Babuji á Seyðisfirði

Í dag 31. maí 2010 kom saman nokkuð stór hópur fólks á "gamla spítalanum" til að hitta og hlusta á Indverjann Babuji (eða Mooni) sem kom hingað á vegum Kristbjargar Kristmunds blómadropa- og jógakennara en þau kynntust fyrir 4 árum á Indlandi.
Babuji er læknismenntaður og kaus að dvelja í einangrun um árabil eftir að námi hans lauk. Hann er örugglega eldri en hann lítur út fyrir að vera, því hann virkar á mig sem ungur maður með góða kímnigáfu og með ótrúlega þolinmæði og vilja til að lifa því sérstaka lífi sem hann lifir nú eftir að einangrun hans lauk.
Honum fylgir ávallt aðstoðarkona hans sem sér um daglegar þarfir hans og einnig kom hópur Íslendinga að sunnan til að vera með honum hér á meðan á dvöl hans stendur hér eystra.
Umræðuefni samfundarins var Ást eða KÆRLEIKUR í ýmsum myndum eins og viðstaddir hafa upplifað óeigingjarna ást. Sumir voru duglegri en aðrir að tjá sig, svona eins og gengur og að lokum fengum við Seyðfirðingar að eiga við hann fáein orð og þakka fyrir samveruna.
Hér má sjá sýnishorn af þeim myndum sem ég tók, en ég bað um leyfi til myndatöku og var því vel tekið, takk fyrir mig :)

Sjaldséðir gestir !

Alltaf annað slagið koma hingað sjaldséðir fuglar og flækingar sem slæðast hingað óvart með veðri og vindum.
Við höfum ekki oft séð Rauðbrystinga hér á landi og aldrei fyrr hef ég séð þá hér á Seyðisfirði, en í morgun voru a.m.k. 12 eintök önnum kafnir í matarleit í fjörunni úti á Vestdalseyri. Önnur óvænt sjón mætti okkur þar líka, en það var hópur af Óðinshönum sem syntu í sjávarborðinu rétt hjá Rauðbrystingunum, en ég hef aldrei séð þá fyrr á sjónum, aðeins við ferskvatn, þ.e. vötn, tjarnir og læki hingað til.
Þessi kosninga+Evrovision-helgi er búin að vera óvenju sólrík og góð miðað við sólarleysið og kuldatíðina undanfarið.... :)))

Adam í sveitinni :)))

Þegar ég hugsa til baka til æskuáranna, þá var eitt það skemmtilegasta sem ég gerði að fara í heimsókn til afa og ömmu í sveitina. Þá voru þar hestar, kindur, kýr og hænsni og ég naut þess af öllu hjarta að umgangast dýrin, fara á hestbak, horfa á ömmu mjólka kýrnar, taka á móti lömbunum á vorin og fara í réttirnar á haustin, tosast í heyskap og gefa hænunum og tína saman eggin þeirra.
Ég get því vel skilið að dóttursonur okkar uni sér vel í rólegheitum hjá okkur, því sannarlega gerum við okkar besta til að gleðja hann og sinna honum sem best. Hann fær að vísu ekki tækifæri til að gera sömu hluti og ég gerði á hans aldri, en hann fær að gera ýmislegt annað, eins og að ganga um friðaða náttúru og skoða fuglahreiður og egg, sigla á trillu út á fjörð og sjá hvali, fugla og fiska.
Hann fær að taka þátt í því sem við erum að gera, eins og garðvinnunni o.fl. og fær að heyra skemmtilegar sögur á hverju kvöldi og borða það sem hann langar í :D
Síðast en ekki síst þá fékk Adam að fara í heimsókn í hænsnakofann hjá Önnu nágrannakonu og fékk að hirða 3 egg sem þar voru. Það var nú ekki leiðinlegt :)
Vonandi verða hans bernskuminningar jafn góðar og mínar, þegar árin færast yfir hann :)

