Við höfum haft nóg að gera alla góðviðrisdaga, að safna saman rusli í fjörunum. Höfum staflað spítnarusli í hrúgur þar sem hægt er að komast með bíla + kerrur, en smárusl hef ég tínt í ruslapoka... Boggi og Gunnar Sverris hafa verið duglegir við þetta hreinsunarstarf ásamt fleirum...
https://www.visir.is/g/20212078330d/rax-augnablik-thad-hvarfladi-ekki-ad-mer-ad-hann-vaeri-enn-a-lifi-?fbclid=IwAR0ogpULl2mNP9GMuQxzbZCuLOFpZ2WF1OTnoRoO_q6KrciyauD4H-N8I7U
Eftir aurskriðurnar miklu 18. desember s.l. hefur alls konar rusl flotið upp í fjörurnar hér í firðinum. Við erum búin að fara nokkrum sinnum og tína saman plast, timbur og annað rusl sem við ráðum við, m.a.s. líka járnplötur og safna því saman í hrúgur. Borgþór Jóhanns hefur líka verið einna duglegastur við að safna rusli saman og fjarlægja það, en mikið starf er samt eftir, því ekki er fært ennþá víða um fjörur og bíður því sumt af ruslinu, sérstaklega stærra og þyngra dót eftir vorinu eða að snjóa leysi. Læt hér sýnishorn af rusli og ruslapokum sem við hentum á gámasvæðið...
Mörg undanfarin ár hefur LungA skólinn staðið fyrir ljósahátíð um miðjan febrúar rétt áður en sólin fer aftur að sjást í bænum um 20. febrúar. Það er alltaf gaman að sjá hugmyndaflugið sem birtist í verkunum hverju sinni og heilmikil vinna á bakvið þetta, en þemað að þessu sinni var um Aurskriðurnar og afleiðingar þeirra. Nokkrar myndir sýna fáein verkanna 👪
Mikið hreinsunarstarf hefur nú verið unnið og meira þarf að vinna til viðbótar í bænum eftir aurskriðurnar. Mikið af munum úr horfnu húsunum hefur fundist í leðjunni og verið safnað saman til hreinsunar og skoðunar, því sumt er heilt en annað ónýtt. Fagfólk þarf meira og minna til að meta það og hreinsa munina. Nokkur hús hafa verið úrskurðuð óhæf til að búa í þeim, eins og Garður og Landamót. Búið er að byggja varnargarða fyrir ofan hluta af byggðinni sem er í mestri hættu og allt gert til að tryggja sem mest öryggi og leysa vanda fólks sem býr á verstu svæðunum...
Nýja árið hófst nú ekki beint vel, því veðrið hefur sveiflast til og frá með stórhríðum og ófærð og roki og frosti, en hefði líka getað verið verra, því víða urðu skemmdir um landið, en Seyðfirðingar sluppu þokkalega frá þessu veðri, þó bátar, bílrúður og fleira hafi brotnað 😃
Þetta Covid ár er búið að vera erfitt fyrir jarðarbúa og þó við séum einangruð hér og laus við smit og veikindi, þá verðum við að hlýða öllum reglum, með grímur + sóttvarnir og fjarlægðir við fólk. Jólahátíðin var því fámenn að þessu sinni og ekki allir bæjarbúar komnir heim til sín eftir skriðurnar. Engar messur voru um jólin og engin kaffiboð. En á gamlaárskvöld var ákveðið að allir slepptu kaupum á flugeldum, en keyptu í staðinn friðarkerti af Björgunarsveitinni og mættu með þau niður að Lóninu og loguðu þau þar í kring alla nóttina. Þetta var mikið fallegra en rakettur og allir virtust ánægðir og sáttir með friðinn og hreina loftið, enda veðrið eins og best var á kosið...
