Hreindýrin enn við bæjardyrnar !

Hreindýrin, líklega hátt í 100 stykki, hafa haldið til hér í firðinum í allan vetur. Þeim fjölgar ár frá ári og eru búin að skemma ansi mikið af lerkitrjánum hér í fjallshlíðunum. Stundum eru þau alveg niður í bæ og um tíma héldu þau til á túninu utan við Brattahlíðina.
Og nú er sólin aftur farin að sjást hér hjá okkur eftir 4ra mánaða fjarveru og það er þess virði að halda uppá það með sólarkaffi eins og árlega er gert hér um slóðir !

List í Ljósi - Fagnað komu sólarinnar !

Ungt fólk á Seyðisfirði (líklega flest tengd LungA)  stóð fyrir ljósahátíð hér dagana 19. og 20. febrúar. Á laugardagskvöldinu 20. var aðal viðburðurinn mikið og vel unnið ljósa"show" á framhlið kirkjunnar okkar. Einnig voru ýmiss konar ljósaviðburðir um allan bæ og gaman að fara á milli og sjá þá flesta. En á föstudaginn var m.a. kyrjað á gamlan hefðbundinn íslenskan hátt og var ég viðstödd æfingu um morguninn, en missti svo af öllu vegna vinnu eftir hádegið.
Nokkur sýnishorn fylgja hér með til minningar :)

Viskubrunni 2016 lokið !

Hin árlega keppni Viskubrunnur, sem grunnskólinn sér um til fjáröflunar fyrir skólaferðalög elstu bekkinga skólans, hefur verið í gangi s.l. vikur en lauk nú á þriðjudaginn 16. febrúar.
Sigurvegarar voru Skálanesmenn, sem sigruðu líka í fyrra og voru að vonum ánægðir með að halda titlinum. Leikskólakonur voru í öðru sæti og Lions í 3ja sæti.

Síldarárin á Raufarhöfn

Skráð viðtöl við heimamenn á slóðinni; http://www.hac.is/wp-content/uploads/2013/06/sildararin-skyrsla.pdf

Þorrablótið 2016

Hið árlega þorrablót var haldið laugardaginn 23. janúar með pompi og prakt. Salurinn var óvenju skemmtilega og fallega skreyttur og skemmiatriðin óvenjuleg og alveg ágæt og allt fór vel fram að vanda. Við lentum í næstu nefnd ásamt ýmsu góðu fólki og heyrðist mér að það væru Eva og Márus sem sætu uppi með foringjahlutverkin ....!

Fuglafánan í kringum okkur, áramótin 2015-16

Sá árlegi atburður gerðist að fallegur lítill glóbrystingur mætti í bæinn í upphafi nýs árs og gladdi okkur fuglavinina. Gráþrestir, svartþröstur og nokkrir skógarþrestir hafa verið fastagestir í mat hjá okkur s.l. mánuði og nú bættist líka við einn stari sem er mjög sjaldséður hér.
Vikuna sem mesti snjórinn var, þá mættur rjúpurnar líka hér niður í bæ og glöddu augu okkar :)
Fuglatalning fór fram sunnudaginn 10. janúar og það voru Rúnar og Boggi sem sáu um hana að vanda, en ég sá hinsvegar um skýrsluna eins og alltaf og kom henni til skila að vanda !

Áramótin á Seyðisfirði

Við vorum bara 3 um áramótin að þessu sinni, en fórum í miðnæturkaffi til Birgis og Kristrúnar eins og við höfum gert í nokkur undanfarin ár. Áramótin voru bara friðsæl og veðrið þokkalegt og nýja árið heilsaði nokkuð vel og flestir bara bjartsýnir.

Draumarnir mínir um snjólítinn vetur til áramóta rættust svo sannarlega, þó aðeins kæmi smá jólasnjór í nokkra daga um hátíðarnar !

Þorsteinn Darri skírður og jólaveisla á Selfossi

Ég gleymdi að geta þess að hálfum mánuði fyrir jól flugum við suður til að taka þátt í skírn Þorsteins Darra Bergþórssonar og fór það allt vel fram eins og vænta mátti.

En áður en jólafríinu syðra lauk, skruppum við í heimsókn til Reynis bónda, því hann þurfti aðstoð við bilaða tölvu og síma, sem Siggi Birkir reddaði í hvelli. 

Síðan var okkur boðið í jólaveislu hjá Völlu og fjölskyldu, þar sem margmenni mætti og varla á bætandi að hafa okkur 7 til viðbótar, en þetta gekk bara allt saman vel.

