Úrslit í Viskubrunni og íþróttamaður ársins !

Nú er lokið árlegri keppni í VISKUBRUNNI, spurningakeppni Seyðisfjarðarskóla.
Það var lið bæjarskrifstofunnar sem hafði sigur að lokum en sigurliðið frá því í fyrra, kennarar sem kalla sig Gagn og Gaman sem urðu í öðru sæti en í þriðja sæti var lið frá sýsluskrifstofunni og afleysingalið Gullbergs endaði í fjórðar sæti.
Það er venja að við sama tækifæri er valinn íþróttamður ársins og að þessu sinni var það Jóna Ólafsdóttir sem hlaut titilinn, en hún var fjarstödd og fékk tvær litlar frænkur sínar til að taka við verðlaununum fyrir sína hönd og stóðu þær sig með prýði.

Teppi úr gamalli peysu....

Ég tók þá ákvörðun að reyna að leggja mitt af mörkum til starfsins hjá RKI deildinni okkar sem vinnur nú að því að safna og útbúa FÖT SEM FRAMLAG handa fátækum börnum á fyrsta ári. Ég var búin að gera tvö teppi úr prjónabútum frá mömmu og fleiru og vantaði efni í eitthvað meira. Fann þá gamla peysu af mér sem legið hafið í áratugi inni í skáp engum til gagns, því þessi litur fer mér ekki vel. Ég tók mig því til og rakti hana upp og heklaði barnateppi sem nú bíður eftir að fara í ferðalag eitthvað út í heim handa barni sem þarf á því að halda :)

Fleiri flækingar !!!

Við höfum haft þá ánægju að sjá lítinn fallegan flæking = Glóbrysting hér í garðinum á hverjum degi í tæpa 2 mánuði. Í gær birtist svo fyrsti skógarþröstur ársins og hefur verið hér líka í dag. Þriðji gesturinn = svartþrastarkarl mætti svo í fóðrið okkar í morgun og hefur hoppað vítt um garðinn í leit að ýmsu æti og hamast við að róta upp gömlu laufi undan runnum ásamt félaga sínum skógarþrestinum. Enn einn fugl er mættur á svæðið, en það er fyrsti Tjaldurinn sem Rúnar sá hér við nýja lónið, en Tjaldarnir eru yfirleitt fyrstu farfuglarnir sem við sjáum hér á hverju nýju ári....

Viskubrunnur 2011

Hin árlega spurningakeppni Seyðisfjarðarskóla VISKUBRUNNUR hófst í s.l. viku og er nú fyrstu umferð lokið. Ég lenti í liði með kirkjukórnum að þessu sinni og keppti í gærkvöld ásamt einni úr kórnum og syni hennar sem hljóp með henni í skarðið, því að tveir að keppendunum sem áttu að vera með mér, voru veðurtepptir á Egilsstöðum. Okkur gekk alveg ljómandi vel, unnum Síldarvinnsluna og vorum stigahæsta liðið í gærkvöld, ásamt Gullversmönnum.
En hvort okkur kemur til með að ganga jafn vel í kvöld skal ósagt látið.
Verður maður ekki alltaf að vera bjartsýnn og horfa á jákvæðu hliðarnar, þetta er jú bara skemmtun og um að gera að vera með, þó maður vinni ekki, nema kannski af og til :)
Á myndunum má annars vegar sjá unga fólkið sem las upp brandara fyrir okkur, en þau eru að æfa sig fyrir stóru upplestrarkeppnina og um leið að safna fé í ferðasjóð bekkjarins, því þau ætla til Danmerkur í vor eins og venja er með elstu bekkina árlega.... Hinsvegar eru það foreldrar og kennarar sem sátu í sætum dómara, spyrils, tímavarðar og stigateljara...
Jæja, við rétt mörðum sigur í kvöld og þurfum því að taka þátt í 6 liða lokakeppninni sem verður í næstu viku.....

Fögur fjallasýn !

