Á heimleið !

Þegar við komum til baka frá Noregi, stoppuðum við í nokkra daga hjá Bergþóri okkar og fjölskyldu og vorum mikið með barnabörnunum. Við fórum m.a. með Nínu á sýningu Brúðubílsins í Árbæ þar sem hátt í 3000 manns mættu. Einnig var mikið farið á leikvelli og fleira. Fórum líka til Ellu mágkonu í mat og hittum þar Hörpu mágkonu og Önnu Þorsteins, auk fjölskyldunnar. Þorsteinn Darri var nýbúinn að eiga afmæli og fékk því 2 gjafir og Nína fékk líka smágjafir í leiðinni :)

Noregsferð 2017

Við skruppum í 11 daga ferð til að heimsækja Jóhönnu okkar og fjölskyldu í Noregi. Þar biðu okkar næg verkefni til að dunda við, m.a. að tína ber, safta og sulta. Svo að pússa, lakka og mála bæði innan húss og utan. Svo fórum við í nokkrar skoðunarferðir m.a. að skoða eldgamlar "höggmyndir" á klettum nærri Fredriksstað sem við heimsóttum líka og snæddum á pizzastað nöfnu minnar. Einnig fórum við í heimsókn til Þrastar og co í Osló og áttum góðan dag með þeim. Við héldum líka uppá 40 ára brúðkaupsafmæli okkar og viðruðum daglega systurhundana Sif og Selmu og tíndum þá oft rauð hindber sem víða mátti sjá í nágrenni heimilis Jóhönnu og co. Veðrið var gott alla dagana og vel hlýtt :)

Miklar rigningar og vatnsflóð !

Dagana 23. og 24. júní rigndi heil ósköp hér á Seyðisfirði, svo allar fjallshlíðar urðu að rennandi lækjum og ám og Fjarðaráin var með stærsta móti og flæddi upp að lóðinni okkar.
Dagmálalækurinn flaut yfir götuna og inn í 3 nálæg hús, svo grafa þurfti skurði í götuna til að hleypa vatninu rétta leið en þá fór í sundur sjónvarps-síma og netkapall fyrir allt hverfið...
Ansi stór aur og grjótskriða féll út við endann á Norðursíld og skemmdi þar 2 hús. Flest hús við lónið sem hafa kjallara fengu flóð þar inn eins og oft hefur gerst áður.
Samt má segja að þetta hafi verið vel sloppið miðað við allt þetta vatnsmagn sem flaut hér til sjávar.

11 nátta ferð til Krítar...

Við ákváðum í vetur að láta loksins verða af því að skreppa til Krítar og keyptum okkur ferð með Heimsferðum 25. maí til 6. júní. Allt gekk vel og við vorum dugleg að fara í skoðunarferðir, nánast daglega, ýmist með jeppum, rútum, lestum eða bátum. Við heimsóttum klaustur, kirkjur, kirkjugarða, lítil þorp, ávaxtadali, bruggverksmiðjur, ólífuverksmiðju, gömlu borgarrústirnar í Knossos og safnið þar. Síðast en ekki síst fórum við í 2 smá siglingar út að eyjunum þar við ströndina og heimsóttum borgina Hania 3var sinnum, bæði í sól og regni.
Heimafólk var mjög yndælt og margt sem við höfðum ekki tíma til að skoða, slepptum m.a. ferð til Santorini, þar sem hún var mjög óhagstæð tímalega séð.
Hér koma nokkrar minningamyndir...

 Munkaklaustur þar sem 4 munkar voru búsettir...

 Kirkjugarður með þúsundum Þjóðverja frá seinni heimsstyrjöld.

 Bruggverksmiðja í kjallara, þar sem þjóðardrykkurinn Raki er bruggaður.

 Vínverksmiðja, þar sem unnin eru vín úr vínberjum eyjaskeggja...

Heimamenn stunda viðarkolabrennslu í stórum stíl að því virtist...