Heimferðin var hinsvegar nokkuð skrautleg, því við lentum í hálku, stórhríð, rigningu og roki og loks rjómablíðu þegar við loksins komum austur á land, en þar voru vegir meira og minna skemmdir eftir vatnavexti og Fjarðarheiðin lokuð, en við fórum nú yfir hana samt slysalaust !

Jólin sunnan heiða !

Við drifum okkur tímanlega af stað á 2 bílum til að hafa pláss fyrir norsku fjölskylduna okkar, en Bergþór og fjölskylda voru með fullan bíl. Ferðin suður gekk vel í góðu veðri og Rúnar sótti Jóhönnu og co í flugið í Keflavík. Sjálf notaði ég tímann til að versla fyrir jólin og klára ýmislegt sem gera þurfti og koma okkur fyrir í bústaðnum. Ýmislegt vantaði sem við erum vön að hafa við hendina, en þetta bjargaðist og flestir voru duglegir að nota heita pottinn sem innan dyra á lokuðum pallinum. Einnig var mikið spilað og pússlað þessa hátíðisdaga, en veðrið gaf ekki tilefni til mikilla skoðunarferða um nágrennið....

Aðventan á Seyðisfirði

Um 40 hreindýr komu niður undir bæ þegar snjór var orðinn svo mikill að jarðbönn voru alls staðar ofar í heiðinni. Þrátt fyrir snjóinn var veður nokkuð gott og lítil ófærð á vegum.

Það var eins gott, því við vorum á förum suður í Grímsnes til að eyða þar jólunum með öllum okkar afkomendum, en Jóhanna og fjölskylda kom frá Noregi til að vera með okkur.

Slóð á þjóðbúningasvuntur !

https://www.lindesign.is/lin-design/eldhus/vara/?ProductName=Skautbuningasvuntan-viskastykki

Slóð á gamlar myndir !

https://www.flickr.com/photos/cornelluniversitylibrary/4558305137/in/photostream/
https://www.flickr.com/photos/cornelluniversitylibrary/4558903366/in/photostream/
https://www.flickr.com/photos/cornelluniversitylibrary/4558850050/in/photostream/

Leikritið Sex í sveit !

Hið bráðskemmtilega leikrit, Sex í sveit var tekið til sýningar hér nýlega. Það voru 6 ungmenni sem sáu um hlutverkin og stóðu sig öll með prýði. Því miður var engin sýning á frídegi togaramanna, svo Rúnar minn missti af þessari skemmtun, en vonandi fær hann að sjá upptöku af því í staðinn !

Gamla orgelið heim !

Þegar Seyðisfjarðarkirkja var reist hér í bænum 1922, þá var keypt orgel frá Rvk sem notað var í rúma 6 áratugi, áður en nýtt pípuorgel tók við af því. Systkinin Friðjón og Anna Kristín Jóhannsbörn létu gera upp þetta gamla orgel sem lá undir skemmdum í geymslu og hafa nú fært bænum það aftur nýuppgert og fínt. Sigurbjörg organisti sem síðust notaði það áður en pípuorgelið kom, endurvígði það við móttökuna og fórst það vel úr hendi að vanda.

Veðurblíða haustsins !

Veðurblíðan í haust hefur verið alveg einstök, oft logn og blíða og hægt að tína ber fram eftir öllu hausti, þó aðallega væru það bláber, því krækiber sáust lítið hér í haust.

Uppskerustörfum lokið !

Haustið var óvenju gott að þessu sinni og það bjargaði uppskerunni sem leit út fyrir að yrði lítil eftir kalt og sólarlaust sumar. En ég náði að tína nokkur kíló af berjum og frysta og safta fyrir veturinn. Kartöflurnar voru í meðallagi og gulræturnar vel í meðallagi, svo ég er alveg sátt. Það voru meira að segja bara örfáar gulrætur skrítnar í laginu, en stundum hef ég fengið óþarflega margar slíkar í einu :)

slóð á fallega stelpukjóla

https://www.bbl.is/folk/norskur-barnakjoll/9121/

Slóð á fornleifauppgröft á Geirsstöðum eftir Steinunni Kristjáns

https://notendur.hi.is/~sjk/GST_1997.pdf

Slóð á góðan vísnaþátt :)

https://www.youtube.com/watch?v=lY_Hse6dbrE

Slóð á gamlar Íslandsmyndir !

https://www.flickr.com/photos/cornelluniversitylibrary/sets/72157623945632982/