Um miðjan desember fór að rigna óeðlilega mikið, sólarhringum saman og nokkrar aurskriður fóru að renna niður að bænum. Það gerðist síðan eftir mikið úrhelli, að föstudaginn 18. des. hrundi gríðarstór aurskriða niður yfir Búðareyrina og eyðilagði meira en 10 hús, þar á meðal stóran hluta af smiðjuhúsunum og Turninn, auk nokkurra íbúðarhúsa í nágrenninu. Það kraftaverk varð að allir lifðu af þessar hörmungar, en allir íbúar bæjarins voru sama dag reknir úr bænum og fengu flestir samastað á Egilsstöðum og nágrenni. Við sem búum á öruggum svæðum í bænum fengum að fara heim eftir 2 sólarhringa en aðrir fengu að sækja það sem þá nauðsynlega vantaði og bíða eftir leyfi að fara heim. En framundan verður mikið og erfitt hreinsunarstarf og uppbygging, sem vonandi gengur að óskum !
Það hefur verið árlegur viðburður nokkra undanfarna vetur að litlir Glóbrystingar hafi mætt til okkar og verið hjá okkur á fóðrum lengur eða skemur, öllum til ánægju. Einn slíkur birtist núna 5. des. 2020 og er hér enn rétt fyrir jólin. Einnig eru svartþrestir hér ennþá, en lítið um aðra smáfugla.
Í tilefni dagsins bakaði ég pönnukökur og setti á 1 tertu. Við fórum engan hjólatúr í dag, því það hvessti svo mikið og fór að dropa smávegis. Fórum bara fuglarúnt, því Rúnar sá Gráhegra hér í gærmorgun og við erum búin að leita mikið, en finnum hann ekki. Heiðar Þorsteins sá hann á flugi yfir bænum í dag, svo hann er trúlega hér enn í felum ? Rúnar kaus að elda nýjan kjúklingarétt sem smakkaðist ágætlega, þannig að við erum södd eftir daginn og vonandi hænurnar - nágrannar okkar, sem ég hef verið að passa síðan í gær :)
Gulrótauppskeran er býsna mikil og meiri en við getum torgað jafnóðum og tekið er upp. Ég geymdi því stóran hluta í moldinni, því tíðin hefur verið nógu góð í haust. En ákvað nú um mánaðarmót nóv-des að taka ríflega upp og setti heilmikið í sanddall í kalda bílskúrinn, en ætla að geyma restina úti, undir þykku plasti og yfirbreiðslu í von um að komandi ótíð eyðileggi þær ekki :) Þess má að lokum geta að ég er búin að fá þrisvar sinnum "tvíbura"gulrætur samvafðar :)
https://www.google.com/maps/place/Iceland/@65.9306433,-16.5272249,2416m/data=!3m1!1e3!4m5!3m4!1s0x48d22b52a3eb6043:0x6f8a0434e5c1459a!8m2!3d64.963051!4d-19.020835
Sum haust verður náttúran einstaklega falleg og fjölbreyttir litir út um allt. Hér eru nokkur sýnishorn :)
Í vor setti ég niður kartöflur, gulrótarfræ, spínatfræ og fleira grænmeti að venju. Nú er kominn uppskerutími og um leið að tína ber og sveppi til að frysta fyrir veturinn og búa til sultu og saft.
Það hefur lengi staðið til að rölta yfir í Stapavík sem er norð-austan við Unaós. Veður var gott 26. ágúst svo við ákváðum að drífa okkur af stað með nesti og hlýlega klædd til öryggis. Leiðin reyndist falleg, en skelfilega erfið gönguleið eftir nýjum grófum gangstígum sem vont er að ganga eftir. Við vorum því ansi þreytt er við komum til baka í bílinn....
Í byrjun ágúst var veður hagstætt til að fara í viðgerðir á þakinu á Hlíð og Didda systir og Rúnar hennar gátu komið norður, svo við skelltum okkur ásamt Sigga okkar og rifum 1/4 af þakinu og skiptum um bæði burðarbita og allt timbur, enda allt orðið fúið og löngu tímabært að laga það, þó ekki væri tími fyrir meira, nema við Siggi skröpuðum tröppurnar og máluðum þær hvítar, því rauða litinn var ekki hægt að fá....
