudaginn og við kvöddum bæinn síðdegis í sól og blíðu, en lentum í haglél, slyddu og þoku á heimleiðinni...

Föt sem framlag !

2011-04-23T13:03:00.001-07:00

Ekki get ég hrósað mér fyrir dugnað við prjónaskap, þó ég hafi vissulega prjónað nokkrar peysur og aðrar flíkur gegnum tíðina. En ég hef nú lokið við að prjóna þá undarlegustu peysu sem ég hef nokkurn tíman prjónað á ævi minni. Hún er AÐEINS EITT STYKKI, mjög svo undarlegt í laginu eins og sjá má á meðfylgjandi mynd. En þegar búið er að leggja stykkið rétt saman og sauma þar sem sauma þarf og setja hnappa eða tölur, þá er þetta stórsniðug uppskrift og ég tel að það þurfi bæði hugmyndaríka og mjög vana prjónakonu til að hanna og útbúa slíka flík.
Þessi litla peysa er ekki handa dótturdóttur minni, heldur fer hún í söfnun Rauða Krossins sem nefnist Föt sem framlag, en nokkrar konur hér í bæ og a.m.k. einn karlmaður hafa í allan vetur verið að prjóna svona peysur og hekla teppi og aðrar flíkur í þessa söfnun sem nýtist vonandi vel hjá þeim fjölskyldum sem þurfa á hjálp að halda. Það kom sér vel núna að ég hef í áratugi safnað hnöppum og tölum af ónýtum flíkum og get því núna ásamt félögum mínum gengið í þetta safn til afnota á flíkurnar...

Gleðilegt sumar !

2011-04-21T13:53:00.001-07:00

GLEÐILEGT SUMAR og takk fyrir veturinn, þið sem lítið hingað inn :)
Vegna óvenju mikillar veðurblíðu undanfarið hefur það nú skeð, sem aðeins hefur gerst einu sinni áður í okkar búskap, að páskaliljurnar okkar úti í garði eru að springa út núna um páskana og ég gat því farið út og sótt mér nokkrar í vasa, auk þess sem ég var búin að klippa niður nokkra runna sem þurfti að snyrta og setti fáeinar greinar í vatn til að skreyta, því ég á nóg af páskaungum og skrauteggjum til að hengja á þær.
Það er alltaf svolítið skemmtilegt að breyta til um páskahátíðina og gera vorið líflegra, því oftast er vetrarveður á þessum tíma sem hentar frekar skíðafólki en sóldýrkendum, en ég tilheyri frekar síðari hópnum :)

8 ungmenni fermd í dag á Seyðisfirði

2011-04-21T13:31:00.000-07:00

Í dag, skírdag voru fermd 8 ungmenni í Seyðisfjarðar kirkju. Þessi dagur hefur verið árlegur fermingardagur til fjölda ára, en uppúr 1980 fóru fermingar hér fram um Hvítasunnu og það er ekki hægt að neita því að yfirleitt er veðrið betra á þeim tíma en um páskana. En að þessu sinni hefur veðrið verið óvenju gott og þessi dagur var ljómandi góður, því sól skein í morgun og hitamælirinn sýndi 15 stig, en það kólnaði nú niðurfyrir 10 stig eftir hádegið en það var þó þurrt og bjart, svo ekki ætla ég að kvarta, enda fórum við á rúnt kringum fjörðinn í leit að nýjum farfuglum sem flykkjast nú til landsins í stórum hópum... Við sluppum við allar veislur í þetta sinn og létum okkur nægja eina ávaxtatertu sem ég útbjó handa okkur í tilefni dagsins og eldaði svo ljúffenga og þrælholla kjúklingasúpu í kvöldmatinn sem lætur manni líða vel, án þess að maður verði of saddur :)

Farfuglarnir streyma til landsins !

2011-04-21T13:19:00.000-07:00

Það liggur við að maður sjái nýja farfugla streyma hingað daglega. T.d. í dag sáum við fyrstu spóana, fyrstu jaðrakanana og líka fyrstu sandlóuna og tildruna, en auk þess eru komnir hópar af lóum, stelkum, gæsum og fleiri fuglum eins og tjöldum og straumöndum sem virðist fjölga ár frá ári. Ég sá líka fyrstu þúfutittlingana í dag hér í garðinum og skógarþrestirnir vekja okkur líka flesta morgna með söng sínum og finnst mér það afar ljúft. Það kemur þó fyrir að hanagal heyrist snemma dags frá nágrönnum okkar, en annars trufla hænsnin okkur lítið, þó oft heyrist í þeim meira og minna. Dúfurnar eru líka ennþá á svæðinu og halda mikið til í kringum hænsnin og sitja mikið á þakinu hjá okkur og þá heyrist talsvert í þeim, eins og þrusk eða líkt og snjór sé að renna af þakinu. Það verður svo heilmikið fjör þegar kríurnar mæta, en það verður nú væntanlega ekki fyrr en í byrjun maí....

