Svipmyndir frá Mærudögum á Húsavík

Vegna þess hve margar myndir ég tók af fólki á Mærudögum, þá langar mig að setja hér inn fáeinar til gamans fyrir þá ættingja og vini sem þekkja fólkið;
Hér má sjá m.a. Þorgeir Baldursson góðan ljósmyndara og félaga sem alltaf er með myndavélina á lofti (eins og sumir:)
Ása Gísla var einn vetur í sama bekk og ég (í framhaldsdeildinni)
Þarna var líka Sturla Þorgríms gamall skipsfélagi Rúnars af Júlíusi Havsteen og Lára kona hans. Svo er þarna Jónasína (Didda) Kristjánsdóttir frá Hólmavaði, fyrrverandi nágranni okkar á Baughólnum og hennar ágæti sambýlismaður frá Grindavík. Ekki má heldur gleyma Palla Sigurpáls og Sæunni hans sem var vinnufélagi minn á Húsavík.
Huld Gríms fjarskyld frænka mín og hennar maður Kári létu sig ekki vanta og hafa hreinlega ekkert breyst í áranna rás, þó flest annað breytist.
Nú mín gamla góða skólasystir og vinkona Anna Mæja og okkar ágæti bekkjarbróðir Ábi Salla voru bæði hress að vanda.
Brynhildur frænka mín frá Sultum og hennar maður Guðmundur Eiríksson vöktu athygli mína m.a. fyrir skemmtilegan klæðaburð.
Og svo hann Siffi frændi minn með eldri soninn Jóhann Karl, brosleitir feðgar að vanda. Síðast en ekki síst kom svo Ásdís Sigurðar en hún var líka með mér í Versló í den og að sjálfsögðu kom Bjarni hennar ektamaki með henni.
Þetta var ein stór gleðihátíð og þó mikið væri dukkið af bjór á Húsavík þessa helgi, þá er varla hægt að segja að það hafi séðst á nokkrum manni, svo rólegir og glaðir voru allir.... enda sjáið þið hvað allir eru brosmildir, glaðir og kátir á þessum myndum.
Ég stefni að því að bæta við fleiri Mærumyndum og segja stuttlega frá þessum góðu dögum okkar fyrir norðan... en ætla svo að senda gamlar myndir (eftirtökur) annað svo þær komist e.t.v. á Facebook, því þar eiga þær heima, enda voru þær til sýnis á Húsavík en ekki hafa samt allir farið og séð þær... kíkið bara á Facebooksíðuna mína eða á síðuna hennar Ásdísar Sigurðar, því væntanlega verður það hún sem setur inn þessar gömlu myndir sem ég sendi henni :)

Gengið meðfram Jökulsá á Fjöllum...

Í upphafi Mæruviku var ákveðið að skella sér í Jökulsárgöngu. Við ókum upp að Dettifossi og gengum að fossium vestanverðum og einnig að Hafragilsfossi nokkru neðar. Síðan ókum við á bílastæði sem er skammt frá Hólmatungum og borðuðum þar nestið okkar í sólarblíðu, áður en við kvöddum Jóhönnu og bumbuna sem fóru með bílinn niður í Vesturdal á meðan við hin gegnum niður að Jöklu til að skoða "katlana" og áfram eftir gönguslóðanum niður með ánni, gegnum allan skóginn og gróðurinn í Hólmatungum og áfram yfir í Hljóðakletta. Áður en við kæmumst yfir í Vesturdalinn urðum við að vaða yfir Hólmána sem var ansi köld, en hressandi svona eftirá, því veðrið var svo gott. Að aflokinni göngu fórum við öll í Ásbyrgi og fengum okkur að borða, enda flestir orðnir svangir og þreyttir, nema kannski Jóhanna og bumban sem höfðu sólað sig í blíðunni á meðan við hin puðuðum ca. 10 km leið :)

LungA og fleiri góðir gestir :)