Það er ekki oft svo bjart og gott veður að hægt sé að ljósmynda fjöllin fallegu sem eru í augsýn á leiðinni frá Seyðisfirði til Húsavíkur.
En aldrei þessu vant, þá var dagurinn í gær einn slíkur dagur, þegar hægt var að taka myndir í skemmtilegri sólarbirtu, sem hafði mismunandi lit, eftir því hvenær dagsins myndin er tekin og hvort myndin var tekin á móti sól eða undan sól.
Ég hef haft það fyrir sið að mynda bæði Snæfellið og Herðubreið, þegar veður leyfir á fjallaferðum okkar og í þetta sinn tókust þær betur en oft áður, auk þess sem ég náði mynd af Dyrfjöllunum sem sjaldan skarta nægri birtu þegar ég á þar leið um. Það var því fögur fjallasýnin á þessu ferðalagi okkar :)

Enn ein norðurferð !

Enn og aftur skelltum við Rúnar okkur í norðurferð til mömmu á föstudags- morgunn, þó veðurútlitið væri ekki mjög gott. Enda var dimmt yfir og hríðarfjúk frá Jökuldag og langleiðina í Víðidal, en þar voru miklar vindrokur sem feyktu nokkrum bílum út af veginum, einn valt og var illa farinn og gámur fauk af flutningabíl, en við vorum búin að fá viðvörun og fórum því afar varlega um þetta svæði og komumst klakklaust yfir fjöllin.
Það var hinsvegar mikill munur að koma til Húsavíkur og sjá að nánast allur snjór sem var þar fyrir mánuði síðan var horfinn. Við komum nógu snemma til að geta erindað í banka og verslað og meira að segja skruppum við í eina klst. upp í Safnahús til að skoða nýopnaða sýningu á listaverkum, en einnig var búið að setja upp ljósmyndasýningu af gömlum húsum á Húsavík, sem ekki var síðra að skoða.
Á laugardaginn var blíðskaparveður og sól allan daginn og fórum við því með mömmu sem var óvenju hress, í bíltúr um bæinn og nágrenni og kíktum meira að segja í heimsókn til góðra ættingja.
Mamma hafði líka mjög gaman af að koma heim í Hlíð, en nokkuð er síðan við fórum þangað með hana, vegna veðurs og ófærðar við Hlíð í síðustu ferðum okkar.
Rúnar er líka vanur að kíkja niður fyrir Bakkann og heilsa upp á karlana í skúrunum. Aldrei þessu vant fór ég með honum og hafði bara gaman af að hitta þessu hressu sjómenn sem alltaf hafa gaman af að spjalla og fá sér korn í nefið :)
Áttum svo yndælis kvöld hjá Villu vinkonu og Fúsa sem alltaf taka svo vel á móti okkur. Auk þess hittum við öll móðursystkini mín á Húsavík og fleiri góða vini.
Veðrið var líka mjög gott á sunnudeginum, en við lögðum af stað austur í björtu og komumst heim í ljósaskiptunum, þrátt fyrir seinkun vegna krapaslabbs og sjóbreiðu á veginum alla leiðina yfir fjöllinn

Föt sem framlag hjá RKI

Stjórn Rauðakross- deildar Seyðisfjarðar stendur nú fyrir söfnun og vinnslu á pökkum með barnafötum, teppum o.fl. til nauðstaddra erlendis. Hafa þær heiðurskonur Þóra Ingvalds og Lukka Gissurard. heiðurinn af að halda utan um þetta verkefni en nokkrar konur eru að vinna við að útbúa fatnað, teppi og fleira í þessar pakkningar. Fyrir jólin voru sendir amk. 12 slíkir pakkar sem við vorum búnar að ganga frá og annað eins er nú að verða tilbúið.
Ég er ekki mjög dugleg handverkskona en reyni þó að vera með og gera eitthvað gagn. Ég ákvað t.d. að nota prjónastykki sem móðir mín var búin að prjóna og útbúa úr þeim barnateppi. Með því að klippa niður prjónatrefil sem ég átti og lagfæra nokkur stykkin, þ.e. að prjóna við eitt og rekja stubb af öðrum o.s.frv. þá gat ég látið þetta passa og heklaði svo stykkin saman. Árangurinn má sjá hér á þessum myndum. En hvað ég tek mér næst fyrir hendur skal ósagt látið, en ég ætti nú líka að setja hér inn mynd af handverkskonunum þar sem þær eru saman komnar í Sæbóli við þessa vinnu...

