Tenerife 2013

Í lok september fórum við í vikuferð ásamt áhöfn Gullvers til Tenerife. Þar var margt að sjá og gera og auk þess var notalegt að sóla sig og skoða nágrennið. En við skoðuðum meira t.d. fórum við í skemmtilega dagsferð um hálfa eyjuna ásamt 4 félögum okkar og fórum þá m.a. upp á toppinn á hæsta fjalli Spánar sem er El Teide, en þar er loftið orðið ansi þunnt og svalt.

Allur hópurinn fór líka í minigolfkeppni og skemmtum okkur vel þar. Ég var lukkuleg með að vera í sigurliðinu og hafa ekki skemmt neitt fyrir þeim. Svo fengum við okkur notalegt fótabað hjá fiskum og skelltum okkur í fallhlífarsvif meðfram ströndinni, sem var bara skemmtileg reynsla.

Margt fleira væri hægt að telja upp en læt þetta nægja að sinni :)

Uppskeran og afurðir náttúrunnar

Uppskerustörfin voru ekki mikið frábrugðin að þessu sinni, en þrátt fyrir sólríkt sumar, þá reyndist kartöfluuppskeran með minnsta móti, líklega vegna vætuskorts. En gulræturnar sem ég var dugleg að vökva urðu þær langstærstu sem komið hafa upp úr mínum garði. Berjaspretta var með mesta móti og við tíndum fullt af hindberjum sem við höfum aldrei gert áður. Sultan af þeim er líka mjög góð. Svo tíndi ég meira magn af rifsberjum, bláberjum og krækiberjum en áður og bjó til bæði saft og sultur. Loks voru það svo sveppirnir sem voru stórir og góðir hér uppi á klettum í trjálundunum, svo að óvenju mikið er til af vetrarforða hjá okkur að þessu sinni :)

Uppskeruhátíðin Haustroði 2013

Hin árlega uppskeruhátíð Haustroði var haldin hátíðleg í byrjun okt. og náttúran skartaði sínu fegursta um þær mundir. Ég mætti á alla viðburði og keypti eitthvað á flestum stöðum. Það var sérstaklega gaman að kíkja í heimsókn til Þóru á gamla spítalann sem hún er búin að láta breyta í farfuglaheimili, mjög smekklegt og hlýlegt. Ég fylgdist síðan með úrslitum í sultukeppninni (Sigga Stína bar sigur úr bítum). Ég var síðan svo heppin að hljóta verðlaun fyrir hugmynd að minjagrip fyrir Seyðisfjarðarkaupstað, sem vonandi verður að veruleika fyrir næsta sumar. Við vorum þrjár sem fengum verðlaun fyrir góðar hugmyndir :)

Siggi Birkir í Noregi

Siggi Birkir var sendur af vinnuveitanda sínum, ásamt einum vinnufélaga, til Oslo, þar sem þeir unnu að ákveðnu verkefni í 3 mánuði. Þeir voru m.a. að leggja öryggiskerfi í penthouse-íbúð. Um helgar gátu þeir skroppið í heimsóknir og skoðunarferðir og fóru t.d. á heimsmeistaramót í torfæruakstri og höfðu gaman af. Þeir heimsóttu líka Holmenkollen og renndu sér á vír ofan við stökkpallinn, sjá mynd. Svo skrapp Siggi nokkar ferðir í heimsókn til Jóhönnu systur sinnar og hennar fjölskyldu. Þau fóru saman í Vigelandsparken, dýragarð og söfn og kíktu á skemmtileg veitingahús og fleira. Veðrið var gott ytra allan tímann og komu þeir sólbrúnir heim og reynslunni ríkari :)

Grillhátíð á Seyðisfirði

Hin árlega grillhátíð á Seyðisfirði var haldin að venju í ágúst, en viku fyrr en venjulega að þessu sinni og var það bara ágætt að flýta henni. Keppt var um skemmtilega skreytta garða og fleira og víða mátti sjá skemmtilegar skreytingar. Við Rúnar vorum bara tvö að þessu sinni og nutum samvista við Dóru Kristínu og Kristján á grillsvæðinu, sem var sameiginlegt öllum bæjarhlutum að þessu sinni...

Mærudagar á Húsavík

Rúnar dvaldi í 6 vikur í sumar með Gullver í slipp á Akureyri. Ég fór því 2 helgar norður til að geta eytt þeim með honum og var þar svo alla Mæruvikuna ásamt Diddu systur. Við fórum saman út að borða og nutum veðurblíðunnar og þeirra atriða sem boðið var uppá ,eins og ýmsar sýningar, markaður, vísnakvöld og fleira. Mannfjöldi í bænum hefur trúlega tvöfaldast a.m.k. enda öll tjaldstæði full og mikið líf og fjör. Húsavíkurfall var grænt eins og okkar bæjarhluti, reyndar var allt meira og minna grænt þessa góðu daga.