Nýafstaðin helgi var hin árlega LungA-helgi, (Listahátíð ungs fólks á Austurlandi) og var þetta í 10. sinn sem hún er haldin. Veðrið hefur samt aldrei verið eins dimmt og drungalegt, þó ekki væri kalt, þá var meira og minna blautt og alskýjað.
En enginn virtist láta það trufla sig sem betur fer og allt gekk vel það við best fengum séð. Við Siggi fórum á tískusýninguna og síðan allir á uppskeruhátíðina, tónleika og annað sem í boði var, m.a. fórum við í kirkjuna þar sem var stutt en óvenjuleg uppákoma. Við höfum ekki fyrr séð hálf nakinn mann í prédikunarstólnum, en síðan var haldið í gönguferð um bæinn, því atriðin voru hist og her og flest á sama tíma, svo erfitt var að fylgjast nema takmarkað með því sem boðið var upp á, enda valdi maður úr.
Bergþór okkar kom heim með kærustuna sína og systir hennar kom líka ásamt sambýlismanni, svo fjölmennt var oðið hér á heimilinu þessa helgina.
Rúnar skrapp með unga fólkið á sjó og ég sá um að þau fengju eitthvað að borða. Annars voru þau mest sofandi ef þau voru ekki einhvers staðar úti í bæ, svo við sáum ekki mjög mikið af þeim, enda ekki margra daga heimsókn að þessu sinni.
Þau kvöddu öll og fóru síðdegis í gær, einnig Harpa mágkona og Eyrún dóttir hennar...
Takk fyrir komuna og hittumst öll heil síðar :)

Kristrún 50 ára

Síðastliðinn föstudag, 16. júlí hélt Kristrún Aradóttir frænka Rúnars upp á hálfrar aldar afmæli sitt með stórveislu. Það var fullt út úr dyrum hjá henni og mikið spjallað og borðuð kjötsúpa, salöt, kökur og kaffi+gos :)
Öll systkini hennar mættu með fjölskyldur sínar, vinnufélagar komu einnig og við Rúnar og Siggi mættum auk Hörpu mágkonu og Eyrúnar. Við vorum eiginlega of södd það sem eftir var dagsins, enda sjálf búin að vera með veislumat, því Bergþór var kominn í heimsókn með 3 gesti með sér til að vera heima um LungA-helgina....

Afmælisferð til Húsavíkur

Þriðjudaginn 13. júlí varð blessuð mamma 84 ára. Hún var búin að óska eftir því að við færum með hana á heimaslóðir hennar ef hægt væri um þetta leyti og auðvitað vonuðum við að bæði heilsan hennar væri nógu góð og veðrið sömuleiðis, svo hægt væri að uppfylla þessa árlegu ósk hennar. En því miður var hún mjög slæm í bakinu og alls ekki ferðafær og veðrið á afmælisdaginn var heldur í dimmara lagi, þó það létti til er líða tók á daginn. En daginn áður var glaða sól og hlýja, svo við vorum léttklædd við að slá lóðina heima í Hlíð og mamma kúrði á afmælisdaginn og lét okkur stjana við sig, auk þess sem nokkrir gestir komu og spjölluðu við hana og okkur, færðu henni blóm og þáðu kaffi. Við sátum líka og hlustuðum á þátt um Svínadal sem var í útvarpinu síðdegis og tókum lífinu með ró, enda búin að vera rösk við að henda rusli úr kjallaranum og þrífa hann nokkuð vel.
Loks í gærkvöld fórum við svo í matarveislu til Villu og Fúsa ásamt Sigrúnu og Hauk og áttum þar saman yndislegar samverustundir. Sólin var þá aftur farin að skína og við nutum þess að rölta í kvöldblíðunni heim með Sigrúnu og Hauk sem er orðinn furðu hress og lítur vel út eftir allar krabbameinsmeðferðirnar, en þeim er nú loksins lokið og við óskum honum góðs bata sem fyrst, svo líf þeirra geti aftur farið í fastar skorður eins og áður :)

Góðir gestir :)

Ella mágkona, Árni ektamaki hennar og einkadóttirin Auður Lóa skelltu sér í hringferð fyrir s.l. helgi og komu til okkar á föstudaginn. Veðrið hefði mátt vera betra, en það hefði líka getað verið verra. Á laugardag fórum við á alla markaðina í bænum og eyddum drjúgum tíma í það. Fórum síðan á sýningu sem verið var að opna í Skaftfelli kl. 4 og dúlluðum okkur svo yfir góðum kvöldmat og að horfa á gamlar myndir frá Seyðisfirði. Á sunnudaginn var veðrið mun skárra og sól var á köflum svo við renndum okkur rúnt á sjóinn á nöfnu minni og renndum fyrir fisk, en urðum ekki vör. Fengum hinsvegar ágætis fjarðarrúnt og létum það nægja. Þau skruppu síðan í heimsóknir til ættingja og vina og komust yfir heilmikið á stuttum tíma.
Við kvöddumst síðan á mánudag, þegar þau héldu á Norðfjörð, en við norður í land. Þau komu síðan á eftir okkur, en vegna tímaleysis urðu ekki frekari samfundir, því þau þurftu að komast í Ásbyrgi til gistingar áður en lokað var fyrir þjónustuna, því kvöldsett var orðið... en við sjáumst vafalaust aftur fyrr en síðar :)

