Heimsókn Bergþórs og barna hans til Seyðisfjarðar !

 Fárra daga dvöl Bergþórs, Nínu og Dodda hjá okkur á Seyðisfirði eftir dvölina á Húsavík. Ýmislegt var skoðað, því veðrið var býsna gott og göngutúrar farnir, spilað og fundið uppá ýmsu <3

Hittingur á Húsavík og sitt lítið af hverju þar um slóðir !

 Við fórum til Húsavíkur í byrjun júní til að hitta þar Bergþór og börnin hans sem komu norður stuttu á eftir okkur. Við notuðum dagana vel, fórum í veiðitúr í Bjarmaland og kíktum í Ásbyrgi og fundum auk þess býsna stórt dáið lamb, sem hefur líklega orðið viðskila við móður sína í hretinu um daginn ? <3 

Sandlóuhreiður séð í fyrsta sinn !

 

Við höfum aldrei fyrr séð Sandlóu-hreiður og eggin þeirra, þau eru pínulítil <3 

Flestir árlegir farfuglar mættir í fjörðinn !

 Síðustu vikur hafa árlegir farfuglar streymt til okkar í fjörðinn og glatt okkur í góða veðrinu sem hefur verið hér óvenju mikið þetta vorið. Fyrst komu gæsirnar og Tjaldar og síðan aðrir árlegir sumargestir eins og Kríur, Spóar, Jaðrakanar, Maríuerlur o.s.frv.  Helsingjar, Margæsir og Rauðbrystingar eru líka komnir og margir farnir áfram til Grænlands.

Vinnuferð til HÚSAVÍKUR !

 Kiddi Óskars hringdi til okkar og lét vita að brotist hefði verið inn í torfgeymsluna við Hlíð á Húsavík.   Við ákváðum því að renna norður og reyna að bjarga málinu í 3ja sinn. Það tók Rúnar meira en hálfan dag að laga brotinn hurðakarminn og laga annað sem laga þurfti. Ég dundaði á meðan við að stinga upp þúsundir af fíflum á lóðinni og slá hana síðan. Nokkrir kunningar og vinir kíktu til okkar, m.a. Anna Ragg, Sturla Þorgríms og Kiddi sjálfur. En svo birtist Árni Bjössa Sör með hund í göngutúr og spjallaði við mig nokkra stund. Við kíktum svo til Jónda og Zakka kvöldið áður en við fórum aftur austur.           Á heimleiðinni skruppum við niður á Vopnafjörð og heilsuðum uppá Halla Má sem er þar í tímabundinni geymslu á heilsugæslunni þar. Á bakaleiðinni sáum við 2 hópa af hreindýrum (alls 35 dýr) og veðrið var svo gott, að hitinn var meira og minna 19 gráður á leiðinni og fór upp í 22 gráður á Héraði og víðar.

Sumaya Rós fermist í Noregi !

 Við skelltum okkur tímanlega til Noregs, til Jóhönnu og fjölskyldu, því einkadóttir hennar fermdist           3. maí og Siggi Birkir mætti líka, svo það var fullt hús þegar allir voru mættir.  Siva frænka bauðst til að hafa veisluna í þeirra STÓRA húsi, sem kom sér mjög vel og gekk ágætlega, en nóg var að gera við undirbúning dagana á undan. Auk þess var Sumaya að keppa í handbolta og hennar lið stóð uppi sem sigurvegari fáum dögum fyrir ferminguna. Við lögðum til ísl. flatbrauð með hangikjöti + r. silung og keyptum fermingartertu sem smakkaðist ágætlega :) 

Snjó-hret á auða jörð eftir einmuna blíðu !

 Veðrið var óvenju gott seinni hluta mars og fyrrihluta apríl, svo jörð varð auð og allur gróður að springa út. En auðvitað hlaut að koma einhver páskagusa, þó það hefði getað verið verra, því hitinn var um frostmark. Hópar farfugla voru komnir og náttúran öll að lifna við, svo viðbrigðin voru mikil :( 

Fótboltamót á landsvísu á Akureyri um miðjan mars !

 

Helgina 14.-16. mars fórum við norður til Akureyrar að hitta Bergþór okkar og fjölskyldu hans,          því Þorsteinn var að keppa í fótbolta ásamt félögum í íþróttahöllinni þar. Við gistum hjá þeim í 

bústað þar sem nokkrar kanínur héldu til og glöddu krakkana.

Gummi á Bakka óheppinn !

 

Gummi á Bakka slapp með skrekkinn þegar hann lenti útaf á jeppanum um daginn

og eyðilagði han alveg, eftir að Rúnar hafði gert við hann skömmu áður :(

Norræna mætt á ný eftir árlega miðsvetrar fjarveru !

 

19. mars. Ferjan Norræna mætti hingað aftur eftir árlega "vetrarpásu" 

og veðráttan undanfarið verið óvenju mild miðað við árstíma. 

Frekar snjóléttur vetur það sem af er !

 

Það hefur verið lítið um snjó sem betur fer, eftir að við komum heim frá Kanarý, en þó að frost hafi verið með minna móti, þá hefur víða verið hægt að sjá svona klakastrá við ár og læki :) 

SÓLARFRÍ Í SKAMMDEGINU !

 

Til að stytta langan, dimman og kaldan vetur, þá ákváðum við að skreppa til Kanarý í 3 vikur eins og fyrir ári síðan og dvöldum aftur á sama Victoria (Bull) hótelinu í fullu fæði í herbergi 822 á efstu hæð. Við hittum marga Íslendinga sem við þekktum og fleiri sem við þekktum ekki.

Vorum dugleg að fara daglega í gönguferðir og sóla okkur þess á milli. 

Fórum líka oft á minigolfvöllinn að hitta fólk og ná í bækur til að lesa !

Vetur í bæ !

 Þann  18. janúar fór að snjóa svo um munaði og kostaði mikinn mokstur og vesen. En 2 dögum síðar kom stórhríð og allt fór á kaf, svalirnar fylltust af snjó hátt uppá stofuglugga og snjórinn á þaki Gróðurhússins var svo blautur og þungur að hann næstum sligaði þakið. Ég náði að sópa ofan af því, áður en það brast, en feðgarnir náðu að moka svalirnar, því ég hjálpaði lítið til þar. Bara það að moka slóð undir svalirnar svo hægt væri að fóðra vetrarfuglana þar svolítið á hverjum degi, var meira en nóg puð.

Útför Svanbjargar Sigurðard. frá Hánefsstöðum

 Á milli hátíðanna lést Svanbjörg Sigurðard. á Hánefsstöðum, en ég hafði hitt hana daglega um miðjan desember, því ég tók að mér að lesa fyrir hana gamalt handrit sem hún gat ekki lesið sjálf og sá hana í síðasta sinn skömmu fyrir jól. Ég er henni þakklát fyrir allar góðu samverustundirnar á liðnum árum.  Útför hennar fór svo fram í dag, 8. janúar að viðstöddu margmenni.

Jólin okkar 2024 !

 Jólahátíðin leið furðu fljótt og þrátt fyrir frost og kuldanæðing, þá var snjór í lágmarki og því fært um allt, þó ekki væru nein ferðalög á milli okkar og ættingjanna þessi jólin. Við höfðum það því óvenju rólegt að þessu sinni og dunduðum okkur við að pússla erfitt púsl og lesa þessa daga.