LungA 2013

Það var sumarblíða hér í mest allt sumar og ekki síst þegar LungA hátíðin var haldin á hefðbundum tíma í júlí. Sólþyrstir gestir og heimamenn nutu blíðunnar eins og enginn væri morgundagurinn og málverk spruttu upp á mörgum veggjum, ekki síst út við Norðursíld...

Nokkrir sumargestir :)

Það var býsna líflegt hér um tíma í sumar þegar afkomendur okkur og aðrir gestir komu og dvöldu mislengi. Jóhanna Björg kom í vor með börnin sín í eina viku og Eiríkur og Auður mætti með sín börn á sama tíma. Svo mættu nokkrir gestir sem ekki hafa gist hér áður eins og Guðrún Ólafsdóttir sem átti heima hér á Seyðisfirði á síldarárunum. Einnig systurnar Björg og Fríða frá Húsavík. Ekki má ég heldur gleyma Gulla Benna frænda mínum og vini hans sem gistu hér eina nótt á leið til Færeyja. Fleiri mætti telja, en ég gleymdi að taka myndir af sumum gestunum og læt þetta því nægja, enda nóg annað sem gerðist hér í sumar :)

Nína Björg skírð !

Þann 20. maí (á Annan í Hvítasunnu) var Nína Björg Bergþórsdóttir skírð í Hafnarfjarðarkirkju og gekk það allt mjög vel. Hún var skírð í kjólnum sem ég saumaði þegar ég var 18 ára gömul í Húsó og öll mín börn voru skírð í ásamt fleiri börnum. Fjölskylduveislan var í safnaðarheimilinu við hlið kirkjunnar, svo þetta gat ekki verið þægilegra. Við hjálpuðumst að við að gera allt klárt og fjölskylda og vinir Hildar sáu um veitingarnar, en við Rúnar hjálpuðum til eins og við gátum og nutum þess að fá tækifæri til að hitta ættingja og vini sem annars hefði ekki verið tími til að sjá, því við vorum á förum aftur austur daginn eftir, enda þurfti Rúnar að fara beint á sjóinn og ég í mína vinnu. Um kvöldið var slappað af í heita pottinum eftir góðan dag..!

Tveir dagar í New York

Við komum til New York að morgni dags frá Lima og tókum leigubíl inn á Manhattan þar sem hótelið "okkar" er staðsett aðeins nokkra metra frá Empire State byggingunni. Þar var ákveðið að gista eina nótt og nota tímann vel áður en við færum heim. Veðrið var frábært og við ákváðum að fara í Sightseeingtour um borgina, til að geta séð sem mest á stuttum tíma. Við hoppuðum úr á miðri leið til að skoða hluta af Central Park og fórum úr hjá Dakota byggingunni þar sem John Lennon og Yoko Ono bjuggu (og hún býr þar reyndar enn) en eins og flestir vita þá var John myrtur einmitt fyrir utan þessa byggingu. Við gengum síðan inn í garðinn þar sem sjá má minningar um þennan tíma. Eftir rölt um garðinn héldum við áfram með næsta vagni heilan hring og fórum framhjá ótal þekktum byggingum eins og húsum Sameinuðu þjóðanna... Við höfðum samt ekki tíma til að fara síðari hringinn og ákváðum að geyma það til næsta dags...

Næsta morgunn vorum við mætt kl 8 í biðröðina við Empire State til að komast sem fyrst upp á topp til að sjá útsýnið yfir Manhattan og nágrenni. Við ákváðum svo að fara síðari hringinn og héldum áfram að sjá ótrúlegustu staði sem maður hefur heyrt um og séð í kvikmyndum. Mannlífið á götunum var líka mjög skrautlegt og mikil viðbrigði að vera komin á þennan erilsama stað eftir að hafa verið innan um rólega mannlífið í Perú. Mér fannst athyglisvert að sjá þarna risastór bókasöfn, annað þeirra (rauða byggingin) er háskólabókasafnið, en hitt (með hvítu súlunum) er Borgarbókasafnið sem ég reyndi að fá inngöngu í, þegar við áttum leið þar hjá fótgangandi, en þá var einmitt verið að loka því, svo ég sá mest lítið, því miður. Þessu eina kvöldi eyddum við í gönguferð um nágrennið, þar sem sjá mátti yfirþyrmandi auglýsingaflóð og mannfjöldinn á götunum var eins og síld í tunnu, svo við lá að maður fengi innilokunarkennd.... Við tókum síðan taxa tímanlega síðdegis út á flugvöll til að fljúga heim til Íslands um miðnætti og komum til Keflavíkur snemma að morgni eftir svefnlausa nótt og lögðum okkur því í nokkra tíma áður en næsti viðburður tók við :)