Þurrablótið 2011

Í kvöld 27. jan. hélt grunnskóli Seyðisfjaðar Þurrablót í Herðubreið, en það hefur verið fastur liður s.l. 30 ár. Við höfum nokkrum sinnum farið á þessi blót og haft gaman af. Að þessu sinni urðum við að sleppa Þorrablótinu sem var hér um síðustu helgi, vegna lélegrar heilsu húsbóndans :) en hann er orðinn hressari svo við drifum okkur og nutum bæði góðs matar og skemmtiatriða sem voru í formi söngs, leikatriða, spurningakeppni og fleira. Þorrablótsnefndin sýndi 2 atriði og kennarar sýndu eitt atriði, en nemendur sáu um afganginn.
Einnig völdu nemendur sjálfir drottningu og kóng og kennara vetrarins, auk annarra titla eins og grínisti ársins, fatafrík ársins, kennarasleikja, frekja, EGO o.s.frv... og virtust allir sáttir við sinn titil og tóku þessu gríni á jákvæðan hátt.
Að síðustu átti svo ein stelpan í hópnum afmæli í dag og hún fékk kórónu eins og kóngurinn og drottningin og vinkonurnar sungu fyrir hana afmælissönginn.
Ég þakka fyrir góðan mat og góða skemmtun !

Suðrænn gestur á Seyðisfirði

Það gerist ótrúlega oft að litlir suðrænir fuglar hrekjast með vindum hingað til lands um hávetur og eiga varla lífs von ef þeir lenda í miklum kulda og snjó.
Flesta vetur sjáum við einhverja flækinga en það er nafnið sem þessir gestir hafa fengið meðal fuglaáhugamanna. Fyrir nokkrum dögum tók ég eftir því að lítill fugl (sá reyndar tvo a.m.k. einu sinni) var á flögri milli runnanna í garðinum, en vegna myrkurs og of mikillar fjarlægðar sá ég ekki tegundina, en taldi víst að þetta væru músarindlar sem eru hér af og til á sveimi, enda stærðin svipuð.
En í hádeginu í gær sá í rauðgulan lit á bringu fuglsins sem ég sá nú óvenju vel vegna meiri birtu en dagana á undan og vissi um leið að þetta var Glóbrystingur, enda hafa slíkir fuglar sótt okkur heim áður og einn þeirra sem lét hér lífið var stoppaður upp og er stofuprýði hjá okkur.
Þessir litlu vinir okkar þyrftu á því að halda að veðurguðirnir væru okkur hliðhollir svo þeir lifi veturinn af, en varla er von til þess....þó alltaf megi maður halda í vonina !

Gott vetrarveður - í upphafi Þorra !

Í þetta sinn slepptum við því að fara á þorrablótið sem haldið var hér í gærkvöld.
Vegna heilsufars húsbóndans vorum við heima í rólegheitum og snæddum þorramat, lásum og horfðum á sjónvarp meðan margir bæjarbúar skemmtu sér í Herðubreið.
En veðrið þessa helgi hefur verið einstaklega gott, og 7-9 stiga hiti, svo snjór og hálka er smám saman að hverfa. Við brugðum okkur því smá rúnt í blíðunni til að kanna fuglalíf fjarðarins og anda að okkur hreinu lofti.
Við kláruðum líka að taka niður jólaseríur sem voru utandyra og sáum þá afar fallegt sólarlag út við fjarðarmynnið, en nú er tæpur mánuður þar til sólin verður farin að sjást hér um allan bæ á ný, eftir 4ra mánaða fjarveru í vetur.
Þá verður nú glatt á hjalla og sólarkaffi drukkið í hverju húsi bæjarins :)
The weather has been rather bad the last few weeks, but this weekend as well as the last one too, have been very nice. Even we still can´t see the sun downtown we can see it on the mountains and we look forward to see the sun down here again after 4 months away this winter...

Töfraheimur frosts og funa !

