Miklar rigningar og vatnsflóð !

Dagana 23. og 24. júní rigndi heil ósköp hér á Seyðisfirði, svo allar fjallshlíðar urðu að rennandi lækjum og ám og Fjarðaráin var með stærsta móti og flæddi upp að lóðinni okkar.
Dagmálalækurinn flaut yfir götuna og inn í 3 nálæg hús, svo grafa þurfti skurði í götuna til að hleypa vatninu rétta leið en þá fór í sundur sjónvarps-síma og netkapall fyrir allt hverfið...
Ansi stór aur og grjótskriða féll út við endann á Norðursíld og skemmdi þar 2 hús. Flest hús við lónið sem hafa kjallara fengu flóð þar inn eins og oft hefur gerst áður.
Samt má segja að þetta hafi verið vel sloppið miðað við allt þetta vatnsmagn sem flaut hér til sjávar.

11 nátta ferð til Krítar...

Við ákváðum í vetur að láta loksins verða af því að skreppa til Krítar og keyptum okkur ferð með Heimsferðum 25. maí til 6. júní. Allt gekk vel og við vorum dugleg að fara í skoðunarferðir, nánast daglega, ýmist með jeppum, rútum, lestum eða bátum. Við heimsóttum klaustur, kirkjur, kirkjugarða, lítil þorp, ávaxtadali, bruggverksmiðjur, ólífuverksmiðju, gömlu borgarrústirnar í Knossos og safnið þar. Síðast en ekki síst fórum við í 2 smá siglingar út að eyjunum þar við ströndina og heimsóttum borgina Hania 3var sinnum, bæði í sól og regni.
Heimafólk var mjög yndælt og margt sem við höfðum ekki tíma til að skoða, slepptum m.a. ferð til Santorini, þar sem hún var mjög óhagstæð tímalega séð.
Hér koma nokkrar minningamyndir...

 Munkaklaustur þar sem 4 munkar voru búsettir...

 Kirkjugarður með þúsundum Þjóðverja frá seinni heimsstyrjöld.

 Bruggverksmiðja í kjallara, þar sem þjóðardrykkurinn Raki er bruggaður.

 Vínverksmiðja, þar sem unnin eru vín úr vínberjum eyjaskeggja...

Heimamenn stunda viðarkolabrennslu í stórum stíl að því virtist...

 Gamla borgin Knossos eftir uppgröftinn...

 Safnið með gömlu minjunum frá Knossos...

 Á leið í 2ja tíma siglingu...

 Hægt var að snorka og synda í volgum sjónum ef maður vildi....

Hafnarsvæðið í Hania skoðuðum við þrisvar ásamt miðbæ Hania...

Stutt stopp hjá barnabörnunum !

Á leið okkar til Krítar áttum við stutt stopp með Bergþóri okkar og fjölskyldu í Kópavogi. Við skruppum snögga ferð með þeim í Costco og getum ekki sagt að við værum neitt hrifin af öllum biðröðunum og fleiru sem mér finnst fráhrindandi. Þó stutt væri, þá voru þetta góðar samverustundir og hér koma nokkrar myndir til minningar um það :)

Farfuglarnir streyma til landsins !

Tjaldurinn var fyrsti farfuglinn sem mætti eins og venjulega og dreifði sér meðfram fjörum fjarðarins og meðfram Fjarðaánni að vanda.
Síðan mættu straumendur, grágæsir, stelkar, jaðrakanar, lóur, hrossagaukar og aðrir fastagestir...
Lífið hefur verið um flækinga í vetur og vor og ég ekki náð myndum af þeim fáu sem komið hafa til okkar, nema Margæsum, því miður. Blendingsöndin hefur haldið til hér í allan vetur og fær hún að fljóta með hinum farfuglunum. Stök Súla mætti hér óvænt, líklega veik og fær líka að vera með.

Vorið á næsta leiti...!

Tíðin hefur verið ótrúlega mild í vetur og snjólítið.  Vorið kom fyrr en oft áður og blómin og gróðurinn utan dyra byrjaði strax í apríl að springa út.
Inniblómin voru líka dugleg, meira að segja lifðu allar Chili plönturnar af og byrjuðu að blómstra í mars og krókusarnir úti hafa fjölgað sér furðulega mikið, svo ég þarf að fara að grisja þá !

Páskar án Rúnars !