Tónleikar kirkjukórsins

Ég gleymdi að geta þess að laugardaginn 22. maí hélt kórinn tónleika í bláu kirkjunni undir stjórn Sigurbjargar organista, en hún er nú komin aftur til okkar eftir áratuga fjarveru. Lögin á dagskránni voru öll eftir Inga T. Lárusson, nema lokalagið Seyðisfjörður sem er eftir Stein Stefánsson. Hjónin Sunsana og Charles Ross spiluðu einnig 6 lög eftir Inga og vorum okkur til aðstoðar og uppfyllingar.
Ég veit ekki annað en að vel hafi tekist til og gestir virtust mjög ánægðir með útkomuna. Er það vel :)
Að tónleikunum loknum héldum við yfir á veitingahúsið Ölduna og snæddum þar saman ljómandi góðan kvöldverð ásamt mökum okkar, alls hátt í 50 manns.
Þetta var því ljómandi góður dagur, sólríkur og bjartur og síðast en ekki síst afmælisdagur yngri sonar okkar Bergþórs :)

Hvítasunnan á Húsavík :)

Á Hvítasunnu-dagsmorgunn fórum við Rúnar snemma af stað norður til Húsavíkur til að hitta mömmu, Diddu systir, Jóhönnu Björgu og Adam, en þau 3 síðastnefndu voru komin norður á undan okkur. Ferðin gekk vel og veðrið gott. Við sáum mikið af fuglum á leiðinni og nokkur hreindýr, en annars var tíðindalítið á ferðinni yfir fjöllin.
Við notuðum hluta úr deginum til að setja niður útsæði í garðinn hans pabba, en hann var herfaður einmitt á Hvítasunnumorgni okkur til mestu furðu. En þar sem allt var til reiðu fyrir niðursetningu var ekki eftir neinu að bíða.
Mamma var bara hress og við hittum flesta ættingjana eins og venjulega og Sigrúnu vinkonu á Þórðarstöðum. Rúnar skrapp með Adam í heimsókn til kinda og lamba hjá Jónda og fórum hefðbundinn rúnt með mömmu, m.a. í þetta sinn upp að Botnsvatni, en þar er áftin búin að verpa í hólmanum eins og undanfarin ár og talsvert fuglalíf við vatnið.
Blíðuveður gerði okkur svo kveðjustundina og heimferðina léttari. Adam kom með okkur austur og verður hér framyfir sjómannadag, sem er góð tilbreyting fyrir okkur öll.

Afmælisbörn helgarinnar !

Þetta unga par, Bergþór og Hildur Inga eru afmælisbörn helgarinnar í okkar fjölskyldu. Hildur á afmæli 21. maí og Bergþór 22. maí. Að þessu sinni hélt Bergþór uppá "aldarfjóðungs" afmæli sitt. Því miður gátum við ekki verið öll saman fjölskyldan eins og á afmælum Sigga og Jóhönnu, en við reynum að bæta það upp síðar ;)
Ekki svo að skilja að þau séu einu afmælisbörnin að þessu sinni, því við heiðrum líka minningu þeirra Þorsteins Guðjónssonar afa Rúnars sem var fæddur 23. maí og pabba (Sigurðar Gunnarssonar) sem var fæddur 24. maí. Fleiri fjarskyldari ættingjar eiga líka afmæli um þessar mundir en ég sleppi því að telja þau öll upp :)))

Hnúfubakur í Seyðisfirði

Í dag 22. maí 2010 var myndarlegur hnúfubakur á veiðum í Seyðisfirði og meðfylgjandi myndir eru af honum. En undanfarnar vikur hafa ýmsir hvalir séðst hér í firðinum á veiðum og virðist vera nóg æti þar að hafa, enda sjáum við stöðugan straum af kríum með síli í gogginum á ferð frá sjónum og hér upp með ánni að varpsvæði þeirra.
Þessa dagana eru kríurnar einmitt að hefja varpið og erum við búin að sjá fyrstu eggin og fundum reyndar 3 hettumáfshreiður úti á Ölfueyri og létum okkur hafa það að fá okkur egg í soðið :) Þau smökkuðust MJÖG VEL !!!

