Norðurferð og Mærudagar á Húsavík

Við urðum samferða Diddu systir og hennar fjölskyldu norður og áttum þar góða daga saman á Mærudögum. Veðrið var nokkuð gott og þröngt máttu sáttir sitja í Hlíð. Við hittum marga góða og gamla vini og ættingja og hlökkum til að koma aftur norður, því þetta var of stutt stopp fannst mér !
Litla Guðrún Ásta hennar Rebekku var að koma norður í fyrsta sinn og undi sér bara vel með elskan litla :)

Sonarsonur fæddur í Reykjavík !

Þann 22. júlí fæddist 17 marka myndarlegur sonarsonur á fæðingardeild Landspítalans og gekk fljótt og vel, loksins þegar hann fór af stað. Á meðan við biðum nutum við samvista við sonardótturina Nínu Björgu sem sannarlega lífgar upp á tilveruna með nærveru sinni :) Hún er mjög dugleg að borða og það var gaman hjá okkur í Húsdýragarðinum og róló og víðar og svo söng hún og dansaði fyrir okkur afa í 60 ára gömlum kjól af Sollu ömmu !!!

Ekið suður á land !

Bergþór sonur okkar og barnsmóðir hans og sambýliskona áttu von á barni í kringum 20. júlí, svo við drifum okkur suður til að vera nærstödd þegar litli maðurinn kæmi í heiminn.

Veðrið var óvenju gott á leiðinni (miðað við sumarið hér eystra) og ég alltaf með myndavélina á lofti, enda nóg af fallegu og áhugaverðu myndefni sem segir meira en mörg orð :)

Landsþing Lions á Seyðisfirði.

Lion hélt Landsþing sitt hér á Seyðisfirði á vordögum og var þá mikið um dýrðir og mikil vinna á bakvið þetta fjölmenna mót. Ég hitti nokkra Húsvíkinga eins og við mátti búast og við í kórnum sungum fyrir gestina á aðalkvöldinu og öll gistirými í bænum voru bókuð, svo eitthvað sé nefnt :)

Leikskólinn Sólvellir 40 ára !

Leikskólinn Sólvellir hélt upp á 40 ára starfsafmælið á vordögum og tókst það með ágætum eins og við mátti búast. 

Bókasafnið vorið 2015.

Það voru ýmsi verkefni í gangi hjá mér á bókasafninu síðari hluta vetrar. Ég hélt áfram að bæta við hillum í geymsluna og grisja gamlar bækur þangað inn. Til að fjölga hillunum á safninu, þá keypti ég 2  samstæður undir fræðibækurnar og gat flutt til eina hillusamstæðu, svo meira pláss varð til. 

Svo var aðal salurinn á safninu málaður, því ekki hafði unnist tími til þess þegar hinir 2 hlutar safnsins voru teknir í gegn fyrir fáum árum og allt þrifið í hólf og gólf, líka gömlu myndirnar á veggjunum. Fastir liðir voru svo vikulegar heimsóknir leikskólabarnanna og gekk það vel með einni smá undantekningu, þegar þau veltu afgreiðsluborðinu á hliðina, en það fór allt vel, sem betur fer :)

Varadero - fyrir ferðamenn !

Ströndin við Varadero á skaganum sem er hlaðinn túristahótelum er hvít og falleg og þar er hægt að sóla sig í næði, njóta návistar fallegra og gæfra fugla sem fengu sér bað með okkur og borða á sig gat, ef maður hafði lyst, en ég var aðallega þyrst í hitanum og var dugleg að drekka ananassafa og Pina Colada sem var drykkurinn minn í þessari ferð :)

Sveitaferðirnar !

Við heimsóttum tóbaksekrur og fleiri athyglisverða staði í einni ferð en síðasta ferðin var sjóferð til að snorka á fiskislóð og heimsækja tamda höfrunga sem léku listir sínar. Að lokum snæddum við risasstóra humarhala sem gaman var að smakka einu sinni :)

Skoðunarferðir um Kúbu

Það er margt að sjá á Kúbu sem er ólíkt lífinu hér heima á Fróni og við vildum sjá sem mest á þessum stutta tíma sem við höfðum og fórum því í 4 ferðir. Fyrsta ferðin var borgarferð um Havana og heimsókn í vindlaverksmiðju. Svo fórum við aðra ferð til að skoða heimili Ernest Hemingways og sáum ýmislegt á leiðinni, bæði ríkidæmi og fátækt. Að sjálfsögðu fórum við á Byltingartorgið og skoðuðum Kristsstyttuna stóru við fyrrum heimili Che Guevara.

