Síðbúin haustverk

Síðustu haustverkin í garðinum hafa dregist m.a. vegna fjarveru okkar, en það hefur ekki sakað, því gulræturnar sem eftir voru í garðinum eru fínar, þó stærðarmunurinn sé ansi mikill á þeim stærstu og minnstu sem ég fann.. Einnig voru nokkrar gulrætur með klofnar rætur, en þær eru ekkert verri fyrir það. Loks tók ég svo upp nokkur villigrös sem uxu í endanum á gulrótarkassanum og fékk fínustu kartöflur, þó ég hefði hinsvegar viljað frekar fá gulrætur, en kartöflugrösin virðast hafa kæft gulrótarvöxtinn og því voru þær fáu gulrætur sem voru nálægt kartöflunum mjög litlar, eins og sjá má :)

Viðhald hússins !

Nú á haustdögum tók Rúnar eftir því að endarnir á þakskegginu okkar voru farnir að fúna og ákvað því að fara að skipta um þakskegg, enda kannski ekki skrítið þó þess þurfi eftir meira en 30 ár frá því það var sett upp. Þegar til kom, þá reyndist það aðeins vera í endunum sem fúinn var, vegna þess að götin í þakjárnið höfðu verið höggvin á vitlausan stað, vatnið rann ekki ofaní þakrennurnar, heldur beint á timbrið.  En nú er hann búinn að laga þetta og vonandi dugar það í nokkra áratugi til viðbótar :)

Berjatínsla og haustverkin í garðinum !

Þegar haustar þá fer maður af gömlum vana að undirbúa veturinn, m.a. með því að taka inn allann þann jarðargróður sem í boði er. Ég fór að sulta rabbarbara og tína svo ber, en lengi vel leit ekki vel út með berjasprettu vegna of mikilla þurrka, en það rættist úr því á haustdögum og ég fann heilmikið af góðum bláberjum og er búin að sulta þau og safna góðum forða í frost. Einnig tíndum við í fyrsta sinn nokkur kíló af hrútaberjum og fengum úr þeim dýrindis sultu sem notuð verður um jólin :)
Engin finnast krækiberin að þessu sinni, svo ég dreif í að búa til saft úr rifsberjum og líka hlaup og fór svo að tína blóðberg til að krydda lambakjötið í vetur og þurrkaði skessujurtina í sama tilgangi, en hún er alveg ómissandi á steikurnar og sérstaklega í kjötsúpuna. Loks hef ég verið að taka upp gulrætur, en brá í brún þegar ég sá sumar þeirra sem voru  hressilega vanskapaðar, en samt heilbrigðar og góðar á bragðið. Þrátt fyrir að hafa verið að búa til nýtt beð fyrir þær í vor, þá virðist mér hafa mistekist að stinga það upp, hef greinilega ekki vandað mig nóg vel fyrst að einhver fyrirstaða hefur valdið þessum furðuvexti, svo gulræturnar líta út eins og stafir og í þessu tilfelli fannst mér þær mynda orðið JUL eða JÓL og fannst það bara fyndið :)

Blessuð Mamma kvödd !

Blessuð mamma lést 13. ágúst s.l. en hún var fædd 13. júlí 1926 og sagði alltaf að talan 13 væri happatala fyrir sig, svo segja má að hún hafi komið og farið á þessari happatölu sinni. Veðrið var yndislegt og allt gekk vel. Það eina sem ég saknaði var að Rúnar minn var úti á sjó og gat ekki verið viðstaddur með okkur. Nokkrir aðrir nánir ættingjar, þ.e.a.s. barnabörn og barnabarnabörn voru stödd erlendis og gátu því ekki komið eins og skiljanlegt er. Góðir vinir og ættingjar voru okkur til aðstoðar, sérstaklega í kaffinu sem við höfðum úti i Hvammi og við Didda systir sáum sjálfar um og verðum við ævinlega þakklátar fyrir það.
Þá höfum við kvatt báða okkar foreldra og Munda móðurbróður okkar að auki, 3 vikum á undan mömmu og vonum að ekki verði nú fleiri nánar kveðjustundir í bráð...

Nokkrir sumargestir !

Hluti af sumrinu snýst um að fá góða gesti í heimsókn og best ef þeir mæta ekki allir í einu... hehe :)
Við höfum verið svo heppin að þeir hafa dreifst nokkuð vel yfir sumarið í ár, þó höfum við líka misst af nokkrum góðum gestum sem komið hafa á meðan við vorum sjálf að heiman, en við því er víst ekkert að gera, aðeins hægt að vona að betur takist til næst...