Flatbrauðsgerð utan dyra í maí :)

Þegar ég kom heim af kóræfingu í gærkvöld, þá sá ég mjög óvenjulega sjón. Það var móðir nágrannakonu minnar sem var að "svíða" flatkökur utan dyra, á sama hátt og við svíðum kindahausa, lappir og annað sem við viljum svíða. Fórst henni þetta mjög vel úr hendi og gaman hefði verið að smakka á þessum fínu kökum hennar, sem eiga víst að fara í væntanlega fermingarveislu sem verður innan fjölskyldunnar um helgina.
Kannski ég fari að prófa að hnoða flatkökudeig og baka nokkur stykki á þennan hátt, margt er vissulega vitlausara en það.... bara gaman að þessu :)))

Líf og list Geira Emils

Í dag, laugardaginn 15. maí var opnuð sýningin ; Geiri- líf og list Ásgeirs Jóns Emilssonar í Skaftfelli á Seyðisfirði.
Svo heppilega vildi til að Gullver NS kom inn í morgun og Rúnar gat því mætt á opnunina, en Geiri var mikill vinur hans og samstarfsmaður um árabil, enda leitaði Geiri mikið til Rúnars ef eitthvað bilaði hjá honum á heimilinu.
Okkur til ánægju þá fjölmenntu bæjarbúar á opnunina og má segja að fullt hafi verið út úr dyrum á tímabili og allir virtust mjög ánægðir með sýninguna.
Sýningin sjálf spannaði alla helstu þætti listsköpunar Geira, sem fólst að mestu leyti í að teikna, mála, taka myndir, brjóta sígarettupakka á sérstakan hátt og líma saman í ramma utan um myndir, skálar og öskubakka. Og síðast en ekki síst klippti hann gos-og bjórdósir og málmdósir sem hann breytti í kórónur, lítil borð, stóla, myndaramma og fleira skemmtilegt og fallegt. Hér má sjá nokkur sýnishorn af þessum verkum hans, auk þess sem ég læt 2 myndir af honum fljóta með, aðra frá æskuárum og hina frá síðustu árunum sem hann lifði.
Í tilefni dagsins var Geirahús opið frá kl 3-6 og við Rúnar drifum okkur þangað, því að langt er síðan við komum þangað í heimsókn til Geira.
Geiri var einstaklega ljúf sál og bæði barngóður og mikill dýravinur, enda átti hann lengi vel ketti sem hann hélt mikið uppá.
Geiri var einstakur maður, hann fæddist með dapra sjón og skerta heyrn og háði hvort tveggja honum á ýmsan hátt, þó hann léti það ekki stöðva sig við listsköpun sína.
Ég trúi því að Geiri hafi verið mættur á svæðið og getað fylgst með öllum gömlu vinnufélögunum, vinunum og ættingjunum sem voru mættir til að samgleðjast í dag yfir minningunni um góðan félaga sem ekki er okkur sýnilegur lengur :)

Handverkssýning og 80 ára afmæli

Í dag 13. maí = Uppstigningardag var haldin vorsýning handverks-og-hússtjórnar skólans á Hallormsstað og um leið haldið upp á 80 ára afmæli skólans.
Ég ákvað að bregða mér þangað og hóaði í eina kunningjakonu sem ég taldi að væri tilbúin að skreppa með mér. Hún sló til og hafði samband við aðra konu sem hún vissi að ætlaði að fara og við buðum henni með ásamt vinkonu hennar á Egilsstöðum.
Þannig "fjórmenntum" við inn í Hallormsstað í stilltu og meinlausu veðri og hittum þar fyrir ótrúlegan fjölda gesta sem komnir voru í sömu erindagjörðum og við, að kíkja á handverk nemenda og kaupa sér gott kaffi í tilefni dagsins.
Þegar ég var í Hússtjórnarskóla á sínum tíma, þá lærði ég ekki að vefa, en hef alltaf haft löngun til að prófa það. Vonandi kemur að því að boðið verður uppá slík námskeið þarna efra, svo ég geti fengið tækifæri til að spreyta mig á þessu handverki eins og svo mörgu öðru sem ég hef prófað um æfina.
Á heimleiðinni kíktum við aðeins inn hjá Sigrúnu samferðakonu okkar sem býr á Egilsstöðum og skoðuðum nýtt og fallegt hús hennar. Og nú er góður dagur að kveldi kominn og best að bjóða bara GÓÐA NÓTT !