Minnisvarðinn upplýstur !

2011-04-12T07:58:00.001-07:00

Þegar veðurblíðan skall á í síðustu viku dreif Rúnar í því ásamt Jónasi Jóns að setja upp 4 ljós í kringum minnisvarðann um Jón Pálsson fv. skipstjóra og Ólaf M. Ólafsson útgerðarmann og tókst það ljómandi vel (þó mér sé málið skylt :)
Þessi ljós fara einkar vel við minnisvarðann, enda voru þau valin sérstaklega, sem líkust vita sem lýsir sjófarendum. Nú er bara eftir að laga umhverfið betur með gróðri og öðru viðeigandi...

Óvenjuleg veðurblíða í byrjun apríl ...

2011-04-08T16:50:00.000-07:00

Það skeður ekki oft að veðráttan sé jafn mild á þessum árstíma eins og nú er. Fyrstu blómin er farin að springa út og brumið farið að springa út á runnunum, auk þess sem fyrstu farfuglarnir eru mættir og syngja hástöfum um allan bæ og sólin skín svo hlýtt og skært að dýrin leggjast í sólbað, a.m.k. nágrannadýrin mín, bæði kötturinn og hænsnin, auk þess sem hreindýrin virðast una sér vel hér niður undir bæ og lítur ekki út fyrir að þau séu neitt á förum til fjalla.
Það er varla við því að búast að þessi blíða endist, þó gott hefði verið að fá vorið svo snemma án þess að eiga kuldahret yfirvofandi sem hugsanlega mundi skemma gróðurinn sem kominn er svo vel á veg.... Þýðir nokkuð annað en vona það besta ?
Ég reikna með að nota þessa helgi til að grófhreinsa garðinn ef spáin gengur eftir í von um að það saki ekki....!

Ingibjörg 80 ára

2011-04-08T16:42:00.001-07:00

Það var mikið fjör s.l. laugardag í Herðubreið, þegar Ingibjörg Rafnsdóttir hélt uppá 80 ára afmælið með flestum sínum afkomendum og fjölskyldum. Auk þess mættu um 100 manns og samglöddust henni þennan dag og mikið var sungið og gert að gamni sínu. Síðast en ekki síst var svo veislumatur á borðum sem allir hljóta að hafa kunnað að meta. Hópur eldri borgara dönsuðu línudansa og Stefán Ómar og strákarnir spiluðu nokkur lög, auk þess sem Billa og Gulla stjórnuðu fjöldasöng og fleiru...
Þau Ingibjörg og Addi eru einstaklega hress og viljug og áhugasöm að taka þátt í öllu sem um er að vera hér í bænum. Þau eiga heiður skilið m.a. fyrir það.
Verst að Hilla frænka skyldi ekki geta verið hér og samglaðst sinn gömlu skólasystur :)

Gagnleg helgi fyrir norðan :)

2011-03-28T10:45:00.000-07:00

Eins og mánaðarlega þá brenndi ég norður til mömmu s.l. helgi og hafði meðferðis verkefni sem til stóð að leysa. Það gekk vonum framar, því þetta voru gamlar myndir, mest af Keldhverfungum sem ég þurfti aðstoð við að nafngreina. Allir sem ég leitaði til voru boðnir og búnir að hjálpa, m.a. gamlir sveitungar sem nú dvelja í Hvammi, heimili fyrir aldraða í þingeyjarsýslum. Ég kom því heim með nánast allar myndir skráðar.
Veðrið var frábært á laugardaginn og við mamma fórum á rúntinn eins og alltaf þegar veður er gott og ég í heimsókn. Skyggnið var svo gott að auðvelt var að sjá bæði Flatey á Skjálfanda og Grímsey bera við sjóndeildarhringinn...
Ég heilsaði líka upp mínar gömlu og góðu vinkonur, Villu og Sigrúnu og hitti móðursystkini mín og fleira gott fólk eins og Ástu og Valda frá Garði sem hjálpuðu mér heilmikið með sumar gömlu myndirnar. Þetta varð því ágætis vinnuferð í leiðinni og að auki hlustaði ég á eina hljóðbók á meðan ég ók yfir fjöllin, fram og til baka :)

Fyrsti vorboðinn mættur....