LungA 2012

Listahátið ungs fólks á Austurlandi eða LungA eins og það nefnist er árleg vika á Seyðisfirði í júlí. Að þessu sinni fylgdist ég fremur lítið með, þar sem ég var bundin í vinnu og með fullt hús af gestum. En hér má sjá sýnishorn af því sem ég fylgdist með, þ.e. unga fólkið var meira og minna utan dyra fyrstu 4 daga vikunnar við ýmsa leiki og störf, m.a. var stóri veggurinn á Bókasafninu málaður eins og hér má sjá. Svo var tískusýning og fleiri slíkar uppákomur og að lokum endaði vikan með tónleikum, sem við fórum ekki á, m.a. vegna þess hve veðrið var orðið óskemmtilegt.

Mundi frændi kvaddur !

Minn kæri frændi Guðmundur Theodórsson, eða Mundi eins og við kölluðum hann alltaf, lést hinn 22. júlí eftir löng og erfið veikindi. Mundi var einstaklega þolinmóður og góður við okkur systkinabörnin sín. Hann hafði alltaf tíma til að sinna okkur, kenna okkur og leiðbeina og gerði það á einstakan hátt, svo við lærðum sem mest af því. Hann var mikill og góður bóndi, hestamaður, íþróttamaður, söngmaður og hafði gaman af að dansa gömlu dansana. Hann var líka einstök skytta og veiddi jafnt refi, minka og fugla til matar, auk þess að veiða silung alla æfi í Hafursstaðavatni og víðar.
Ég á ótal margar minningar um hann og okkar góðu samverustundir sem eru mér ómetanlegar og verða aldrei þakkaðar sem skyldi.
Við kvöddum hann hinstu kveðju við útför hans í gær, 30. júlí frá Skinnastaðakirkju í Öxarfirði.
Blessuð sé minning þín kæri frændi !

Gamlar skólasystur !

Tveimur síðustu kvöldunum eyddum við með mínum gömlu góðu skólasystrum og makar þeirra voru með okkur annað kvöldið. Við elduðum saman heima hjá Önnu og Ásgeiri og áttum þar saman yndislegt kvöld 10 manns í hóp og höfðum nóg að spjalla.
Kvöldið eftir fórum við 5 saman út að borða og skemmtum okkur ekki síður vel og fengum góðan mat í Pakkhúsinu sem ég hef ekki komið í fyrr en núna, enda er þetta fyrsta sumarið sem það er starfandi sem slíkt.

Mærudagar 2012

Hinir árlegu Mærudagar voru að vanda síðustu helgina í Júlí og sá í efra svíkur okkur ekki frekar en fyrr, því sól og blíða var alla dagana, svo helgin varð eins ánægjuleg og kostur var.
Margt var til skemmtunar gert og allir hljóta að hafa fundið eitthvað við sitt hæfi. Við fórum að vísu minna en oft áður vegna annríkis við aðra hluti, en við kíktum á vélhjólagengið og fórum í bæjargönguna, fórum rúnt um bæinn að taka myndir af skreytingum sem eru víða skemmtilegar og fallegar. Við fórum í árlegu garðveisluna hjá Adda og Stellu, en þetta er í síðasta sinn sem hún verður hjá þeim, því þau eru að flytja til Akureyrar.
Við kíktum á málverkasýninguna hjá Vidda Breiðfjörð og í Helguskúr eins og alltaf. Skoðuðum markaðinn og  allt hafnarsvæðið. Fengum okkur að borða hér og þar og svo mætti lengi telja, en ég læt þetta nægja að sinni.

Ættarmót og 80 ára afmæli Jóhanns frænda

Áttræðis afmæli Jóhanns föðurbróður míns fór fram í Skúlagarði 13. júlí og fór vel fram eins og við mátti búast. Húsið var fullt af fólki og nóg af gleði og gaman.
En daginn eftir hittist öll Arnanesfjölskyldan á Ættaróðalinu hjá Jónda og Þórunni. Börn Erlings afabróður frá Ásbyrgi mættu líka með sína afkomendur og það var sérstaklega gaman að hitta þau og kynnast þeim sem við höfðum ekki séð áður. Þau komu með gamlar fjölskyldumyndir á minniskubb sem ég sýndi í tölvunni ásamt mínum gömlu myndum og eldra fólkið virtist hafa sérstaklega gaman af að sjá.
Mikið var spjallað og svo auðvitað grillað og borðað saman, þó svolítið þröngt væri um þennan stóra hóp.
Vonandi verðum við dugleg áfram að hittast og hafa samband...