Blúndur og blásýra...

Nágrannar mínir Anna og Guðni sem eru prýðisgóðir leikarar buðu mér að koma á generalprufu Leikfélagsins á leikritinu Blúndur og blásýra sem var í kvöld 6. maí.
Þetta er alveg prýðisgott "stykki" sem kemur á óvart og best að segja ekki of mikið um innihald verksins.
En það stóðu allir leikarar sig mjög vel og leikmyndin var alveg sérstaklega fín og viðeigandi, ég man varla eftir svona flottri senu í leikhúsi fyrr né síðar.
Af eigin reynslu vitum við Rúnar að það liggur mjög mikil vinna á bak við svona leikrit og ekki nema sjálfsagt fyrir bæjarbúa að mæta á þessa ágætu skemmtun til að samgleðjast þeim sem eru svo duglegir að leggja á sig alla þessa vinnu til að skemmta öðrum. Það verður örugglega enginn svikinn af þessu verki og ég skora á þá sem geta að missa ekki af því - GÓÐA SKEMMTUN og TAKK FYRIR MIG :)

Krían komin og flestir aðrir vorfuglar !

Mikið er nú yndislegt að sofna við fuglasöng og vakna við hann líka á hverjum morgni. Nú má segja að flestallir vorfuglarnir séu mættir á svæðið okkar hér, því að krían kom svífandi hingað inn með ánni í gær og er í dag að skoða sig um á varpsvæðinu hér innar með ánni. En krían er með síðustu vorfuglunum sem mæta hingað og þegar hún er komin finnst manni sumarið vera gengið í garð.
Aðrir fuglar sem gleðja okkur núna með söng og nærveru sinni eru skógarþrestir, stelkar, hrossagaukar, lóur, spóar, tjaldar og auk þess er hópur af anda og gæsapörum hér við ána sem heyrist mismikið í. En auk þessarra hefðbundnu fugla þá koma hér erlendir flækingar af og til og gleðja okkur með óvæntri nærveru sinni. Hér má sjá SEFHÆNU sem er sjaldgæfur flækingur, en hún var hér um tíma fyrir stuttu og þótti gott að fá brauð í gogginn :)
Vonandi verður bara nóg æti fyrir alla þessa fugla svo hér verði iðandi fuglalíf í sumar okkur öllum til mestu ánægju....

Most of the yearly birds have now arrived over to Seydisfjordur and we love to have them around and listen to their songs and seeing their eggs and nests all around :)

1. maí 2010

Það er árlegur siður hér í bæ að verkalýðsfélagið Afl býður heimamönnum til kaffisamsætis í Herðubreið á degi verkalýðsins 1. maí. Þeir nemendur sem eru að safna fyrir útskriftarferð ár hvert hafa ásamt foreldrum sínum tekið að sér (um árabil) að sjá um kaffið og skemmtiatriðin og var það ekki síðra í ár en venjulega. Terturnar eru alltaf jafn góðar og girnilegar og létt skemmtunin, auk þess sem fulltrúi frá Afli hefur líka flutt ræðu dagsins og að sjálfsögðu syngur svo allur salurinn baráttusöng verkalýðsins eins og gert er um land allt á þessum degi.

Kaffispjall !

Í mörg ár hafa karlmenn á Seyðisfirði haft fyrir sið að hittast á bensínsjoppum bæjarins í kaffispjall. Ég hef sjaldan litið þar inn en Rúnar er fastagestur þar þegar hann er í landi. Þetta er vafalítið ágætur siður :)
Einnig hefur Rúnar haft fyrir sið að rölta yfir götuna á morgnana í vinnustaða-kaffispjall hjá Bubba og Skúla í hitaveitunni. Ég leit eitt sinn inn til þeirra og náði meðfylgjandi mynd af þeim félögum með kaffið á "lofti".
"Coffie brake" and chat which Rúnar is co-op-ing when he´s at home :)

Gleðilegt sumar !