Vikuferð til Kúbu !

Það er ekki daglegt brauð að skreppa í langferðir, hvað þá yfir 5 tímabelti eins og við gerðum þegar við flugum til Kúbu þann 23. febrúar s.l. Þar tók á móti okkur notalegur hiti og sumarveður, en einnig mikil fátækt, óreiða og betl sem erfitt er að hafa í kringum sig til lengdar, án þess að gera eitthvað róttækt, sem líklega er erfitt á þeim slóðum.
Myndir segja oft meira en þúsund orð, svo ég læt hér nokkrar slíkar af mannlífinu og bílaflotanum sem er sannkallað fornbílasafn í Havana. Við keyptum okkur tíma bæði í fótknúnum farkosti og gömlum fallegum fornbíl, greiddum gjald fyrir myndatökur, ýmist í peningum, sælgæti eða penna/blíöntum sem við tókum með okkur.

Viskubrunnur 2015

Hin árlega spurningakeppni Seyðisfjarðarskóla, VISKUBRUNNUR var haldin eftir Þorrablót og urðu úrslitin ekki svo óvænt. Það er alltaf gaman að fylgjast með hvernig gengur og um leið að styrkja unga fólkið sem er að safna fyrir skólaferðalaginu sem elstu bekkingar fá að fara í áður en skyldunámi þeirra lýkur hér heima.

Þorrablótið 2015

Þorrablótið 2015 fór fram með glæsibrag að vanda, fyrstu helgi í Þorra.
Skemmtiatriðin voru óvenju brosleg án þess að meiða mikið :)
Við sleppum ennþá við að lenda í næstu nefnd, þó það geti verið mjög gaman, þá er það líka tímafrekt og bindandi um tíma.

Slóð á Húsvíkinga ;)

https://www.youtube.com/watch?v=Yy__QUehRQ8&feature=share

Góð vísa eftir Sigurlín Hermannsd. sem ég fann á Boðnarmjöð.
Hún passar svo vel þegar þegar okkar íslenska veðrátta er leiðinleg ;)

Nú er úti rok og regn
raunar fátt sem gleður.
Alveg er það mér um megn
að mæra svona veður.

Slóð á gamlar Húsavíkurmyndir sr. Arnar Friðriks

http://www.husmus.is/index2.php…

Önnur myndaslóð á Ljósmyndasafn Rvk !

http://ljosmyndasafn.reykjavik.is/fotoweb/Grid.fwx

Slóð á gamlar ísl. ljósmyndir :)

https://www.flickr.com/photos/reykjavikmuseumofphotography/with/8090400543/

Jólin 2014

Þessi jól voru að sumu leyti óvenjuleg. Veðrið var mjög gott og fallegur jólasnjór, en mikil hálka, en bannsett pest geysaði og við lögðumst öll flöt hvert á eftir öðru með tilheyrandi lystarleysi, svo ekki var mikið borðað hjá okkur þessi jólin !  -    Christmas 2014 in Seydisfjordur with our granddaughter Nina Björg and her parents :)

Suðurferð fyrir jólin !

                                                           Our granddaughter Nina Björg

                                                    My sister became a grandmother :)

                                            The eruption at Holuhraun in November !

Við brugðum okkur suður mánuði fyrir jól, því mörg erindi áttum við, enda ekki komið suður síðan í fyrravetur. Systir mín var nýorðin amma en einkadóttir hennar var að skíra sitt fyrsta barn. Við versluðum auðvitað jólagjafir og hittum flesta ættingja og marga vini, auk þess sem við sáum eldgosið í Holuhrauni á leiðinni heim. Það leit nánast út eins og uppljómaður bær eða borg :)

                               The volcano in Holuhraun in the end of November 2014.

Sérstakt myndband !

http://www.hun.is/litli-drengurinn-sem-hefur-lifad-adur-heimildarmynd/