2011-03-22T05:54:00.000-07:00

Það er nokkuð síðan að Rúnar sá fyrsta Tjald ársins hér við lónið. Núna um helgina voru þeir á milli 20 og 30 sem hann sá og auk heldur var hópur af Sendlingum í fjörunum og Rauðhöfðaendur og Duggendur sem eru frekar sjaldséðar á þessum árstíma.
Þegar hávær Tjaldurinn er mættur og farinn að helga sér óðul þá finnst manni vorið vera í nánd, þó oft vilji nú samt verða dráttur á því :)) Þess má geta að Glóbrystingurinn er hér enn við góða heilsu, hefur mætt í mat hjá okkur síðustu daga og er alltaf jafn mikil mannafæla :) Snjótittlingar og dúfur mæta alla daga í fóðrið og stöku sinnum koma flækingar með þeim eins og skógarþröstur eða svartþröstur en nokkrir slíkir hafa verið hér í bænum í vetur...

Æfingabúðir fyrir vortónleika...

2011-03-21T04:33:00.000-07:00

S.l. laugardag 19. mars mættu yfir 20 manns niður í kirkju, þar sem við vorum í rúma 6 tíma við söngæfingar fyrir vortónleika sem halda á 19. maí nk.
Einn kórfélaga (Inga Svanbergs) sá um að elda súpu og útvega brauð og álegg handa hópnum og allir tóku því með mestu rósemi að bíða á meðan hver rödd var æfð, þar til allir gátu sungið saman. Lögin sem við vorum að æfa eru tæplega 20 og flest ekta íslensk ættjarðarlög, sem hljóma ótrúlega vel þegar allar raddir eru með :)
Myndirnar fékk ég lánaðar hjá Helga Haralds sem tók þær á símann sinn !

Safnadagur á Suðurnesjum !

2011-03-15T16:10:00.000-07:00

Helgina sem við dvöldum hjá dóttur okkar og barnabörnum var Safnahelgi á Suðurnesjum. Þar sem veðrið á laugardaginn var mjög gott, þá ákváðum við að kíkja á nokkur söfn og byrjuðum á Víkingasafninu þar sem skipið Íslendingur er til húsa ásamt fleiru. Það var Gunnar M.Eggertsson skipasmiður að langfeðratali í Vestmannaeyjum sem smíðaði það og sigldi því með áhöfn til Ameríku. Ef ég man rétt þá giftist Seyðfirðingurinn Sunna Gissurardóttir einum áhafnarmeðliminum við komuna þangað.
Síðan röltum við til Maríu Baldurs ekkju Rúnars Júl, en hjá henni var opið hús, þar sem hægt var að skoða stúdíó aðstöðu Geimsteina ásamt öllum hljóðfærum, plötusafni og ýmsum minjagripum tengdum tónlistarferli þeirra hjóna. Þetta var mjög forvitnileg og skemmtileg heimsókn. Loks renndum við út á Garðskaga til að skoða öll söfnin þar og handverkssýningu í gamla vitavarðahúsinu. Að síðustu klifruðum við upp 120 tröppur í nýja vitanum og fengum frábært útsýni yfir suðurnesið. Daginn enduðum við svo með fjölskyldudinner sem var mjög notalegur :)

Í heimsókn hjá barnabörnunum :)

2011-03-15T15:45:00.000-07:00

Þann 21. mars fer Jóhanna Björg með barnabörnin okkar til Noregs, þar sem tengdasonur okkar er í vinnu. Til að kveðja þau og aðstoða við að pakka saman og ganga frá húsinu, skruppum við Rúnar suður s.l. helgi. Við nutum líka samvista við syni okkar, tengdadóttur og fleiri ættingja og áttum góðar stundir saman. Við borðuðum saman helgarmatinn og reyndum eftir bestu getu að tæma frystikistuna sem var heldur full af matvælum fyrir rúmlega eina helgi. En við stefnum á að skreppa í heimsókn til þeirra og Þrastar mágs og fjölskyldu til Oslo í sumarfríinu og vonandi gengur það vel :))