Sumardagurinn fyrsti rann upp sólríkur og bjartur, þó hitastigið væri lítið ofan við frostmark. En við Rúnar tókum strad til óspilltra málanna að pakka saman rúmfötum og fleiru sem við tókum með okkur í helgarheimsókn til Húsavíkur. Ferðin norður gekk ljómandi vel og mamma var furðu hress og naut þess að skreppa í bíltúr á hverjum degi, enda skein sólin svikalaust alla dagana.
Nágrannar okkar á Húsavík urðu fyrir því óhappi að heitavatnslögn sprakk undir gólfi hjá þeim og eyðilagði gamla hlutann af húsinu þeirra. Þau urðu að rífa þann part í burtu og voru þau nú að keppast við að steypa upp nýja útveggi og gólf eins og sjá má á meðfylgjandi mynd. Þetta kostaði heilmikið rask og má segja að það snerti okkur líka, þó ekki séum við að kvarta yfir neinu.
Við sóttum útsæðiskartöflur í geymsluna og lögðum þær fyrir vorið, svo hægt verði að setja þær niður - væntanlega í næstu norðurferð eftir ca. mánuð...
Við hittum og heimsóttum góða vini og ættingja eins og venjulega og enduðum með því að taka smá krók á heimleið okkar með því að aka um Reykjahverfið, en þar sáum við heil ósköp af heiðargæsum og innan um þær var hópur af HELSINGJUM sem eru frekar sjaldséðir á okkar slóðum, þó þeir hafi dvalið óvenju mikið á Seyðisfirði þetta vorið - væntanlega á leiðinni til Grænlands.
Við enduðum að síðustu í heimsókn hjá góðri vinkonu (skólasystur) sem býr hjá Laugum og nutum góðra veitinga og samfunda við hana og hennar yndælu fjölskyldu.
Sólarlagið fyrir norðan var einstaklega fallegt og fáið þið hér eitt sýnishorn af þeirri fegurð, þó aldrei sé hægt að fanga slíka fegurð á mynd, nema að litlu leyti...
Við vonum að veðurguðirnir verði okkur hliðhollir á norður og austurlandi þetta árið, því nóg er komið af skýjuðum þokusumrum eins og verið hefur undanfarin ár.
Gleðilegt sumar öll sömul og takk fyrir veturinn.

Gleym-mér-ei 1 árs

Á síðasta vetrardag héldu Gleym-mér-ei systur, Guðrún, Óla Mæja og Sigurveig Gísladætur upp á 1 árs afmæli kjólasölu-fyrirtækisins sem þær hafa verið mjög duglegar að sinna s.l. ár.
Tískusýningar hafa verið nokkrar hér á árinu á þeirra vegum og Facebook er fastur vettvangur þeirra, með myndaseríum af kjólum til sölu o.s.frv...
Það er ekki spurning að það er mikil vinna á bak við svona fyrirtæki, þó ekki séu þær með neina verslun, aðra en þessa óbeinu á netinu.
Afmælisveislan var glæsileg og vel sótt af Seyðfirskum konum og fleirum úr nágrannabyggðum, auk nokkurra karlmanna sem virtust ekki síður skemmta sér vel en kvenþjóðin... Til hamingju stelpur !

Fyrsta sólbað ársins !!!