Árleg Tapas veisla í blíðskaparveðri

Í gær, sunnud. 4. júlí var árleg spænsk veisla hjá þeim dugnaðarkonum Ágústu Berg, Binnu Ara, Stefaníu og hjálparfólki þeirra. En þetta er 3ja árið í röð sem þær stöllur halda slíka veislu. Fyrstu 2 árin var veislan heima hjá Binnu og Magga, en að þessu sinni var veislan hjá Ágústu og Gunnari Árna, en þau voru með gesti sem sérfróð eru um spænska matargerð og tóku þátt í allri vinnunni við þá mörgu og ólíku rétti sem á borð voru bornir, en réttunum hefur fjölgað ár frá ári.
Við höfum fengið þann heiður að mæta án þess að veita nema lágmarks aðstoð, aðallega að kaupa léttvín með matnum og njóta svo herlegheitanna.
Það var heilmikið þrekvirki að smakka á öllum réttunum og má segja að við höfum borðað yfir okkur, enda fór orkan sem við áttum eftir í gær, í að melta góðgætið og við gerðum ekki mikið meira það sem eftir lifði dagsins.
Það sem skipti líka miklu máli var, að "sá í efra" úthlutaði okkur sól og blíðu þennan dag, svo hægt var að sitja utan dyra og njóta þess, en veðurfarið skiptir afar miklu máli þegar eitthvað stendur til, það held ég að við öll séum sammála um :)
Við þökkum innilega fyrir okkur !

Kaffiboð hjá Köllu og Garðari

Laugardaginn 3. júlí buðu Garðar Eymundsson og Karolína kona hans, okkur Rúnari og 6 öðrum gestum til veislu heima hjá sér. Tilefnið var listaverkabókin hans Garðars sem hann gerði af fjallahring Seyðisfjarðar og gaf út í vetur um svipað leyti og hann hélt sýningu í Skaftfelli á Fjallahringnum.
Að mínum dómi var óþarfi að þakka okkur frekar fyrir veitta aðstoð, það höfðu þau þegar gert, m.a. með eintaki af listaverkabókinni.
Ég get ekki annað en dáðst að dugnaði og framtakssemi svo fullorðins fólks, að standa aftur og aftur í stórræðum á þeirra aldri. Óskandi væri að sem flestir hefðu slíkan vilja og dugnað þegar árin færast yfir.

Glannalegur leikur !!!

Föstudaginn 25.júni er við vorum að koma niður Fjarðarheiði, sáum við 5 ofurhuga með nokkra litla kajaka við einn fossinn í Fjarðará. Þrír stóðu með myndavélar, sitt á hverjum staðnum tilbúnir að fanga hverja hreyfingu hinna tveggja ofurhuganna sem renndu sér niður fossinn hvor á eftir öðrum. Þetta virtist lítið mál fyrir þá og er kannski bara skemmtilegur leikur fyrir þá sem kunna þessa list. En í augum þeirra sem á horfa í fyrsta sinn virkar þetta mjög glannalegt.
Ég náði nokkrum myndum af öðrum ofurhuganum sem er hér við það að steypa sér fram af fossbrúninni og einn myndatökumaðurinn nærstaddur úti í ánni eins og sjá má.... Með því að smella á myndina má sjá hana í stækkaðri útgátu sem nýtur sín betur :)

Hrafnsungar í hreiðri

Það er ekki á hverjum degi sem maður fær tækifæri til að sjá hrafnsunga í hreiðri.
Við fréttum af stálpuðum ungum hér út með firðinum og drifum okkur með myndavélar á vettvang og tókum nokkrar myndir af þessum 2 næstum fullvöxnu ungum sem stilltu sér upp eins og fyrirsætur, svo hægt væri að ná sem bestum myndum af þeim :)