Æskulýðsdagurinn

2011-03-06T15:42:00.000-08:00

Í dag, sunnudaginn 6. mars er æskulýðsdagurinn. Af því tilefni var gospelmessa í Seyðisfjarðarkirkju og allur kórinn mættur og auk þess nokkur börn sem sungu tvö lög. Sú óvenjulega tilbreyting kom upp, að fullorðin kona óskaði eftir að vera fermd við athöfnina og var það skemmtileg uppákoma og athöfnin óvenju létt og gleðileg.
Ég fór síðan á tónleika í kjallara Tónlistarskólans kl 5 og hlustaði þar á nokkur börn og ungmenni spila á hin ýmsu hljóðfæri. Hér má sjá strákana sem spiluðu lokalagið og krakkana sem sungu í kirkjunni í tilefni dagsins.
Ég tók líka forskot á sælu morgundagsins, sem er bolludagur og borðaði nokkrar rjómabollur en hef hinsvegar ákveðið að sleppa því að borða saltkjöt og baunir á sprengidaginn, því það hefur mjög svo óþægileg líkamleg eftirköst, þ.e.a.s liðverki sem ég nenni ekki að umbera í marga daga eftir saltkjötsát og ætla í staðinn að sjóða mér kjötsúpu, því ekki veldur hún neinum óþægindum :)

Úrslit í Viskubrunni og íþróttamaður ársins !

2011-02-23T14:39:00.000-08:00

Nú er lokið árlegri keppni í VISKUBRUNNI, spurningakeppni Seyðisfjarðarskóla.
Það var lið bæjarskrifstofunnar sem hafði sigur að lokum en sigurliðið frá því í fyrra, kennarar sem kalla sig Gagn og Gaman sem urðu í öðru sæti en í þriðja sæti var lið frá sýsluskrifstofunni og afleysingalið Gullbergs endaði í fjórðar sæti.
Það er venja að við sama tækifæri er valinn íþróttamður ársins og að þessu sinni var það Jóna Ólafsdóttir sem hlaut titilinn, en hún var fjarstödd og fékk tvær litlar frænkur sínar til að taka við verðlaununum fyrir sína hönd og stóðu þær sig með prýði.

Teppi úr gamalli peysu....

2011-02-17T11:50:00.001-08:00

Ég tók þá ákvörðun að reyna að leggja mitt af mörkum til starfsins hjá RKI deildinni okkar sem vinnur nú að því að safna og útbúa FÖT SEM FRAMLAG handa fátækum börnum á fyrsta ári. Ég var búin að gera tvö teppi úr prjónabútum frá mömmu og fleiru og vantaði efni í eitthvað meira. Fann þá gamla peysu af mér sem legið hafið í áratugi inni í skáp engum til gagns, því þessi litur fer mér ekki vel. Ég tók mig því til og rakti hana upp og heklaði barnateppi sem nú bíður eftir að fara í ferðalag eitthvað út í heim handa barni sem þarf á því að halda :)

Fleiri flækingar !!!

2011-02-17T11:43:00.000-08:00

Við höfum haft þá ánægju að sjá lítinn fallegan flæking = Glóbrysting hér í garðinum á hverjum degi í tæpa 2 mánuði. Í gær birtist svo fyrsti skógarþröstur ársins og hefur verið hér líka í dag. Þriðji gesturinn = svartþrastarkarl mætti svo í fóðrið okkar í morgun og hefur hoppað vítt um garðinn í leit að ýmsu æti og hamast við að róta upp gömlu laufi undan runnum ásamt félaga sínum skógarþrestinum. Enn einn fugl er mættur á svæðið, en það er fyrsti Tjaldurinn sem Rúnar sá hér við nýja lónið, en Tjaldarnir eru yfirleitt fyrstu farfuglarnir sem við sjáum hér á hverju nýju ári....

Viskubrunnur 2011

2011-02-16T10:17:00.000-08:00

Hin árlega spurningakeppni Seyðisfjarðarskóla VISKUBRUNNUR hófst í s.l. viku og er nú fyrstu umferð lokið. Ég lenti í liði með kirkjukórnum að þessu sinni og keppti í gærkvöld ásamt einni úr kórnum og syni hennar sem hljóp með henni í skarðið, því að tveir að keppendunum sem áttu að vera með mér, voru veðurtepptir á Egilsstöðum. Okkur gekk alveg ljómandi vel, unnum Síldarvinnsluna og vorum stigahæsta liðið í gærkvöld, ásamt Gullversmönnum.
En hvort okkur kemur til með að ganga jafn vel í kvöld skal ósagt látið.
Verður maður ekki alltaf að vera bjartsýnn og horfa á jákvæðu hliðarnar, þetta er jú bara skemmtun og um að gera að vera með, þó maður vinni ekki, nema kannski af og til :)
Á myndunum má annars vegar sjá unga fólkið sem las upp brandara fyrir okkur, en þau eru að æfa sig fyrir stóru upplestrarkeppnina og um leið að safna fé í ferðasjóð bekkjarins, því þau ætla til Danmerkur í vor eins og venja er með elstu bekkina árlega.... Hinsvegar eru það foreldrar og kennarar sem sátu í sætum dómara, spyrils, tímavarðar og stigateljara...
Jæja, við rétt mörðum sigur í kvöld og þurfum því að taka þátt í 6 liða lokakeppninni sem verður í næstu viku.....