Hringferð um landið og barnapössun

Þegar Rúnar losnaði við togarann og komst í frí, þá drifum við okkur af stað í hringferð á húsbílnum, m.a. í þeim tilgangi að hitta barnabörnin og passa þau á meðan foreldrarnir færu yfir búslóðina sem skilin var eftir þegar þau fluttu til Noregs. Á leiðinni suður heimsóttum við ýmsa staði eins og Gleðivíkina á Djúpavogi þar sem öll steineggin skreyta höfnina. Síðan skoðuðum við nýlegt steinasafn á Höfn, það bar eigendunum sannarlega fagurt vitni.
Barnagæslan fór fram í sól og blíðu dag eftir dag og við þvældumst um með börnin á söfn og í Laugardalinn, þar sem gæsirnar voru vinsælar og rjómaís var vel þeginn annað slagið í hitanum. Við eyddum góðum stundum hjá systrum okkar Rúnars og fjölskyldum í endalausum matarveislum og eitthvað var kíkt í búðir o.fl.
Norðurferðin var hinsvegar hraðferð, því að afmæli mömmu var næst á dagskrá og sömuleiðis 80 ára afmæli elsta föðurbróður míns. En síðan tók við ættarmót þeirra systkina og næstu myndir verða frá þeim viðburðum.

17. júní 2012

17. júní var óvenju sólríkur og líflegur að þessu sinni. Fjölmiðlamenn voru mættir í bæinn til að taka upp síðasta myndefnið í þáttinn "LANDINN" sem allur verður frá Seyðisfirði í þetta sinn. Skotið var af fallbyssunni eins og venjulega og önnur hefðbundin atriði á dagskránni, eins og fjallkona, tónlist o.fl. Við vorum líka með gesti í heimsókn og hér má sjá þau Björn Orra og Siggu Höllu í heimsókn á Tækniminjasafninu sem þau höfðu gaman af að skoða...

Sjómannadagurinn 2012

Sjómanna- dagurinn 2012 var sólríkur en nokkuð svalur. Siglingin á Gullver út fjörðin gekk samt vel og margt var um manninn, sérstaklega fannst mér mikið um aðkomufólk, bæði gamla Seyðfirðinga og óþekkta nágranna, líklega af Héraði og víðar ? Það var heilmikið um að vera á svæðinu við Fiskvinnsluna eins og venjulega, þar var keppt í kappróðri, reiptogi, kapphlaupi og plankaslætti og húrruðu allir þátttakendur á plankanum í sjóinn sem hlýtur að hafa verið kaldur (of kaldur fyrir mig :) Árgangahópar sem voru mættir til að fagna tímamótum voru mættir og duglegir að taka þátt í því sem var í boði og auk þess var boðið uppá fiskisúpu og rjóma/súkkulaðivöfflur og kaffi. Síðan var sjómannahóf um kvöldið þar sem árgangahóparnir 3 fluttu smá skemmtan og Gullversmenn tóku líka lagið. Maturinn rann ljúflega niður og Björn Hildir veislustjóri gerði grín að sjálfum sér og stjórninni og hélt uppi fjöldasöng, svo þetta kvöld fór friðsamlega fram á allan hátt. Hávaðinn í hljómsveitinni var full mikill að vanda, svo við fórum heim með fyrra fallinu og Ella mágkona sem kom austur til að taka þátt í skemmtun 1958 árgangsins var hin hressasta og lét ekki sitt eftir liggja í keppninni og öllu öðru þessa helgina....

Uppákomur á Seyðisfirði,,,

Það vantar ekki að nóg sé um að vera hér á Seyðisfirði. Á meðan við vorum í Noregi kviknaði í barnum hans Eyþórs, þ.e. Frú Láruhúsi. Sem betur fer brann það lítið og var tryggt, þannig að vonir standa til að hægt verði að gera það upp á ný. Svo héldu félagar í Leikfélaginu áfram að sýna hið stórgóða leikrit Pelíkanann sem síðan var valið til að koma fram í þættinum LANDINN, en lokaþátturinn verður sýndur 17. júní og sá þáttur verður eingöngu frá Seyðisfirði. Sjávarguðirnir spiluðu líka og við Seyðfirðingar fylltum bíósal Herðubreiðar til að vera bakgrunnur sem hlær, klappar og tekur þátt í þættinum. Sjósundkonurnar verða líka með í þessum þætti og ýmislegt fleira sem ótalið er hér, enda var ég ekki viðstödd allar upptökur og hlakka því til að sjá útkomuna eftir rúma viku.

