Dagleg rútína !

Ýmislegt hefur á dagana drifið og margt sem gleymist, en lífið gengur sinn vanagang með Bolludag, Öskudag, sprengidag og aðra daga eins og Downs-daginn. Ég geymdi svolítið af gulrótum í kassa í gróðurhúsinu sem ég tók upp fyrir nokkru og naut þess að borða þær (þó litlar væru). Svo sit ég flest kvöld og hekla barnateppi fyrir RKI fataverkefnið, Föt sem framlag, en við erum nýbúnar að útbúa 19 gjafapakka sem fara til Hvíta Rússlands, ásamt 10 eldri pökkum sem voru tilbúnir. Við Rúnar tæmum fatagáminn á 2ja vikna fresti og svo eru kóræfingar, messur og jarðarfarir, sem þýðir að alltaf er nóg að gera hjá mér :)

Slóð á myndasöfn frá Húsavík

http://husavik.123.is/

List í ljósi !

Laugardaginn 25. febrúar var fyrsti sólardagurinn hér á Seyðisfirði þetta árið (2017).
Mikið var um að vera og veðrið yndislegt.  Hátíðin List í ljósi, sem haldin var nú í annað sinn til að fagna komu sólarinnar, tókst vel í kvöld, í bland við undurfalleg norðurljós sem skreyttu stjörnum skrýddan himinn á sama tíma...

Slóðir á erlendar fornleifar !

https://www.youtube.com/watch?v=DfuCGgs7714

Slóð á fornleifaskráningu yfir Seyðisfjörð !

http://www.sfk.is/static/files/skjol/PDF/byggfulltrui/kort_forleifar/fornleifaskraning-3.pdf

Helgarferð til Reykjavíkur !

Þar sem sjómannaverkfallið hafði staðið í 2 mánuði og ekki horfur á að því lyki næstu daga, var ákveðið að við færum akandi suður á föstudeginum 10. febr. m.a. til að heimsækja Bergþór okkar og fjölskyldu hans og sækja í leiðinni sjókajak og fleira dót sem Jóhanna okkar skildi eftir þegar þau seldu íbúðina þeirra í Keflavík um áramótin. Einnig fulla bókatösku af ferðabókum frá Sigrúnu Klöru til Bókasafnsins. Ferðin suður gekk vel, þó mikið væri um túrista og m.a. þurftum við að draga upp einn bíl með ferðafólki sem sat fastur í snjó, en það var í annað skiptið á einni viku :)
Við héldum fyrirfram uppá 4. ára afmæli Nínu Bjargar okkar, en hún er fædd 15. febr. og hittum ættingja og vini, en síðan flaug ég austur á sunnudagskvöld en Rúnar aðstoðaði Bergþór við viðgerðir á bílnum og fleira áður en hann ók aftur austur...

Slóð á myndir Jóa Listó !

http://listo.123.is/photoalbums/275047/

Dúddi frændi kvaddur !

Dúddi föðurbróðir minn lést 24. jan. 2017 og var jarðsettur á Kópaskeri 3. febrúar kl. 5 síðdegis.
Ég keypti samúðarkerti frá okkur Diddu hjá Villu vinkonu sem ég færði þeim börnum Dúdda.
Snartastaðakirkja var full á kveðjustundinni og söngur og kveðjuræða barst mjög vel um kirkjuna, líklega vegna þess hve loftin þar eru kúpt.
Allir mættu í kjötsúpu í íþróttahúsið eftir útförina og þar sátum við og spjölluðum við föðurfólkið mitt sem kom til athafnarinnar. Aðeins Lóu vantaði úr systkinahópnum, en hún dvelur nú á Spáni.
Við gistum 2 nætur í Hlíð og ég kíkti aðeins bæði til Gulla og Hillu. Veðrið var gott og gaman að segja frá því að á heimleiðinni sáum við mink á hlaupum við Vegskarðið og drógum 4 unga asíubúa sem runnið höfðu út af veginum í hálkunni (kunnu greinilega ekkert að aka við svona aðstæður).

Slóð á H-víkurmyndir frá mér og Diddu !

https://www.youtube.com/watch?v=Da4TAYSSFvg

Slóð á gamlar ísl. ljósmyndir á netinu !

http://lemurinn.is/2013/01/23/myndafjarsjodur-danskra-landmaelingamanna-synir-island-um-1900/

Þorrablótið afstaðið !