Það eru forréttindi að ferðast í jafn fallegu veðri og við gerðum í dag, um öræfi landsins. Þegar himininn er heiður og sólin skín á fannhvíta jörð í 15 stiga frosti og hrímþoku, þá verður umhverfið meira og minna eins og töfraveröld sem ekki er hægt að lýsa með myndum nema að litlu leyti.
Það glitraði allt og lá við að maður fengi ofbirtu í augun og ég gat ekki stillt mig um að smella af myndum í allar áttir, þó árangurinn væri ekki eins góður ég hefði kosið, enda kann ég takmarkað á nýju myndavélina okkar, sem á víst að geta tekið spes góðar myndir ef rétt er með farið.
Ég hef aldrei tekið eftir því að Jökulsá á Fjöllum verður eins og úfið hraun á að líta í slíkum vetrarham, því hvergi sést í vatn, aðeins klaka og snjóhröngl sem lítur út eins og hraun sem snjór hylur.
On our way from Húsavík to Seyðisfjörður last sunday we got a lovely sunny day and even it was freezing (-15°) it was so beautiful to see the snow glittering like diamonds all over. It was very special and no photo can show it like it really is !!!

Góð ferðahelgi !

Þó að Rúnar minn hafi verið svo óheppinn að rifbeinsbrjóta sig einu sinni enn, þá var hann nógu hress til að koma með mér norður til mömmu, því veðurspáin fyrir helgina var óvenju góð og ég hef reynt að sleppa ekki góðri ferðahelgi til að skreppa til hennar, eigi ég þess nokkurn kost.
Eins og svo oft áður vorum við sérstaklega heppin, því sólin skein alla helgina og við gátum farið rúnt um bæinn með mömmu og notið fegurðarinnar sem býr í snævi þöktu landinu þegar geislar sólarinnar lýsa það upp.
Bærinn er að hluta til í vetrardvala eins og sjá má á hvalabátunum sem kúra á legunni í höfninni, umvafðir seglum gegn vetrarveðrunum.
En það var líka gaman að sjá Húsvíkinga fjölmenna í skíðalyftuna sem stendur við lóðamörkin á framhaldsskólanum og örstutt frá mínu gamla heimili í brekkunni.
Fyrsta Þorrablót ársins var haldið í íþróttahöllinni á laugardagskvöldið og var mjög skemmtilegt að sögn góðra vina sem þar voru staddir...
Á leiðinni heim ókum við fram á nokkra tugi hreindýra sem voru að narta í gróður við vegbrúnina á Jökuldalsheiðinni, en tóku á sprett þegar bíllinn nálgaðist.
We had lovely weekend in Húsavík, visiting my mom and some friends as well. We got lovely weather, sunny days and it makes holidays always so nice. Here are some photos taken from different points of view in town like it is now in t he middle of winter :) On our way back home we saw 60-80 rendyr up on the mountains, trying to find some grass to eat by the road, it´s always nice to see those beautiful animals wild in the nature and a big wonder how they can survive in all this snow for such a long winter...

Gömul GULLKORN !

Mér datt í hug að setja hér gamalt efni til tilbreytingar, en ég útbjó vefsíðu fyrir ca. áratug, en glataði henni fyrir nokkrum árum þegar við skiptum um netþjónustu.
Hér koma nokkur af þessum gullkornum sem ég hafði safnað og held ennþá mikið uppá:

ÞROSKI felst í því að elska óháð væntingum !

SANNLEIKURINN breytist ALDREI, hann er ÓHAGGANLEGUR !

Það er HUGURINN sem ávallt byggir allt !

Skuggarnir eru GJAFIR KÆRLEIKANS eins sannarlega og ljósið er það

EKKERT er sterkara en VILJI mannsins !

Góðar bækur geta aðeins vísað veginn, lærdómurinn er í ÞÉR sjálfum !

EKKERT er fljótara en HUGUR MANNSINS !

Allt sem þér vitið um Guð, himinn og helvíti, er í yðar eigin sjálfi !

ALLIR eru jafnir fyrir LÖGMÁLI GUÐS !

Dæmdu ALDREI mannveru eftir líkamlegri heilsu eða útliti !

ANDLEGI VILJINN er AFLIÐ SJÁLFT !

Óttinn er eins og strokleður sem þurrkar út það góða sem við viljum gera

Þeim sem TRÚIR er enginn hlutur ómögulegur !