Fögur fjallasýn !

2011-02-14T09:04:00.001-08:00

Það er ekki oft svo bjart og gott veður að hægt sé að ljósmynda fjöllin fallegu sem eru í augsýn á leiðinni frá Seyðisfirði til Húsavíkur.
En aldrei þessu vant, þá var dagurinn í gær einn slíkur dagur, þegar hægt var að taka myndir í skemmtilegri sólarbirtu, sem hafði mismunandi lit, eftir því hvenær dagsins myndin er tekin og hvort myndin var tekin á móti sól eða undan sól.
Ég hef haft það fyrir sið að mynda bæði Snæfellið og Herðubreið, þegar veður leyfir á fjallaferðum okkar og í þetta sinn tókust þær betur en oft áður, auk þess sem ég náði mynd af Dyrfjöllunum sem sjaldan skarta nægri birtu þegar ég á þar leið um. Það var því fögur fjallasýnin á þessu ferðalagi okkar :)

Enn ein norðurferð !

2011-02-14T08:20:00.001-08:00

Enn og aftur skelltum við Rúnar okkur í norðurferð til mömmu á föstudags- morgunn, þó veðurútlitið væri ekki mjög gott. Enda var dimmt yfir og hríðarfjúk frá Jökuldag og langleiðina í Víðidal, en þar voru miklar vindrokur sem feyktu nokkrum bílum út af veginum, einn valt og var illa farinn og gámur fauk af flutningabíl, en við vorum búin að fá viðvörun og fórum því afar varlega um þetta svæði og komumst klakklaust yfir fjöllin.
Það var hinsvegar mikill munur að koma til Húsavíkur og sjá að nánast allur snjór sem var þar fyrir mánuði síðan var horfinn. Við komum nógu snemma til að geta erindað í banka og verslað og meira að segja skruppum við í eina klst. upp í Safnahús til að skoða nýopnaða sýningu á listaverkum, en einnig var búið að setja upp ljósmyndasýningu af gömlum húsum á Húsavík, sem ekki var síðra að skoða.
Á laugardaginn var blíðskaparveður og sól allan daginn og fórum við því með mömmu sem var óvenju hress, í bíltúr um bæinn og nágrenni og kíktum meira að segja í heimsókn til góðra ættingja.
Mamma hafði líka mjög gaman af að koma heim í Hlíð, en nokkuð er síðan við fórum þangað með hana, vegna veðurs og ófærðar við Hlíð í síðustu ferðum okkar.
Rúnar er líka vanur að kíkja niður fyrir Bakkann og heilsa upp á karlana í skúrunum. Aldrei þessu vant fór ég með honum og hafði bara gaman af að hitta þessu hressu sjómenn sem alltaf hafa gaman af að spjalla og fá sér korn í nefið :)
Áttum svo yndælis kvöld hjá Villu vinkonu og Fúsa sem alltaf taka svo vel á móti okkur. Auk þess hittum við öll móðursystkini mín á Húsavík og fleiri góða vini.
Veðrið var líka mjög gott á sunnudeginum, en við lögðum af stað austur í björtu og komumst heim í ljósaskiptunum, þrátt fyrir seinkun vegna krapaslabbs og sjóbreiðu á veginum alla leiðina yfir fjöllinn

Föt sem framlag hjá RKI

2011-01-28T04:44:00.000-08:00

Stjórn Rauðakross- deildar Seyðisfjarðar stendur nú fyrir söfnun og vinnslu á pökkum með barnafötum, teppum o.fl. til nauðstaddra erlendis. Hafa þær heiðurskonur Þóra Ingvalds og Lukka Gissurard. heiðurinn af að halda utan um þetta verkefni en nokkrar konur eru að vinna við að útbúa fatnað, teppi og fleira í þessar pakkningar. Fyrir jólin voru sendir amk. 12 slíkir pakkar sem við vorum búnar að ganga frá og annað eins er nú að verða tilbúið.
Ég er ekki mjög dugleg handverkskona en reyni þó að vera með og gera eitthvað gagn. Ég ákvað t.d. að nota prjónastykki sem móðir mín var búin að prjóna og útbúa úr þeim barnateppi. Með því að klippa niður prjónatrefil sem ég átti og lagfæra nokkur stykkin, þ.e. að prjóna við eitt og rekja stubb af öðrum o.s.frv. þá gat ég látið þetta passa og heklaði svo stykkin saman. Árangurinn má sjá hér á þessum myndum. En hvað ég tek mér næst fyrir hendur skal ósagt látið, en ég ætti nú líka að setja hér inn mynd af handverkskonunum þar sem þær eru saman komnar í Sæbóli við þessa vinnu...