Sumarið loksins komið !

Á meðan við vorum fjarstödd var gott veður á Seyðisfirði og allur snjór hvarf úr bænum. Þegar við komum til baka voru fuglar liggjandi á hreiðrum sínum og matjurtagarðurinn okkar beið eftir að verða endurnýjaður. Rúnar sá nú að mestu um það, hann reif upp gamla fúna timbrið og bjó til 3 nýja kassa sem ég setti í kartöflur, gulrætur og jarðarber, en notaði svo gömlu jarðaberjakassana undir grænmetið. Vonandi veður sæmileg uppskera eftir þessa breytingu, því við bættum nýrri mold og skít og sandi í beðin og hreinsuðum burt allt gras og illgresi. Við gerðum þetta eins vel og aðstæður leyfðu, svo nú er bara að vona að veðrið verði líka hliðhollt okkur.

Gengið á Helgafell

Áður en við lögðum af stað til Noregs, gistum við í Hafnarfirðinum og gengum frá íbúðinni þar til útleigu í sumar. Harpa mágkona er alltaf jafn rösk og bauð okkur og Ellu mágkonu og hennar fjölskyldu í mat, svo við hefðum tækifæri til að hittast og spjalla. Hún vildi líka nota góða veðrið og ganga á Helgafell sem er þægilegt göngufjall suður af Hafnarfirði. Mig langaði að skreppa með henni og Rúnar kom þá líka, þó hann væri ekki góður í bakinu. En merkilegt nokk, þessi ganga varð líklega til þess að honum batnaði bara alveg og það var reglulega hressandi að brölta þessa leið eins og fjöldi manns gerði þennan dag. Það er ekki mín sterka hlið að labba upp brekkur eða klífa fjöll, en að ganga á jafnsléttu er ekkert mál, svo ég var bara ánægð með að hafa drifið mig þarna upp, þó ég færi frekar rólega á köflum. Á bakaleiðinni var ég að leika mér við myndatökur eins og sjá má á síðustu myndinni, þar sem við vorum komin niður í skógarlund sem varð á vegi okkar :)

Noregsferð í sól og blíðu

Mánudaginn 21. maí flugum við Rúnar út til Oslo í heimsókn til Jóhönnu okkar og fjölskyldu hennar. Einnig heimsóttum við líka Þröst bróðir Rúnars og hans fjölskyldu sem býr í sjálfri Oslo en Jóhanna og co búa í svefnbænum Ask sem er rétt utan við borgina. Þar er mikill skógur og rólegt mannlíf og aðalbláberjaling í flestum görðum, enda þekur það skógarbotninn allt um kring og því von um góða uppskeru í sumar, því komnir voru sætukoppar í miklu magni. Þau kunna öll mjög vel við sig á þessum stað og veðrið var með eindæmum gott þessa viku sem við stoppuðum hjá þeim, eða um og yfir 30 stig, því hitamælirinn sem var í skugga undir þakskyggni stóð flesta dagana í 30, þannig að hitinn í sólinni hefur verið mikið meiri. Enda flúðum við gjarnan í skugga trjánna og röltum heilmikið um skóginn með barnabörnin okkar, heimsóttum Adam í skólann og hittum þar 2 bekkjarsystur hans sem eru íslenskar og þar af önnur ættuð frá Seyðisfirði. Svona er nú heimurinn lítill. Laugardaginn fyrir Hvítasunnu dvöldum við öll hjá Þresti mági og snæddum þar saman frábæra grillmáltíð innan um plómu og eplatré. Á Hvítasunnudag þegar við þurftum að fara heim, var engu líkara en að allir borgarbúar væru í sólbaði á víðavangi, þar sem vötn, ár eða lækir voru til að busla í, enda hitinn mikill. En okkur var sagt að við hefðum farið með góða veðrið, því daginn eftir var orðið svalt og kærkomin rigning var þá mætt á svæðið. Þetta var ógleymanleg ferð, þó ekki færum við í neinar skoðunarferðir að þessu sinni, nema um nágrennið en þar var líka ýmislegt að sjá þó ekki verið þess getið frekar hér :)