Enginn vísindamaður getur krufuð kærleikann eða skapað fræ sem blómstrar lífi !

HIMNARÍKI er ásigkomulag vitundarinnar !

Helmingur af öllum okkar meinum á upptök sín í huga mannsins einum !

KÆRLEIKURINN er eina vopnið sem við þurfum í lífinu !

Í náttúrunni er hvorki um umbun né refsingu að ræða, aðeins AFLEIÐINGU !

ÞEKKINGIN er eins og TRÉ sem er lengi að vaxa !

GUÐ táknar óendanleikann !

Óveður og ófærð á nýju ári ....!

Það verður að segjast eins og er að veðrið og ófærðin á þessu nýja ári hefur verið með eindæmum leiðinlegt. Eini dagurinn sem var sæmilega fært bæði fyrir bíla og flugvélar var 5. jan. en þá fóru einmitt öll börnin okkar, tengdadóttir og barnabörnin til síns heima. Strákarnir og Hildur lögðu af stað fyrir hádegi og óku suðurleiðina sem var auð nánast frá Fáskrúðsfjarðar- göngunum og suður. En ég keyrði Jóhönnu og börnin í flug síðdegis og rétt komst klakklaust til baka, því ekki sá á milli stika í kófinu, þó ekki væri mikil ófærð, þá var blindan stundum svo mikil að maður varð að stoppa og bíða. Og ófærðin hér í bænum er líka leiðinleg og tilgangslaust að reyna að moka, því það snjóar jafnóðum yfir allt. Það kom líka rigning og asahláka ofan í snjóinn sem gerði auðvitað illt verra, því það stóð svo stutt að það gerði ekkert gagn.
En ekki hef ég þurft að kvarta yfir mjólkurskorti eða vöruleysi, því ég er HOME ALONE og þarf ekki mikið, svo ófærðin hefur ekki áhrif á mig þess vegna, eins og suma aðra.
Í gær kvöddum við líka aldursforseta bæjarins hana Fíu okkar sem var á 98. aldursári og merkilegt nokk, ég komst á bílnum til kirkju, því búið var að skafa helstu götur, en veit ekki hvort ráðlegt er að reyna að hreyfa hann í dag, því svo hefur bætt á snjóinn í nótt og ekkert mokað hér í okkar götu ennþá, hvað sem verður ???
Ég vorkenni öllum fuglunum sem þurfa að hýrast úti þessa löngu, köldu og dimmu daga og hafa lítið eða ekkert æti, svo ég ber út daglega fóður handa þeim, mest korn og brauð en einnig þá fitu sem fellur til á heimilinu og epli fyrir þá fáu þresti sem eiga leið um, en einn svartþröstur dvaldi hjá okkur hálfan des. og gráþröstur hefur séðst hér eftir áramótin, en lítið borið á öðrum flækingum....

Áramótin 2010-2011

Áramótaveðrið var ljómandi gott. Kvöldið hófst á Kalkúnaveislu og eftirrétti, en síðan var ekið inn fyrir Langatanga til að fylgjast með brennunni og flugeldasýningunni sem var að þessu sinni staðsett við Þórsmörk. Þegar við komum aftur heim var horft á Skaupið eins og venjulega, en síðan drifum við okkur með 1 tertu í kaffi til Kristrúnar og Birgis eins og undanfarin ár og þar var mikil flugeldaskothríð um miðnættið. Adam litli fékk meira að segja að halda á neyðarblysum með afa sínum og var stoltur af og skemmti sér vel eins og strákar Ástu Guðrúnar og Símonar.

Fjölskylduveisla og jólaball

Binna frænka Rúnars hefur verið mjög dugleg að hafa jólakaffi fyrir stórfjölskylduna undanfarin jól. Allt sem við gerum er að mæta með eina köku eða annað meðlæti og njóta samvistanna. Það gerðum við einnig þessi jól eða á 2. í jólum. En þá vildi svo til að Lion var á sama tíma með sitt árlega jólaball og auðvitað urðum við líka að kíkja þangað með börnin. Það gekk allt saman vel og flestir virtust hafa gaman af, bæði undir og eldri :) Þessi jól eru nefnilega sannkölluð atvinnurekendajól, því aðeins er um 2 langar helgar að ræða en annars venjulegir vinnudagar þar á milli.