Skálanes-heimsókn 2010

Mörg undanfarin ár höfum við Rúnar farið út í Skálanes, eina eða fleiri ferðir á sumri með ættingja og vini eða á eigin vegum og einnig með gönguklúbbnum. Alltaf er jafn gaman að koma á þennan friðsæla og fallega náttúrustað.
Að þessu sinni gripum við tækifærið og heimsóttum svæðið þegar húsráðendur í Skálanesi buðu gesti velkomna að skoða æðarvarpið. Siggi Birkir kom með okkur og við áttum þarna góðan dag, gengum um allt varpið með Sigrúnu Ólafs sem fræddi okkur um að þarna væru í kringum 500 æðarhreiður (ef ég man rétt:) og annað eins af kríum er þarna til staðar á heimatúninu hjá þeim. Kríurnar voru reyndar svo aðgangsharðar þegar við gengum síðasta spölinn að þær blóðguðu okkur Sigga bæði :)
En síðan fengum við smá næringu hjá Rannveigu og sátum og hlustuðum á fyrirlestur um það sem verið er að gera í Skálanesi og hverjar framtíðarhorfurnar þar eru.
Að síðustu röltum við yfir að fuglabjarginu í blíðskaparveðri með Óla Erni og þaðan röltum við yfir að svínahúsinu, en tilraun er nú gerð með uppeldi svína í kvosinni skammt frá bílastæðinu. Þar eru 5 svín alin á úrgangsmat frá hótelinu og ávöxtum úr KHB og voru þau ótrúlega gráðug. Þau virðast líka éta lúpínuna sem er þarna nóg af á svæðinu og það kom virkilega á óvart og svo þessi ótrúlega lyst sem þau hafa :)))
Á síðustu myndinni má sjá 2 æðarkollur með meters millibili, hvor upp af annari.
Þær verpa gjarnan mjög þétt ef aðstæður eru þannig eins og í Skálanesi...

Sólskinsdagur fyrir norðan

Margar ástæður voru þess valdandi að ég dreif mig norður til mömmu síðdegis á þjóðhátíðardaginn okkar. Mamma var nýbúin að týna öðrum tanngarðinum sínum og skipulögð leit var gerð og engu sleppt, en líklega hafa þær lent í ruslið, þar sem minnið hennar mömmu blessaðrar er orðið afar slæmt og hún farin að gera ýmsa hluti sem hún hefur ekki gert áður.
Lóðin heima í Hlíð var líka orðin kafloðin, svo að ég var hálfan dag að berjast við að slá hana og hreinsa, í sól og steikjandi hita, með svart ský af bitmýi í kringum mig sem beit mig hressilega, svo ég er bólgin og með pirrandi kláða.
Ég var svo boðin í afmælisveilsu hjá Sigrúnu vinkonu sem var 55 ára í gær og að sjálfsögðu mættu öll systkini hennar nema eitt, auk foreldra hennar og annarra nánustu fjölskyldu meðlima og tengdafólks.
Systkinin frá Þórðarstöðum eru alveg einstaklega dugleg og viljug að koma saman og halda upp á afmæli og alla atburði í stórfjölskyldunni. Þar sem þau eru samtals 9 auk foreldranna, þá eru þetta býsna mörg afmælisboð á ári og að auki öll merkisafmæli tengdafólksins og uppákomur vegna útskrifta, giftinga og afmæla afkomenda þeirra. Það er örugglega varla til nein fjölskylda sem gerir betur hvað þetta snertir :)
Að síðustu kom svo Didda systir ásamt Rúnari sínum á stóra bílnum með hornsófann sem við keyptum og settum í stofuna. Ég var búin að flytja gamla sófasettið niður í kjallara og rýma vel til og þrífa og sófinn alveg smellpassaði, svo stofan er eins og ný og vafalaust verður notalegt að sofa þar þegar færi gefst til þess.
Umhverfi Húsavíkur var hreinlega lillablátt af lúpínu, upp um alla hóla og hæðir og sjálft fjallið nánast orðið þakið af blómum. En ennþá var smá snjófönn eftir í dagmálaláginni, spurning hvaða dag hún muni hverfa ???
Þetta var stutt en gott helgarfrí á heimaslóðum og ég hlakka til að fara í frí og geta stoppað þar svolítið lengur í næsta mánuði :)

Sólríkir dagar !

