Fimmtudaginn 14. mars s.l. var sr. Cecil Haraldsson fyrrum prestur hér, kvaddur hinstu kveðju frá Seyðisfjarðarkirkju og mun satt vera að hann sé fyrsti presturinn sem jarðsettur er hér í Kirkjugarðinum en allir prestar á undan honum hér, svo langt sem menn muna, hafa allir látist fjarri Seyðisfirði og verið grafnir á öðrum stöðum. Hafi hann þökk fyrir góða þjónustu og góð kynni hér gegnum árin !
Aumingja gráhegrinn var orðinn ansi slappur í mesta kuldanum hér og hættur að forða sér þegar við tókum rúnt til að mynda hann og fylgjast með honum. En uppúr miðjum mars virtist hann hressast og tórir vonandi það sem eftir er til vors ! Aðrir flækingar virðast ætla að þrauka til vors, enda fá þeir daglega ýmislegt ætilegt sem heldur þeim á lífi. Svo komu nokkrir Tjaldar sem eru fyrstu vorboðarnir ár hvert og nýlega eru álftir farnar að streyma til landsins, þó ekki hafi þær birst hér í firðinum ennþá !
Siggi Birkir var búinn að klára að pússla 3000 kubba myndina sem hann gaf okkur um jólin við heimkomu okkar. En það var ansi kalt og vetrarlegt hér allan febrúarmánuð. Samt var fólk að baða sig í kuldanum, þótt ótrúlegt sé. Gamla raflínan út í Hánefsstaði var tekin niður og verið að safna saman staurum og vír út með firðinum. Síðast en ekki síst rek ég augun ansi oft í ólík andlit hér í firðinum og þessa síðasta var bara hér í garðinum hjá okkur... 😂
Það var sól flesta daga og hiti á milli 20-30 gráður alla daga. Við sátum því talsvert í sólinni, en vorum líka dugleg að fara í gönguferðir og skoða alla hluta svæðisins, auk þess sem við tókum strætó til Mas Palomas, Mogan og Las Palmas. Við heimsóttum Doddu Kjerulf og hittum marga Seyðfirðinga og Íslendinga, þar af nokkra sem tengdust okkur á einn eða annan hátt. Fórum í minigolf og sáum slatta af betlurum og staði þar sem útigangsfólk hélt til. Fórum oft til Harry´s og á markaðinn og gátum núna skoðað kirkjuna sérkennilegu þar í nágrenninu.
Þetta Bull hótel var vel staðsett á Playa del Ingles og gestir að mestu leyti eldri borgarar. Við vorum staðsett á 7. hæð með gott útsýni yfir garðinn, þar sem fjöldi fólks var frá morgni til kvölds. Þarna var tónlist og dans í garðinum öll kvöld og skemmtiatriði innan dyra sömuleiðis. Í byrjun síðustu vikunnar vorum við látin færa okkur í aðra eins íbúð á sömu hæð, þar naut sólar lengur og meira næði ❤
Á gamlaárskvöld 2023 fórum við til Húsavíkur, gistum þar og héldum svo til Rvk á nýársdag, áleiðis í flug til Gran Canaria í tilefni af 70 ára afmæli mínu.
Þegar vetur ríkir með kulda og snjó, þá er erfitt tímabil hjá blessuðum fuglunum og ég hef því reynt eftir bestu getu að halda lífi í þeim, því alltaf er slatti af flækingum, mest svörtum og gráum þröstum ásamt skógarþröstum sem ekki komu sér í burtu tímanlega. En í þetta sinn voru nokkrar silkitoppur eftir hjá okkur og svo að sjálfsögðu dúfurnar, máfarnir og krummi ! Gráhegrinn sem við sáum til 20. des virðist hafa stungið af, eða við ekki leitað hans nógu vel...?
Jóladagarnir okkar voru rólegir og mestur tími fór í að sortera og pússla 3000 kubba mynd sem Siggi gaf okkur ! Það snjóaði líka eitthvað flesta dagana eða næturnar og ég mokaði því snjó flesta daga...
https://lifdununa.is/grein/ekki-ast-vid-fyrstu-syn-en-einlaeg-vinatta/?fbclid=IwAR02gWjydHSezAMiPh4VvB8K6DbltKIKI5lKeelS1NMCjHDNLPpRjXJhlb4
Ég og Óla Mæja vorum beðnar um það í haust að sitja fyrir svörum hjá LungA krökkunum í Herðubreið einn daginn og það gekk bara nokkuð vel held ég. Að loknu almennu spjalli spurði ég hópinn á íslensku hvort ekki væru einhverjir í hópnum sem væru vön að syngja í kór og 3 strákar svöruðu því játandi og voru tilbúnir að mæta á æfingar og syngja með okkur fram undir jól. Það gekk svo ljómandi vel. Ástralinn Shan Turner Carol mætti aftur og kennir þeim og fylgir þeim eftir. Myndirnar eru frá æfingu fyrir Aðventuna og frá hljóðu samverunni með kertin að messu lokinni...
