Það liggur við að stór skemmtiferðaskip séu hér í höfn daglega og oft 2 í einu og jafnvel 3 af og til. Það þýðir að bærinn er meira og minna fullur af ferðafólki alla daga og nóg að gera hjá veitingastöðum og fleirum sem þjónusta gestina meira og minna.
Undanfarið hefur verið mikið æti fyrir fugla hér í firðinum og fjöldi þeirra hér inn við bæ verið mikill. Einn daginn var smábátahöfnin full af smásíld og bæði fuglar og fólk kepptist við að háfa þessi kríli. Við fórum og Rúnar veiddi nokkrar sem við djúpsteiktum og reyndust þær góðar og líkar loðnu !
Tvær gæsir voru merktar hér á golfvellinum með rauðum borðum um háls þeirra og á eina var settur sendir. Við höfum séð og myndað þessar 2 með rauðu hálsana, en þá þriðju höfum við ekki séð enn.
Nú eru allskonar ungar komnir á kreik, hjá gæsum, æðarkollum og skógarþröstum svo eitthvað sé nefnt. 2 skógarþrastahreiður a.m.k. eru hér við húsið og ungar úr þeim komnir á kreik í garðinum hjá okkur <3
19. júní mætti Norræna með dauðan skíðishval framan á stefninu. Hann var fjarlægður og siglt með hann út úr firðinum, því hann var víst ekki ætur...
Fárra daga dvöl Bergþórs, Nínu og Dodda hjá okkur á Seyðisfirði eftir dvölina á Húsavík. Ýmislegt var skoðað, því veðrið var býsna gott og göngutúrar farnir, spilað og fundið uppá ýmsu <3
Við fórum til Húsavíkur í byrjun júní til að hitta þar Bergþór og börnin hans sem komu norður stuttu á eftir okkur. Við notuðum dagana vel, fórum í veiðitúr í Bjarmaland og kíktum í Ásbyrgi og fundum auk þess býsna stórt dáið lamb, sem hefur líklega orðið viðskila við móður sína í hretinu um daginn ? <3
Síðustu vikur hafa árlegir farfuglar streymt til okkar í fjörðinn og glatt okkur í góða veðrinu sem hefur verið hér óvenju mikið þetta vorið. Fyrst komu gæsirnar og Tjaldar og síðan aðrir árlegir sumargestir eins og Kríur, Spóar, Jaðrakanar, Maríuerlur o.s.frv. Helsingjar, Margæsir og Rauðbrystingar eru líka komnir og margir farnir áfram til Grænlands.
Kiddi Óskars hringdi til okkar og lét vita að brotist hefði verið inn í torfgeymsluna við Hlíð á Húsavík. Við ákváðum því að renna norður og reyna að bjarga málinu í 3ja sinn. Það tók Rúnar meira en hálfan dag að laga brotinn hurðakarminn og laga annað sem laga þurfti. Ég dundaði á meðan við að stinga upp þúsundir af fíflum á lóðinni og slá hana síðan. Nokkrir kunningar og vinir kíktu til okkar, m.a. Anna Ragg, Sturla Þorgríms og Kiddi sjálfur. En svo birtist Árni Bjössa Sör með hund í göngutúr og spjallaði við mig nokkra stund. Við kíktum svo til Jónda og Zakka kvöldið áður en við fórum aftur austur. Á heimleiðinni skruppum við niður á Vopnafjörð og heilsuðum uppá Halla Má sem er þar í tímabundinni geymslu á heilsugæslunni þar. Á bakaleiðinni sáum við 2 hópa af hreindýrum (alls 35 dýr) og veðrið var svo gott, að hitinn var meira og minna 19 gráður á leiðinni og fór upp í 22 gráður á Héraði og víðar.
Við skelltum okkur tímanlega til Noregs, til Jóhönnu og fjölskyldu, því einkadóttir hennar fermdist 3. maí og Siggi Birkir mætti líka, svo það var fullt hús þegar allir voru mættir. Siva frænka bauðst til að hafa veisluna í þeirra STÓRA húsi, sem kom sér mjög vel og gekk ágætlega, en nóg var að gera við undirbúning dagana á undan. Auk þess var Sumaya að keppa í handbolta og hennar lið stóð uppi sem sigurvegari fáum dögum fyrir ferminguna. Við lögðum til ísl. flatbrauð með hangikjöti + r. silung og keyptum fermingartertu sem smakkaðist ágætlega :)
Veðrið var óvenju gott seinni hluta mars og fyrrihluta apríl, svo jörð varð auð og allur gróður að springa út. En auðvitað hlaut að koma einhver páskagusa, þó það hefði getað verið verra, því hitinn var um frostmark. Hópar farfugla voru komnir og náttúran öll að lifna við, svo viðbrigðin voru mikil :(