Enn einn sólríki dagurinn er að kveldi kominn og nýliðin helgi óvenju hlý og sólrík.
Við grilluðum og borðuðum úti í fyrsta sinn í sumar og nutum daganna eins og kostur er. Rúnar kom í land í gær og naut gærdagsins með okkur Sigga, en í dag fengum við Rúnar okkur göngutúr upp í Botna og skoðuðum m.a. trjávöxtinn á leiðinni, auk þess sem Rúnar sýndi mér svæðið í klettunum þar sem hann og félagar hann voru vanir sem krakkar að vera með indíánatjöldin sín. En nú hafa vaxið þar stórar og fallegar furur sem varða leiðina upp á klettana. Þetta varð prýðisgóð gönguför og ég komst að því að hvítlauksbelgir sem ég hef tekið við liðverkjum og vefjagigt virðast gera mikið gagn, því ég var bara alveg laus við verki og vandamál sem hafa verið að angra mig s.l. ár og gleðst mikið yfir því. Það gefur mér von um að geta farið í göngu í sumar sem mig langar að fara, frá Hólmatungum við Jökulsá á Fjöllum og niður í Ásbyrgi, án þess að gefast upp á miðri leið vegna ónota í fótunum.
Áður en sólin hvarf á bak við Bjólf, þá kíktum við með Snorra Jóns upp á háu mjöltankana í SR og smelltum af nokkrum myndum. Útsýnið er fallegt en líka býsna hrollvekjandi fyrir lofthrædda, en hvað lætur maður sig ekki hafa til að geta gert það sem mann langar til :)

Góðar horfur á berjasprettu...

Ég hef tekið eftir því undanfarna daga, þegar ég hef verið að vinna í garðinum, að rifsberja-blómaklasarnir á runnunum hjá mér hafa aldrei verið jafn stórir og margir.
Ég kannaði svo málið í gær og í dag, hvort sama mætti segja um sætukoppa á aðalbláberja- lynginu og komst að raun um að svo er, það er bókstaflega allt rauðbleikt af sætukoppum hér um allar fjallshlíðar.
Þetta gefur góðar vonir um góða uppskeru í haust ef Guð gefur okkur sól og regn í hæfilegu magni í sumar. Ég get ekki sagt að hausið sé minn tími, en viðurkenni þó að njóta þess í botn að fara í berjamó í góðu haustveðri og tína stór og góð ber. Um hollustuna þarf enginn að efast...Vonum bara að uppskeran verði alls staðar góð, sama hvort um heimaræktun er að ræða eða náttúruna allt um kring :)

Sólrík sjómannadagshelgi !

Það var sól og rjómablíða hér laugardaginn 5. júní 2010 þegar flestöll hátíðahöld sjómanna helgarinnar fóru fram hér á Seyðisfirði og það er sjaldgæft, því oftar en ekki hefur súld, þoka og hráslagi legið hér yfir þennan dag undanfarin ár.
Það var því líflegt um að litast í Gullver NS 12 á meðan að siglt var um fjörðin með fullt skip af fólki sem undi sér vel í sólinni og enn betra var að hnúfubakurinn sem verið hefur hér í firðinum undanfarnar vikur, var hér enn og sýndi sig, svo margir urðu glaðir, þó erfitt væri fyrir svona stórt skip að fylgja honum eftir :)
Ég var því miður upptekin eftir hádegið og gat ekki fylgst með hátíðahöldunum, sat yfir hjá Svandísi læknamiðli, hjúkrunarfr. og nuddara sem hér var að aðstoða fólk sem til hennar leitaði. Það var því ekki fyrr en um kvöldið sem ég var aftur frjáls og fór með Rúnari á matinn og ballið. Þar voru mættir nokkrir árgangar sem héldu upp á tímamót í lífinu og skemmtu sér vel. Heiðursgestur kvöldins og sá sem heiðraður var að þessu sinni var Páll Vilhjálmsson. Stína kona hans var auðvitað með honum og flest börn þeirra voru líka mætt. Er Palli vel að heiðrinum kominn.
Auk þess var öll áhöfn togarans með mökum mætt og talsverður hópur í viðbót. Við fengum auðvitað ljómandi góðan mat og hljómsveitin var líka ágæt. Verst var að ég þurfti að fara snemma heim, þar sem Adam ömmustrákur var hjá okkur og í pössun og ég var búin að lofa barnfóstrunni að vera ekki langt fram á nótt.
Allt gekk vel og ljómandi góð helgi er nú afstaðin