Bergþór okkar og fjölskylda ákváðu að koma austur um páskana og mættu eins og fyrirhugað var.
En okkur til armæðu þurfti Rúnar að vera á sjó alla páskana, svo hann hitti þau ekkert, en við Siggi nutum samvistanna, ekki síst við börnin sem við hittum alltof sjaldan. Þau voru alsæl þegar þau fundu páskaeggin sem ég faldi handa þeim og gaman að leika úti í snjónum og svo framvegis :)

Dagleg rútína !

Ýmislegt hefur á dagana drifið og margt sem gleymist, en lífið gengur sinn vanagang með Bolludag, Öskudag, sprengidag og aðra daga eins og Downs-daginn. Ég geymdi svolítið af gulrótum í kassa í gróðurhúsinu sem ég tók upp fyrir nokkru og naut þess að borða þær (þó litlar væru). Svo sit ég flest kvöld og hekla barnateppi fyrir RKI fataverkefnið, Föt sem framlag, en við erum nýbúnar að útbúa 19 gjafapakka sem fara til Hvíta Rússlands, ásamt 10 eldri pökkum sem voru tilbúnir. Við Rúnar tæmum fatagáminn á 2ja vikna fresti og svo eru kóræfingar, messur og jarðarfarir, sem þýðir að alltaf er nóg að gera hjá mér :)

Slóð á myndasöfn frá Húsavík

http://husavik.123.is/

List í ljósi !

Laugardaginn 25. febrúar var fyrsti sólardagurinn hér á Seyðisfirði þetta árið (2017).
Mikið var um að vera og veðrið yndislegt.  Hátíðin List í ljósi, sem haldin var nú í annað sinn til að fagna komu sólarinnar, tókst vel í kvöld, í bland við undurfalleg norðurljós sem skreyttu stjörnum skrýddan himinn á sama tíma...

Slóðir á erlendar fornleifar !

https://www.youtube.com/watch?v=DfuCGgs7714

Slóð á fornleifaskráningu yfir Seyðisfjörð !

http://www.sfk.is/static/files/skjol/PDF/byggfulltrui/kort_forleifar/fornleifaskraning-3.pdf

Helgarferð til Reykjavíkur !

Þar sem sjómannaverkfallið hafði staðið í 2 mánuði og ekki horfur á að því lyki næstu daga, var ákveðið að við færum akandi suður á föstudeginum 10. febr. m.a. til að heimsækja Bergþór okkar og fjölskyldu hans og sækja í leiðinni sjókajak og fleira dót sem Jóhanna okkar skildi eftir þegar þau seldu íbúðina þeirra í Keflavík um áramótin. Einnig fulla bókatösku af ferðabókum frá Sigrúnu Klöru til Bókasafnsins. Ferðin suður gekk vel, þó mikið væri um túrista og m.a. þurftum við að draga upp einn bíl með ferðafólki sem sat fastur í snjó, en það var í annað skiptið á einni viku :)
Við héldum fyrirfram uppá 4. ára afmæli Nínu Bjargar okkar, en hún er fædd 15. febr. og hittum ættingja og vini, en síðan flaug ég austur á sunnudagskvöld en Rúnar aðstoðaði Bergþór við viðgerðir á bílnum og fleira áður en hann ók aftur austur...

Slóð á myndir Jóa Listó !

http://listo.123.is/photoalbums/275047/

Dúddi frændi kvaddur !

Dúddi föðurbróðir minn lést 24. jan. 2017 og var jarðsettur á Kópaskeri 3. febrúar kl. 5 síðdegis.
Ég keypti samúðarkerti frá okkur Diddu hjá Villu vinkonu sem ég færði þeim börnum Dúdda.
Snartastaðakirkja var full á kveðjustundinni og söngur og kveðjuræða barst mjög vel um kirkjuna, líklega vegna þess hve loftin þar eru kúpt.
Allir mættu í kjötsúpu í íþróttahúsið eftir útförina og þar sátum við og spjölluðum við föðurfólkið mitt sem kom til athafnarinnar. Aðeins Lóu vantaði úr systkinahópnum, en hún dvelur nú á Spáni.
Við gistum 2 nætur í Hlíð og ég kíkti aðeins bæði til Gulla og Hillu. Veðrið var gott og gaman að segja frá því að á heimleiðinni sáum við mink á hlaupum við Vegskarðið og drógum 4 unga asíubúa sem runnið höfðu út af veginum í hálkunni (kunnu greinilega ekkert að aka við svona aðstæður).