Þurrablótið 2011

2011-01-27T14:35:00.001-08:00

Í kvöld 27. jan. hélt grunnskóli Seyðisfjaðar Þurrablót í Herðubreið, en það hefur verið fastur liður s.l. 30 ár. Við höfum nokkrum sinnum farið á þessi blót og haft gaman af. Að þessu sinni urðum við að sleppa Þorrablótinu sem var hér um síðustu helgi, vegna lélegrar heilsu húsbóndans :) en hann er orðinn hressari svo við drifum okkur og nutum bæði góðs matar og skemmtiatriða sem voru í formi söngs, leikatriða, spurningakeppni og fleira. Þorrablótsnefndin sýndi 2 atriði og kennarar sýndu eitt atriði, en nemendur sáu um afganginn.
Einnig völdu nemendur sjálfir drottningu og kóng og kennara vetrarins, auk annarra titla eins og grínisti ársins, fatafrík ársins, kennarasleikja, frekja, EGO o.s.frv... og virtust allir sáttir við sinn titil og tóku þessu gríni á jákvæðan hátt.
Að síðustu átti svo ein stelpan í hópnum afmæli í dag og hún fékk kórónu eins og kóngurinn og drottningin og vinkonurnar sungu fyrir hana afmælissönginn.
Ég þakka fyrir góðan mat og góða skemmtun !

Suðrænn gestur á Seyðisfirði

2011-01-27T14:21:00.001-08:00

Það gerist ótrúlega oft að litlir suðrænir fuglar hrekjast með vindum hingað til lands um hávetur og eiga varla lífs von ef þeir lenda í miklum kulda og snjó.
Flesta vetur sjáum við einhverja flækinga en það er nafnið sem þessir gestir hafa fengið meðal fuglaáhugamanna. Fyrir nokkrum dögum tók ég eftir því að lítill fugl (sá reyndar tvo a.m.k. einu sinni) var á flögri milli runnanna í garðinum, en vegna myrkurs og of mikillar fjarlægðar sá ég ekki tegundina, en taldi víst að þetta væru músarindlar sem eru hér af og til á sveimi, enda stærðin svipuð.
En í hádeginu í gær sá í rauðgulan lit á bringu fuglsins sem ég sá nú óvenju vel vegna meiri birtu en dagana á undan og vissi um leið að þetta var Glóbrystingur, enda hafa slíkir fuglar sótt okkur heim áður og einn þeirra sem lét hér lífið var stoppaður upp og er stofuprýði hjá okkur.
Þessir litlu vinir okkar þyrftu á því að halda að veðurguðirnir væru okkur hliðhollir svo þeir lifi veturinn af, en varla er von til þess....þó alltaf megi maður halda í vonina !

Gott vetrarveður - í upphafi Þorra !

2011-01-23T08:27:00.000-08:00

Í þetta sinn slepptum við því að fara á þorrablótið sem haldið var hér í gærkvöld.
Vegna heilsufars húsbóndans vorum við heima í rólegheitum og snæddum þorramat, lásum og horfðum á sjónvarp meðan margir bæjarbúar skemmtu sér í Herðubreið.
En veðrið þessa helgi hefur verið einstaklega gott, og 7-9 stiga hiti, svo snjór og hálka er smám saman að hverfa. Við brugðum okkur því smá rúnt í blíðunni til að kanna fuglalíf fjarðarins og anda að okkur hreinu lofti.
Við kláruðum líka að taka niður jólaseríur sem voru utandyra og sáum þá afar fallegt sólarlag út við fjarðarmynnið, en nú er tæpur mánuður þar til sólin verður farin að sjást hér um allan bæ á ný, eftir 4ra mánaða fjarveru í vetur.
Þá verður nú glatt á hjalla og sólarkaffi drukkið í hverju húsi bæjarins :)
The weather has been rather bad the last few weeks, but this weekend as well as the last one too, have been very nice. Even we still can´t see the sun downtown we can see it on the mountains and we look forward to see the sun down here again after 4 months away this winter...