Babuji á Seyðisfirði

Í dag 31. maí 2010 kom saman nokkuð stór hópur fólks á "gamla spítalanum" til að hitta og hlusta á Indverjann Babuji (eða Mooni) sem kom hingað á vegum Kristbjargar Kristmunds blómadropa- og jógakennara en þau kynntust fyrir 4 árum á Indlandi.
Babuji er læknismenntaður og kaus að dvelja í einangrun um árabil eftir að námi hans lauk. Hann er örugglega eldri en hann lítur út fyrir að vera, því hann virkar á mig sem ungur maður með góða kímnigáfu og með ótrúlega þolinmæði og vilja til að lifa því sérstaka lífi sem hann lifir nú eftir að einangrun hans lauk.
Honum fylgir ávallt aðstoðarkona hans sem sér um daglegar þarfir hans og einnig kom hópur Íslendinga að sunnan til að vera með honum hér á meðan á dvöl hans stendur hér eystra.
Umræðuefni samfundarins var Ást eða KÆRLEIKUR í ýmsum myndum eins og viðstaddir hafa upplifað óeigingjarna ást. Sumir voru duglegri en aðrir að tjá sig, svona eins og gengur og að lokum fengum við Seyðfirðingar að eiga við hann fáein orð og þakka fyrir samveruna.
Hér má sjá sýnishorn af þeim myndum sem ég tók, en ég bað um leyfi til myndatöku og var því vel tekið, takk fyrir mig :)

Sjaldséðir gestir !

Alltaf annað slagið koma hingað sjaldséðir fuglar og flækingar sem slæðast hingað óvart með veðri og vindum.
Við höfum ekki oft séð Rauðbrystinga hér á landi og aldrei fyrr hef ég séð þá hér á Seyðisfirði, en í morgun voru a.m.k. 12 eintök önnum kafnir í matarleit í fjörunni úti á Vestdalseyri. Önnur óvænt sjón mætti okkur þar líka, en það var hópur af Óðinshönum sem syntu í sjávarborðinu rétt hjá Rauðbrystingunum, en ég hef aldrei séð þá fyrr á sjónum, aðeins við ferskvatn, þ.e. vötn, tjarnir og læki hingað til.
Þessi kosninga+Evrovision-helgi er búin að vera óvenju sólrík og góð miðað við sólarleysið og kuldatíðina undanfarið.... :)))

Adam í sveitinni :)))

Þegar ég hugsa til baka til æskuáranna, þá var eitt það skemmtilegasta sem ég gerði að fara í heimsókn til afa og ömmu í sveitina. Þá voru þar hestar, kindur, kýr og hænsni og ég naut þess af öllu hjarta að umgangast dýrin, fara á hestbak, horfa á ömmu mjólka kýrnar, taka á móti lömbunum á vorin og fara í réttirnar á haustin, tosast í heyskap og gefa hænunum og tína saman eggin þeirra.
Ég get því vel skilið að dóttursonur okkar uni sér vel í rólegheitum hjá okkur, því sannarlega gerum við okkar besta til að gleðja hann og sinna honum sem best. Hann fær að vísu ekki tækifæri til að gera sömu hluti og ég gerði á hans aldri, en hann fær að gera ýmislegt annað, eins og að ganga um friðaða náttúru og skoða fuglahreiður og egg, sigla á trillu út á fjörð og sjá hvali, fugla og fiska.
Hann fær að taka þátt í því sem við erum að gera, eins og garðvinnunni o.fl. og fær að heyra skemmtilegar sögur á hverju kvöldi og borða það sem hann langar í :D
Síðast en ekki síst þá fékk Adam að fara í heimsókn í hænsnakofann hjá Önnu nágrannakonu og fékk að hirða 3 egg sem þar voru. Það var nú ekki leiðinlegt :)
Vonandi verða hans bernskuminningar jafn góðar og mínar, þegar árin færast yfir hann :)