 Gamla borgin Knossos eftir uppgröftinn...

 Safnið með gömlu minjunum frá Knossos...

 Á leið í 2ja tíma siglingu...

 Hægt var að snorka og synda í volgum sjónum ef maður vildi....

Hafnarsvæðið í Hania skoðuðum við þrisvar ásamt miðbæ Hania...

Stutt stopp hjá barnabörnunum !

Á leið okkar til Krítar áttum við stutt stopp með Bergþóri okkar og fjölskyldu í Kópavogi. Við skruppum snögga ferð með þeim í Costco og getum ekki sagt að við værum neitt hrifin af öllum biðröðunum og fleiru sem mér finnst fráhrindandi. Þó stutt væri, þá voru þetta góðar samverustundir og hér koma nokkrar myndir til minningar um það :)

Farfuglarnir streyma til landsins !

Tjaldurinn var fyrsti farfuglinn sem mætti eins og venjulega og dreifði sér meðfram fjörum fjarðarins og meðfram Fjarðaánni að vanda.
Síðan mættu straumendur, grágæsir, stelkar, jaðrakanar, lóur, hrossagaukar og aðrir fastagestir...
Lífið hefur verið um flækinga í vetur og vor og ég ekki náð myndum af þeim fáu sem komið hafa til okkar, nema Margæsum, því miður. Blendingsöndin hefur haldið til hér í allan vetur og fær hún að fljóta með hinum farfuglunum. Stök Súla mætti hér óvænt, líklega veik og fær líka að vera með.

Vorið á næsta leiti...!

Tíðin hefur verið ótrúlega mild í vetur og snjólítið.  Vorið kom fyrr en oft áður og blómin og gróðurinn utan dyra byrjaði strax í apríl að springa út.
Inniblómin voru líka dugleg, meira að segja lifðu allar Chili plönturnar af og byrjuðu að blómstra í mars og krókusarnir úti hafa fjölgað sér furðulega mikið, svo ég þarf að fara að grisja þá !

Páskar án Rúnars !

Bergþór okkar og fjölskylda ákváðu að koma austur um páskana og mættu eins og fyrirhugað var.
En okkur til armæðu þurfti Rúnar að vera á sjó alla páskana, svo hann hitti þau ekkert, en við Siggi nutum samvistanna, ekki síst við börnin sem við hittum alltof sjaldan. Þau voru alsæl þegar þau fundu páskaeggin sem ég faldi handa þeim og gaman að leika úti í snjónum og svo framvegis :)

Dagleg rútína !

Ýmislegt hefur á dagana drifið og margt sem gleymist, en lífið gengur sinn vanagang með Bolludag, Öskudag, sprengidag og aðra daga eins og Downs-daginn. Ég geymdi svolítið af gulrótum í kassa í gróðurhúsinu sem ég tók upp fyrir nokkru og naut þess að borða þær (þó litlar væru). Svo sit ég flest kvöld og hekla barnateppi fyrir RKI fataverkefnið, Föt sem framlag, en við erum nýbúnar að útbúa 19 gjafapakka sem fara til Hvíta Rússlands, ásamt 10 eldri pökkum sem voru tilbúnir. Við Rúnar tæmum fatagáminn á 2ja vikna fresti og svo eru kóræfingar, messur og jarðarfarir, sem þýðir að alltaf er nóg að gera hjá mér :)

Slóð á myndasöfn frá Húsavík

http://husavik.123.is/

List í ljósi !

Laugardaginn 25. febrúar var fyrsti sólardagurinn hér á Seyðisfirði þetta árið (2017).
Mikið var um að vera og veðrið yndislegt.  Hátíðin List í ljósi, sem haldin var nú í annað sinn til að fagna komu sólarinnar, tókst vel í kvöld, í bland við undurfalleg norðurljós sem skreyttu stjörnum skrýddan himinn á sama tíma...

Slóðir á erlendar fornleifar !

https://www.youtube.com/watch?v=DfuCGgs7714