Dagurinn í dag 11. apríl, var einn besti dagur ársins, hingað til, a.m.k. hvað hitastig varðar, enda fór hitinn í 14 stig og það var blankalogn yfir hádaginn.
Ég gat meira að segja lagst í sólbað í fyrsta skipti á þessu ári. Það var vissulega langþráð stund og ég lá í heilar 2 klst. á dýnu innan við opna svalahurðina þar sem sólin skein beint á mig og hálf steikti mig....
En í morgun var ég búin að spretta úr spori á hjólinu, fór hring um bæinn og tók þá mynd af blómabeði fullu af útsprungnum krókusum sem "brostu" mót sólu :) Ég skrapp líka rúnt til að líta á farfuglana sem streyma nú til landsins í hópum og sá að gæsirnar eru mættar á hreiðursvæðin og ströndin öll morandi í Tjalda-pörum. Skógarþrestir eru líka farnir að vekja mann uppúr kl. 7 á morgnana með sínum notalega söng og lækjarniðurinn heyrðist óvenju vel í dag, enda snjórinn allur að bráðna og streymir niður hlíðarnar með tilheyrandi hávaða.
Ég náði líka mynd af nágrannakettinum okkar, honum Kela, sem skrapp upp á húsþak heima hjá sér og virtist una sér þar vel um stund.
Að lokum var ég svo myndarleg og bakaði eplaköku handa frændum Rúnars sem hér dvelja um tíma í íbúðinni í kjallaranum...
Það má því segja að þetta sé búinn að vera góður dagur og er hann senn á enda runninn, en vonandi fylgja margir slíkir í kjölfarið í vor og sumar...

Árlegur Aðalfundur á Fáskrúðsfirði

Árlegur Aðalfundur Austfirskrar Upplýsingar var haldinn á Fáskrúðsfirði að þessu sinni. Bókasafnið á Fáskrúðsfirði er staðsett í nýbyggingu grunnskólans og aðstaða nokkuð góð, þó vissulega hefði verið hægt að hafa hana betri ef heimamenn hefðu verið með í ráðum.
Ekki gátu allir austfirskir bókaverðir mætt til fundarins frekar en venjulega, en stór hluti þeirra kom þó og átti saman góðan dag. Hefðbundin fundarstörf voru viðhöfð og rabbað var lengi og rökrætt heilmikið um ýmis málefni sem koma bókasöfnunum við á einn eða annan hátt.
Að því loknu fór Linda Hugdís með okkur í skoðunarferð um nýbyggingu skólans og síðan héldum við niður á lítið og kósý veitingahús, þar sem við fengum ilmandi kakó, kaffi og meðlæti sem var vel útilátið og gott.
Það er bráðnauðsynlegt fyrir okkur sem vinnum svona mikið ein eins og bókaverðir á litlum söfnum gera, að hittast reglulega og bera saman bækur okkar og leysa sameiginleg mál sem eru oft til vandræða. Fyrir svo utan tækifærið að kynnast betur og fá fréttir o.fl...

Páskar 2010

Páskahelgin er búin að vera mjög góð, veður með besta móti fyrir útivistarfólk sem flykktist upp í Stafdal og naut veðurblíðunnar, sérstaklega á Páskadag. Siggi Birkir kom með snjóbrettið sitt og hefur verið að leika sér í fjallinu flesta dagana.
Við höfum verið nokkuð hófleg við matarveisluát og páskaeggin eru ennþá hálfétin í ísskápnum, því ég hafði hreinlega ekki list á svona miklum sætindum. Hvað mig snertir snýst þetta fyrst og fremst um að fá málshátt, en ekki sælgæti. Að þessu sinni fékk ég málsháttinn; Öll él birtir upp um síðir, en Rúnar fékk; Ekki fellur tré við fyrsta högg og Siggi fékk málsháttinn; Þeir fá byr sem bíða og passar einkar vel við hann, því hann mætti með svifdrekann sinn sem hann hafði hugsað sér að nota uppi á heiði og láta sig fljóta um á brettinu ef vindur væri nægur. Vindinn hefur þó vantað og verður hann að bíða betra tækifæris og hefur næga þolinmæði til þess :)
Aðeins ein sæt rjómaterta hefur horfið ofan í okkur þessa helgina og harðfiskur sem Rúnar býr til sjálfur hefur verið aðal snakkið sem borðað hefur verið á okkar heimili undanfarið. Við höfum líka setið á kvöldin og horft á nokkra DVD mynddiska og þess á milli rabbað við Reyni bónda frænda Rúnars sem dvelur hér ásamt hundinum Glóa sem sonur hans varð að skilja eftir þegar hann fór heim í páskafrí. En þeir feðgar eru að dunda við að koma nágrannahúsinu (sem Reynir keypti) í leiguhæft ástand, auk þess sem til stendur að nota kjallarann sem sumarhús fyrir stórfjölskylduna á Selfossi. Vonandi fáum við bara góða nágranna sem nenna að hugsa um garðinn svo að sumarlöng baráttan við illgresið sem þaðan hefur flætt, taki að minnka.....