Töfraheimur frosts og funa !

2011-01-16T16:22:00.001-08:00

Það eru forréttindi að ferðast í jafn fallegu veðri og við gerðum í dag, um öræfi landsins. Þegar himininn er heiður og sólin skín á fannhvíta jörð í 15 stiga frosti og hrímþoku, þá verður umhverfið meira og minna eins og töfraveröld sem ekki er hægt að lýsa með myndum nema að litlu leyti.
Það glitraði allt og lá við að maður fengi ofbirtu í augun og ég gat ekki stillt mig um að smella af myndum í allar áttir, þó árangurinn væri ekki eins góður ég hefði kosið, enda kann ég takmarkað á nýju myndavélina okkar, sem á víst að geta tekið spes góðar myndir ef rétt er með farið.
Ég hef aldrei tekið eftir því að Jökulsá á Fjöllum verður eins og úfið hraun á að líta í slíkum vetrarham, því hvergi sést í vatn, aðeins klaka og snjóhröngl sem lítur út eins og hraun sem snjór hylur.
On our way from Húsavík to Seyðisfjörður last sunday we got a lovely sunny day and even it was freezing (-15°) it was so beautiful to see the snow glittering like diamonds all over. It was very special and no photo can show it like it really is !!!

Góð ferðahelgi !

2011-01-16T16:07:00.000-08:00

Þó að Rúnar minn hafi verið svo óheppinn að rifbeinsbrjóta sig einu sinni enn, þá var hann nógu hress til að koma með mér norður til mömmu, því veðurspáin fyrir helgina var óvenju góð og ég hef reynt að sleppa ekki góðri ferðahelgi til að skreppa til hennar, eigi ég þess nokkurn kost.
Eins og svo oft áður vorum við sérstaklega heppin, því sólin skein alla helgina og við gátum farið rúnt um bæinn með mömmu og notið fegurðarinnar sem býr í snævi þöktu landinu þegar geislar sólarinnar lýsa það upp.
Bærinn er að hluta til í vetrardvala eins og sjá má á hvalabátunum sem kúra á legunni í höfninni, umvafðir seglum gegn vetrarveðrunum.
En það var líka gaman að sjá Húsvíkinga fjölmenna í skíðalyftuna sem stendur við lóðamörkin á framhaldsskólanum og örstutt frá mínu gamla heimili í brekkunni.
Fyrsta Þorrablót ársins var haldið í íþróttahöllinni á laugardagskvöldið og var mjög skemmtilegt að sögn góðra vina sem þar voru staddir...
Á leiðinni heim ókum við fram á nokkra tugi hreindýra sem voru að narta í gróður við vegbrúnina á Jökuldalsheiðinni, en tóku á sprett þegar bíllinn nálgaðist.
We had lovely weekend in Húsavík, visiting my mom and some friends as well. We got lovely weather, sunny days and it makes holidays always so nice. Here are some photos taken from different points of view in town like it is now in t he middle of winter :) On our way back home we saw 60-80 rendyr up on the mountains, trying to find some grass to eat by the road, it´s always nice to see those beautiful animals wild in the nature and a big wonder how they can survive in all this snow for such a long winter...

Gömul GULLKORN !

2011-01-11T15:19:00.000-08:00

Mér datt í hug að setja hér gamalt efni til tilbreytingar, en ég útbjó vefsíðu fyrir ca. áratug, en glataði henni fyrir nokkrum árum þegar við skiptum um netþjónustu.
Hér koma nokkur af þessum gullkornum sem ég hafði safnað og held ennþá mikið uppá:

ÞROSKI felst í því að elska óháð væntingum !

SANNLEIKURINN breytist ALDREI, hann er ÓHAGGANLEGUR !

Það er HUGURINN sem ávallt byggir allt !

Skuggarnir eru GJAFIR KÆRLEIKANS eins sannarlega og ljósið er það

EKKERT er sterkara en VILJI mannsins !

Góðar bækur geta aðeins vísað veginn, lærdómurinn er í ÞÉR sjálfum !

EKKERT er fljótara en HUGUR MANNSINS !

Allt sem þér vitið um Guð, himinn og helvíti, er í yðar eigin sjálfi !

ALLIR eru jafnir fyrir LÖGMÁLI GUÐS !

Dæmdu ALDREI mannveru eftir líkamlegri heilsu eða útliti !

ANDLEGI VILJINN er AFLIÐ SJÁLFT !