Tónleikar kirkjukórsins

Ég gleymdi að geta þess að laugardaginn 22. maí hélt kórinn tónleika í bláu kirkjunni undir stjórn Sigurbjargar organista, en hún er nú komin aftur til okkar eftir áratuga fjarveru. Lögin á dagskránni voru öll eftir Inga T. Lárusson, nema lokalagið Seyðisfjörður sem er eftir Stein Stefánsson. Hjónin Sunsana og Charles Ross spiluðu einnig 6 lög eftir Inga og vorum okkur til aðstoðar og uppfyllingar.
Ég veit ekki annað en að vel hafi tekist til og gestir virtust mjög ánægðir með útkomuna. Er það vel :)
Að tónleikunum loknum héldum við yfir á veitingahúsið Ölduna og snæddum þar saman ljómandi góðan kvöldverð ásamt mökum okkar, alls hátt í 50 manns.
Þetta var því ljómandi góður dagur, sólríkur og bjartur og síðast en ekki síst afmælisdagur yngri sonar okkar Bergþórs :)

Hvítasunnan á Húsavík :)

Á Hvítasunnu-dagsmorgunn fórum við Rúnar snemma af stað norður til Húsavíkur til að hitta mömmu, Diddu systir, Jóhönnu Björgu og Adam, en þau 3 síðastnefndu voru komin norður á undan okkur. Ferðin gekk vel og veðrið gott. Við sáum mikið af fuglum á leiðinni og nokkur hreindýr, en annars var tíðindalítið á ferðinni yfir fjöllin.
Við notuðum hluta úr deginum til að setja niður útsæði í garðinn hans pabba, en hann var herfaður einmitt á Hvítasunnumorgni okkur til mestu furðu. En þar sem allt var til reiðu fyrir niðursetningu var ekki eftir neinu að bíða.
Mamma var bara hress og við hittum flesta ættingjana eins og venjulega og Sigrúnu vinkonu á Þórðarstöðum. Rúnar skrapp með Adam í heimsókn til kinda og lamba hjá Jónda og fórum hefðbundinn rúnt með mömmu, m.a. í þetta sinn upp að Botnsvatni, en þar er áftin búin að verpa í hólmanum eins og undanfarin ár og talsvert fuglalíf við vatnið.
Blíðuveður gerði okkur svo kveðjustundina og heimferðina léttari. Adam kom með okkur austur og verður hér framyfir sjómannadag, sem er góð tilbreyting fyrir okkur öll.

Afmælisbörn helgarinnar !

Þetta unga par, Bergþór og Hildur Inga eru afmælisbörn helgarinnar í okkar fjölskyldu. Hildur á afmæli 21. maí og Bergþór 22. maí. Að þessu sinni hélt Bergþór uppá "aldarfjóðungs" afmæli sitt. Því miður gátum við ekki verið öll saman fjölskyldan eins og á afmælum Sigga og Jóhönnu, en við reynum að bæta það upp síðar ;)
Ekki svo að skilja að þau séu einu afmælisbörnin að þessu sinni, því við heiðrum líka minningu þeirra Þorsteins Guðjónssonar afa Rúnars sem var fæddur 23. maí og pabba (Sigurðar Gunnarssonar) sem var fæddur 24. maí. Fleiri fjarskyldari ættingjar eiga líka afmæli um þessar mundir en ég sleppi því að telja þau öll upp :)))

Hnúfubakur í Seyðisfirði

Í dag 22. maí 2010 var myndarlegur hnúfubakur á veiðum í Seyðisfirði og meðfylgjandi myndir eru af honum. En undanfarnar vikur hafa ýmsir hvalir séðst hér í firðinum á veiðum og virðist vera nóg æti þar að hafa, enda sjáum við stöðugan straum af kríum með síli í gogginum á ferð frá sjónum og hér upp með ánni að varpsvæði þeirra.
Þessa dagana eru kríurnar einmitt að hefja varpið og erum við búin að sjá fyrstu eggin og fundum reyndar 3 hettumáfshreiður úti á Ölfueyri og létum okkur hafa það að fá okkur egg í soðið :) Þau smökkuðust MJÖG VEL !!!

Flatbrauðsgerð utan dyra í maí :)

Þegar ég kom heim af kóræfingu í gærkvöld, þá sá ég mjög óvenjulega sjón. Það var móðir nágrannakonu minnar sem var að "svíða" flatkökur utan dyra, á sama hátt og við svíðum kindahausa, lappir og annað sem við viljum svíða. Fórst henni þetta mjög vel úr hendi og gaman hefði verið að smakka á þessum fínu kökum hennar, sem eiga víst að fara í væntanlega fermingarveislu sem verður innan fjölskyldunnar um helgina.
Kannski ég fari að prófa að hnoða flatkökudeig og baka nokkur stykki á þennan hátt, margt er vissulega vitlausara en það.... bara gaman að þessu :)))