Ferming 1. apríl 2010

Fermingardagur 7 seyðfirskra ungmenna var ekkert aprílgabb, heldur fór athöfnin vel fram og tók hátt í 2 tíma, enda bættist skírn við athöfnina. Það var eitt fermingarbarnanna sem hélt á bróður sínum urndir skírn að fermingu lokinni.
2 börn af sama árgangi ætla að fermast við önnur tækifæri, annars vegar borgarlegri fermingu og hinsvegar kaþólskri.
Við vorum boðin í 1 veislu til Ríkeyjar Ástu frænku Rúnars og átum auðvitað á okkur gat eins og oft fyrr og síðar þegar góðar tertur eru annars vegar.
Ekki var samt nokkur leið að smakka á öllum tegundunum, til þess var magaplássið of lítið. En fyrir vikið slapp ég við að elda kvöldmat, því enga list höfðum við það sem eftir lifði dagsins...

Myntsafnið í Seðlabankanum

Í áratug eða meira hefur mig langað að skreppa í Seðlabankann til að skoða Myntsafnið sem þar er til húsa. Það var ekki fyrr en s.l. laugardag (27/3)sem ég kom því í verk.
Við Rúnar vorum þá stödd niður í miðbæ í Rvk, ásamt Sigga Birki, þegar ég bað þá að koma með mér þangað. Þetta reyndist hin fróðlegasta skemmtun og satt að segja hef ég grun um að margir leiti langt yfir skammt eftir söfnum og sýningum og ættu að líta sér nær.
Þegar við fórum að ræða um þessa heimsókn við ættingja og vini, þá viðurkenndu allir að þeir hefðu bara ekki vitað um þetta safn eða aldrei pælt í að skoða það o.s.frv....
Ég skora því á fólk á höfuðborgarsvæðinu að láta ekki gott tækifæri úr hendi sleppa, ef þeir eru á ferð í nágrenni Arnarhóls. Það er meira að segja frítt inn og í kaupbæti má sjá stórt og mikið málverk eftir Gunnlaug Scheving auk nóbelsverðlauna Halldórs Laxness, svo eitthvað sé nefnt :)
Góða skemmtun !

Páskahretið !

Þegar við lentum á Egilsstaðaflugvelli í gær, þá tók á móti okkur óþægileg snjóbirta, enda glaða sól og fannhvít jörð. Það reyndist ekki mjög erfitt að komast yfir Fjarðarheiði, þó skyggnið væri ekki gott. Síðar um daginn fór að kafsnjóa eins og komin væri jólamánuður og fannst víst flestum nóg um.
En það sem sjá má á meðfylgjandi myndum var útlitið utandyra hjá okkur, þegar við komum á fætur í morgun. Allt fannbarið, jafnt hús, bílar og aðrir hlutir sem veðrið náði til. Þetta er sannkallað páskahret og vonandi það síðasta á þessum vetri, því við erum orðin leið á þessum umhleypingum sem hindra okkur á margan hátt. Vorið virtist á næsta leyti og fyrstu vorblómin útsprungin þegar þetta skall á. Ég var aftur komin með hjólið mitt í notkun, enda veitti mér ekki af hreyfingunni eftir kyrrsetur skammdegisins og var því glöð farin að hlakka til vorverkanna í garðinum og hætt að gefa fuglunum, sem nú hópast aftur í bæinn í leit að æti....