Óttinn er eins og strokleður sem þurrkar út það góða sem við viljum gera

Þeim sem TRÚIR er enginn hlutur ómögulegur !

Enginn vísindamaður getur krufuð kærleikann eða skapað fræ sem blómstrar lífi !

HIMNARÍKI er ásigkomulag vitundarinnar !

Helmingur af öllum okkar meinum á upptök sín í huga mannsins einum !

KÆRLEIKURINN er eina vopnið sem við þurfum í lífinu !

Í náttúrunni er hvorki um umbun né refsingu að ræða, aðeins AFLEIÐINGU !

ÞEKKINGIN er eins og TRÉ sem er lengi að vaxa !

GUÐ táknar óendanleikann !

Óveður og ófærð á nýju ári ....!

2011-01-09T03:07:00.000-08:00

Það verður að segjast eins og er að veðrið og ófærðin á þessu nýja ári hefur verið með eindæmum leiðinlegt. Eini dagurinn sem var sæmilega fært bæði fyrir bíla og flugvélar var 5. jan. en þá fóru einmitt öll börnin okkar, tengdadóttir og barnabörnin til síns heima. Strákarnir og Hildur lögðu af stað fyrir hádegi og óku suðurleiðina sem var auð nánast frá Fáskrúðsfjarðar- göngunum og suður. En ég keyrði Jóhönnu og börnin í flug síðdegis og rétt komst klakklaust til baka, því ekki sá á milli stika í kófinu, þó ekki væri mikil ófærð, þá var blindan stundum svo mikil að maður varð að stoppa og bíða. Og ófærðin hér í bænum er líka leiðinleg og tilgangslaust að reyna að moka, því það snjóar jafnóðum yfir allt. Það kom líka rigning og asahláka ofan í snjóinn sem gerði auðvitað illt verra, því það stóð svo stutt að það gerði ekkert gagn.
En ekki hef ég þurft að kvarta yfir mjólkurskorti eða vöruleysi, því ég er HOME ALONE og þarf ekki mikið, svo ófærðin hefur ekki áhrif á mig þess vegna, eins og suma aðra.
Í gær kvöddum við líka aldursforseta bæjarins hana Fíu okkar sem var á 98. aldursári og merkilegt nokk, ég komst á bílnum til kirkju, því búið var að skafa helstu götur, en veit ekki hvort ráðlegt er að reyna að hreyfa hann í dag, því svo hefur bætt á snjóinn í nótt og ekkert mokað hér í okkar götu ennþá, hvað sem verður ???
Ég vorkenni öllum fuglunum sem þurfa að hýrast úti þessa löngu, köldu og dimmu daga og hafa lítið eða ekkert æti, svo ég ber út daglega fóður handa þeim, mest korn og brauð en einnig þá fitu sem fellur til á heimilinu og epli fyrir þá fáu þresti sem eiga leið um, en einn svartþröstur dvaldi hjá okkur hálfan des. og gráþröstur hefur séðst hér eftir áramótin, en lítið borið á öðrum flækingum....

Áramótin 2010-2011

2011-01-09T02:59:00.000-08:00

Áramótaveðrið var ljómandi gott. Kvöldið hófst á Kalkúnaveislu og eftirrétti, en síðan var ekið inn fyrir Langatanga til að fylgjast með brennunni og flugeldasýningunni sem var að þessu sinni staðsett við Þórsmörk. Þegar við komum aftur heim var horft á Skaupið eins og venjulega, en síðan drifum við okkur með 1 tertu í kaffi til Kristrúnar og Birgis eins og undanfarin ár og þar var mikil flugeldaskothríð um miðnættið. Adam litli fékk meira að segja að halda á neyðarblysum með afa sínum og var stoltur af og skemmti sér vel eins og strákar Ástu Guðrúnar og Símonar.

Fjölskylduveisla og jólaball

2010-12-27T15:30:00.000-08:00

Binna frænka Rúnars hefur verið mjög dugleg að hafa jólakaffi fyrir stórfjölskylduna undanfarin jól. Allt sem við gerum er að mæta með eina köku eða annað meðlæti og njóta samvistanna. Það gerðum við einnig þessi jól eða á 2. í jólum. En þá vildi svo til að Lion var á sama tíma með sitt árlega jólaball og auðvitað urðum við líka að kíkja þangað með börnin. Það gekk allt saman vel og flestir virtust hafa gaman af, bæði undir og eldri :) Þessi jól eru nefnilega sannkölluð atvinnurekendajól, því aðeins er um 2 langar helgar að ræða en annars venjulegir vinnudagar þar á milli.