Aðfangadagur !

Ég held ég muni ekki eftir jafn jólalegum Aðfangadegi, veðurfarslega séð, eins og nú í ár. Það var samt flest hefðbundið hjá okkur þennan dag. Eftir jólabaðið var öðrum föstum liðum sinnt, eins og skipt á rúmum, hangikjöt soðið, eftirréttur tilreiddur og steikin gerð klár í ofninn. Ég var líka búin að leggja á borð og hafa allt tilbúið. En síðan mætti ég til söngs í jólamessuna kl. 17 og kom heim rétt fyrir kl. 19, þegar steikin var tilbúin og allt mitt heimafólk komið í sparifötin og biðu eftir að ég kláraði sósuna. Hehe :)
Adam varð mjög glaður þegar tveir jólasveinar mættu með gjafir handa honum og systur hans og komu inn í stofu á snjóugum stígvélum og fengu sér súkklaði með honum.
En gleðin var þó mest þegar pakkarnir voru opnaðir, því allir innihéldu þeir eitthvað sem hann vildi fá og var glaður með. Hann tók líka upp gjafirnar fyrir 4ra mánaða systur sína og bauð okkur hinum aðstoð við að opna okkar pakka, því honum fannst við ekki nógu snögg við það :)
Að sjálfsögðu var borðað meira en við höfum gott af, það er bara fastur liður sem trúlega breytist seint :)

Engin jól án LAUFABRAUÐS :)

Það var einlæg ósk Jóhönnu Bjargar að ég mundi geyma laufabrauðs- baksturinn þar til hún og bræður hennar væru komin heim. Og í dag 15. des. gátum við drifið í þessum árlega og ómissandi viðburði á okkar heimili. Börnin mín hjálpuðu mér við að skera í kökurnar en Adam ömmustrákur var yfir-pikkari og Sumaja Rós systir hans sat lengst af í stólnum sínum og hjalaði og horfði á.
Mér gekk svo býsna vel að steikja allar 50 kökurnar, þó þrjár þeirra yrðu aðeins dekkri en ég hefði kosið. En við helltum okkur bara yfir þær að verki loknu og átum þær með góðri lyst :)

Árlegt jólahlaðborð !

Það er orðin föst venja að áhöfn Gullvers og eigendur bjóða mökum á jólahlaðborð á Ölduna. Það var ekki af verri endanum fremur en fyrri daginn og erfitt að komast hjá því að éta á sig gat.
Í forrétt var afskaplega góð villibráðarsúpa og margir fleiri réttir eins og paté, grafinn og reyktur lax, grafið hreindýrakjöt og fleira.
Í aðalrétt var kalkúnn, hreindýrafile og skorpusteik (svína sem smakkaðist allt mjög vel með ljúffengri rjómasveppasósu.
Eftirréttirnir voru Ris a´la mande, búðingur með karamellusósu, heitt frauð með rjóma og einhver eplaréttur.
Með þessu drakk ég ágætis rauðvín, vatn og Egils appelsín sem aldrei klikkar :)
Ég þakka kærlega fyrir mig !

Aðventumessan 2010

Síðastliðinn sunnudag var Aðventumessa í Seyðisfjarðar- kirkju. Kirkjukórinn var búinn að æfa sérstök lög fyrir þessa messu í allt haust og því var ákveðið að halda upphitunar- tónleika uppi á spítala kl 15:30 og gekk það bara vel.
En kl 17:00 hófst messan í kirkjunni. Athöfnin var mjög létt að þessu sinni, fyrst sungu börn úr kirkjuskólanum og kveiktu á 3 jólakertum og við í kórnum tókum undir, en síðan tók við okkar söngprógram og heppnaðist bara vel að sögn Sigurbjargar organista. Það er alltaf hátíðlegt í þessum árlegu messum, þegar börnin taka þátt í helgileikjum og söng og í lok messunnar er kveikt á kertum sem allir viðstaddir fá í hendur og ljós kirkjunnar slökkt á sama tíma.
Ég náði því miður ekki góðum myndum í rökkrinu niðri í kirkjunni, en tók eina mynd af hluta kórsins með kertin í höndum :)