Þorrablót Seyðfirðinga 2017 fór fram laugardagskvöldið 21. janúar og gekk ljómandi vel. Satt að segja betur en ég og fleiri í nefndinni þorðum að vona. Leikþættir sem höfðu gengið allavega á æfingum, gengu vel upp á blótinu og engin óhöpp urðu mér vitanlega. Maturinn smakkaðist vel og allir virtust skemmta sér hið besta !
Það er mikil vinna og þarf gott skipulag til að allt gangi vel og allir hafi föst hlutverk !
Bestu þakkir til allra félaganna í nefndinni, sem öll stóðu sig vel og gerðu sitt besta og hópurinn vann eins og einn maður að því að láta allt ganga vel...!

Þorrablótsnefnd í önnum !

Nú er nákvæmlega vika í þorrblótið okkar, sem verður 21. janúar. Við þrjú erum öll í nefndinni og það hefur verið nóg að gera undanfarið og verður svo áfram alla næstu viku. Vonandi gengur allt að óskum, allavega leggur fólk sig fram um að gera sitt besta og það verður að duga...!
Laufabrauðið var bakað um síðustu, en nú standa yfir ýmsar æfingar og skreytingaundirbúningur og tæknivinna o.s.frv....

Í byrjun nýs árs !

Nýja árið byrjaði með snjó og kulda, eftir einmuna veðurblíðu í allan vetur til áramóta. Ég reikna samt ekki með að það verði mikill snjór í vetur eða að hann staldri lengi við. Draumar okkar Rúnars hafa frá því í haust ræst hvað veðurfar snertir og ég tel að áfram verði snjólétt vil vors...!
En þrátt fyrir snjó og kulda, þá koma fallegir vetrardagar inn á milli.... og svo fáum við að sjá hreindýrin nærri byggð og fuglarnir sækja í fóður sem við færum þeim út í snjóinn, svo það er alltaf líf og fjör, þó kuldinn ríki í bili :)

Áramótin á Seyðisfirði 2016-17

Það er orðin föst hefð að við mætum til Kristrúnar frænku Rúnars og Birgis manns hennar á gamlaárskvöld (fyrir miðnætti) með einhverja tertu meðferðis. Þar hittist fjölskyldan og skítur upp flugeldum og nýtur áramótanna saman...!  En fyrst fórum við á áramótabrennuna og horfðum á skaupið, sem var með betra móti að þessu sinni :)

Jólin með fjölskyldunni !

Jóhanna Björg dóttir okkar og fjölskylda komu frá Noregi og voru með okkur á jólunum. Þau hjónin þurftu að vísu að flýta för suður til að ganga frá sölu á íbúð þeirra í Keflavík og ráðstafa hluta af búslóð sem þar var í geymslu. En barnabörnin tvö, Adam og Sumaya Rós voru hjá okkur fram að áramótum og fórum með okkur á barnaball, í sund og út að leika og ýmislegt fleira :)

Jólaundirbúningur og jólahlaðborð !

Eftir að við komum heim hefur verið nóg að gera, m.a. fóru bæði bæjarstarfsfólk og kórinn saman á jólahlaðborð og svo tók við laufabrauðsgerð og bakstur, auk þvotta og þrifa og alls konar tiltektar sem maður framkvæmir yfirleitt aðeins árlega. Allir gluggir hreinir og jólaljós í flestum gluggum og svo að skrifa á jólakort og ganga frá pökkum o.s.frv... Ekki má heldur gleyma Aðventumessunni sem tókst bara vel og svo afmæli Veigars sem haldið var uppá áður en hann fór suður í jólafrí :)

Smá frí með 2 barnabörnum !

Þegar færi gefst, þá reynum við að eyða tíma með barnabörnum okkar. sem við sjáum alltof sjaldan í eigin persónu, þó Skype bjargi miklu þess á milli.
Á leiðinni til og frá Tenerife gafst smá tími með 2 yngstu barnabörnunum, þeim Nínu Björgu og Þorsteini Darra...+

Vikudvöl á Tenerife !

Eins og svo oft áður var ákveðið seint og síðar meir að hluti áhafnar Gullvers færi saman í vikuferð til Tenerife. Við flugum út 16. nóvember og heim 23. nóv. á sextugsafmæli bróður míns !
Ferðin gekk í alla staði mjög vel og Rúnar alsæll með góðu sætin í Icelandair flugvélunum.
Við fórum á bílaleigubíl um öll helstu sveitahéruðin og heimsóttum höfuðborgina Santa Crus.
Öðrum degi eyddum við á litlu eyjunni La Gomera, sem er alveg einstök í sinni röð og vel þess virði að heimsækja hana :)
Ég læt hér nokkrar svipmyndir úr ferðinni til minningar um góða ferð...