Þess má geta að ég var tilnefnd í sögunefnd til undirbúning útgáfu á Sögu Seyðisfjarðar sem lengi hefur staðið til að yrði kláruð og gefin út, en það hefur dregist ansi lengi. En ég hef þó mætt á nokkra fundi. Einnig var ég sett í stjórn tímaritsins Glettings og hef verið þar við að aðstoða stjórnandann, Magnús Stefánsson, sem fékk mig til að yfirfara greinar eftir Reynir bónda og útvega myndir, bæði með þeim greinum og svo vildi hann kynna mig sem einn af þeim ljósmyndurum sem tengjast tímaritinu.
Í fyrra hófst stafræn endurgerð á Þingeyingaskrá Konráðs Vilhjálmssonar hjá Héraðsskjalasafni Þingeyinga. 24 bækur voru skannaðar og síðan birtar á skjalavef safnsins. Í ár er unnið að því að skanna næstu 24 bækur. Nú eru næstu 12 bækur komnar á vefinn og því eru 36 bækur aðgengilegar á skjalavefnum. Verkefnið er unnið með styrk frá Þjóðskjalasafni Íslands.
💗 Svo ánægjulega vildi til að Anna móðursystir Rúnars varð 90 ára 30. okt. s.l. og allir nánustu ættingjar voru velkomnir í kvöldverð með henni í Fjörukránni hjá Jóa frænda þeirra í tilefni dagsins. Við Rúnar flugum suður og hittum þar fjölskyldu Önnu og systrabörnin, Boga, Kristrúnu, Binnu og Þorstein frá Seyðisfirði. Það vantaði bara Hörpu og Þröst. Þetta var mjög glöð samkoma og gítarleikarinn reyndist vera gamall skólabróðir Rúnars frá Eiðum, Kjartan Ólafsson.
Það hefur lítið bæst við af flækingum, nema tvær hettusöngvara-frúr sem tóku við af karlfuglunum. Gráhegrinn er hér enn 12.11.23 og sama má segja um svartþrestina og silkitoppurnar...
Fuglaflækingar haustins voru fáir til að byrja með, en svo skyndilega birtust margir í viðbót og ég hef náð myndum af flestum tegundunum og læt þær fljóta hér með :) <3
Tveir svartþrestir kk, ungur og fullorðinn hafa verið hér fyrstir. Svo kom Gráhegri, styggur eins þeir eru allir. Síðan birtust 3 hettusöngvarar kk, og að lokum mættu svo 4 silkitoppur í dag. Svo er spurning hvort að fleiri eigi ekki eftir að mæta ? :)
Við skruppum að venju norður á Húsavík í haust til að ganga þar frá því sem þörf var á og kíktum í Bjarmaland í leiðinni, en sáum enga silunga í kílnum. En veðrið var gott og allt gekk vel...
Haustverkin hjá mér hafa verið svipuð í ár og vanalega. Ég týndi tugi kílóa af berjum, mest bláber, en einnig krækiber, sólber, hindber og jarðarber, ýmist úti í náttúrunni eða í mínum eigin garði. Bjó til heilmikið af saft og sultu sem ætti að endast í vetur. Sveppir voru líka tíndir í miklu magni og þeir steiktir og settir í frost í hæfilegum skömmtum. Síðast en ekki síst tók ég upp kartöflur, gulrætur og annað grænmeti sem er þó í minna magni en oftast áður.
Við Rúnar og Siggi höfum gert ýmislegt nú í haust, Siggi bauð mér á rúntinn uppá Bjólf og Rúnar stússað við ýmislegt bæði heima og í og við golfskálann. Siggi lenti svo í kuldaveðri uppi á Hellisheiði að brjóta niður klaka af fjarskiptamastri sem virkaði ekki fyrr en klakinn var brotinn af :)
